LESHELE 22 - BAIBEL (BSI)Amlo Ghuju Ghugha 1 ILhou, iLhou, noye kushiye iqhive ani kya? ikuphupe nikeu ighamuku aghimeshi akeu lo noye kushiye putosu auve akya? 2 O iLhou, pucho tsalalo ino ighakemu noye ikhochilemoe; Putho lono igha ikemu niye akulho kiqhi ithumlae. 3 Ikemu noye Akimtheu shi akuka lakhulo iqa akeu, Israilmino akishe tsuche keuke. 4 Nipuasuno oshou pukhu che, panonguno opukhubeke eno nono panoqo xaphelue. 5 Panonguno ighamuku okue eno akumsapu lono pokawuluve, Panonguno opukhubeke eno noye panoqo lokumtshu vemoe. 6 Ikemu niye timi kumo toivae, niye pithe ninga lakhi shiavuvae, kutamino ithaigha eno ijukunatha auvae! 7 Ijuthulukemi kumtsuno ithaigha, Panonguno amtsu yelepe itsu eno tishitsulo pi akutsu kungu tsu. 8 Panonguno pi, “Noye AMPEU pukhube achenike paye kushiye oxapheluve mokya? AMPEU no oju alocheni aye paye kushiye okuphu luvemo kya?” 9 O AMPEU, ipunukelo ghi nono ihejulue, ino anga kughunu shi akelo nono isusho pe qhike. 10 Ipunuke tsala lono oshou pukhube acheke, Iza polo aphi lonomu noye iLhouke. 11 Ilauno putosuwuve kevilo, kughengu shiluksano ikupunupe anie, eno khumu ikhuphunikemi kuhae! 12 Aghumi kumzapuno amshitsu toi isuhope ani, Bashan yeghilo ayiksa mishitsuqo toi panonguno isuhope ani. 13 Abongushuno muqhumuza igha aketoi aghumiqono panoqo baxa muku pesu itsu anie. 14 Ayeghilo azu leqhiveke toi ikumtoye hauvae, Ighi anhu kumtsu ita-kututa shivae; Imloye aghugha mullaveke toivae. 15 Ikughokiye alitsa toi kishiqhaivae; eno imiliye ataha medaluvae. AMPEU, nono ipelo thivepe niaye ayeghi mukhulo iqhivae. 16 Atsu lojino suhope akeshi kusakughami muqono isuho pesu ani; Panonguno i-u ngo ipukhu qhuxutsuke 17 Ighi kumtsu kihikhaluve ani, Ighumino anhethi sukuqumono iju ani; 18 Panoqo dolono iphimini kijelu veniye asaqhi eno panonguno iphinhemgha kijeluve. 19 Ikemu, O AMPEU, noye ilauno putosu kevilo! ikukuphuu, mtazu ixaphelulo! 20 Azutakihi lono ikuxu xaphelutsulo, atsu loji lono ixaphelo. 21 Abongushu baxa lono ixalulo, aghalo mshitsu zulo niye ithamlavae! Shekiqhele. 22 Ithikuzumiqo gholo ino oje piphetsuni, panoqo hoholo ino osheqheni. 23 Nongu AMPEU sumsachekeqo, pa shipililo, Nongu Jakob laghami kumtsu pa kimtheje pipilo; Nongu Israil laghamiqo, pa mlla gihulo. 24 Kughengu paye kumlhomi mithive chemoe, momu panoqo ghime jupe aphimuqhu chemoe; Pagi panoqo launo kusuluve chemoe, ikemu panonguno kuphu lepi igha kukelo initsu cheni. 25 Nono ilau shitsukeqo ghenguno ino ahoho kije lono osheqheni cheni, Osumsa omllachekemi zulo ino ashoqhi shipuakeu toi aghashipe omllani. 26 Kumlhomino aghakiqishi chulu nani, Khunono AMPEU lau ighini keno pa mllalu nani. Panongu pelo alhokupuju kinikulu shilupeniu! 27 Timi jeli kumtsuno AMPEU kumsulu nani eno pa lau xaideghi nani; Ashiayeh jeli kumtsuno pa gihu mlla nani. 28 Ayehkipeqhaye AMPEU wuke, eno pano shiyeh kumtsu shou ayehpe ani. 29 Ayeghilo aqhekuzami kumtsu pa zulo itsaiqi gihu nani, Thiveni kemi kumtsu pa zulo itsaiqi gihu nani. 30 Timiqono ighinikeu tiqhelimi vilo AMPEU ghili pi nani. 31 Punu mphi kemiqo vilo ghi, “AMPEU no pawu timiye xalue, ipi piwo nani.” |
Sumi Naga CL Bible - BAIBEL
Copyright © 2013 by The Bible Society of India
Used by permission. All rights reserved worldwide.
Bible Society of India