LESHELE 16 - BAIBEL (BSI)

Pulukibepu Kighini

¹ Isusholulo, O AMPEU, kughengu olauno isusho kulupu ani.

² Ino AMPEU vilo pi, “Noye iMPEU ke; onguno kutaulo ikivipu kuhae!

³ Ayeghilo AMPEU no pukhube kulumiye kiutoi akighiche kela! Panoqo shou ighakiqi kutsasa acheni.

⁴ Khunono kutau lhouqo pape cheni keno panoqo mlo-kusapu kighishe cheni. Panoqono lhoxu heqhipe mllache keulo niye chhosumoe, momu niye pano lhouqo mllamoe.

⁵ AMPEU, nono imheghi eno ivehupu kumtsu tsuke, Ighenguno kiu kutopuani keno tiye o-ulo anie.

⁶ Ighenguno ghuthu ghiphi aghilepu alo ani; tipaqo kiutoi amheghi kivi kela!

⁷ Ino AMPEU sheni kughengu pano isapheke, eno imlono putholo iloputsu tsu cheni.

⁸ AMPEU igholo akeu ino pulhapuju ithi acheni; paye ipunukhoi ani eno kiunomu itukiqhe mla nani.

⁹ Tighenguno imlolo alovi ani eno ingulhono alokiqi shi ani; Iphi-mpino iquneyi ngolu cheni;

¹⁰ kughengu nono kithi-ghau iphepuwuve moe. Momu nono kimiyecheku pelo kithimi ghakhulo ngovepemo nani.

¹¹ Nono akuxupu laghi ipiye; Ogholo aye alokivino chhitoike, eno o-u ajeu kudauye alhokupujulo alokivipu acheni.”