LESHELE 20 - BAIBEL (BSI)

Tolupenikeu Kighini

¹ Owu shiluksa tsalalo AMPEU no okhochile peni! Jakob Lhou jeno osusho peni!

² Pa kimthe-a lono akukuphu olau puwutsu peni, Zion toghi launo okuphu peni.

³ Nono ogho pesu pa mllakeqo kumsulu peni, lhoxu pesu pa mllakeu kumtsu amlo qilu peni.

⁴ Nono kiu kumsu pulo anikeno pano otsupeni eno okupughu kumtsulo shikupulu peni.

⁵ Tileno owu tokulu lo ninguno ighamuku alokivi shini, eno niLhou shipili ghi owu tokulu ikhikulu shini. AMPEU no nono qhuiniju khukeu kumtsu shikuputsu peni.

⁶ Itehiye ino ithiveake AMPEU no pano kisheluvekeu akukau kuphu cheni; Pawu kungugha kimthe launo pa kukau khochile cheni, Pa kuka kumto pesu tokulu shisheno pa tsue.

⁷ Timi khamiye aghushilo peithakeu khurkulu pukhupe qheza cheni eno khamino khurshi pukhu cheni, ikemu ninguye AMPEU ningu Lhou je pukhupe acheni.

⁸ Timi tipaqoye kupuxa pesu iluqive nani, ikemu ninguye ithughiluve nani eno mutotoi puthugho nani.

⁹ Tokulu pesu akukau tsulo, O AMPEU; ninguno ovilo khukelo nikhochile tsulo.