LESHELE 146 - BAIBEL (BSI)

Xakuluu Alhou Shekiqhe

¹ AMPEU sheqhelo! AMPEU sheqhelo, ingulho!

² Ino xuake thaqhulo niye iLhou shipilini. Ikuxu kupujulo niye iLhou shipilini.

³ Sakiphemi ghi timike okupukhu pano shou bekevilo; timi lhoxu khumu oxamlae.

⁴ Kughou panonguno thiveni keno ayeghi mukhu ilhouve cheni; tipa tsalanino panoqo kukughu kumtsu kishekhave cheni.

⁵ Khunono Jakob Lhou pelo pa kuphu peni keno tipano lokivipue,

⁶ Khunono kungugha ngo ayeghi, azughi eno tipaqolo akeu kumtsu Lhokutsuu AMPEU pa Lhou mungubeni keno tipano lokivipue. Paye pulhapuju pano piqhivekeu shikupu cheni;

⁷ Qodaneda puakemi saphughi pano kughatha cheni eno muzuthi kemiqo achuqupu tsucheni. AMPEU no akughumi khaqhiphe cheni,

⁸ anhethi kighichemi ithukulupu tsucheni. Khunoqo veqhiveno ani keno pano xaqhe; pawu amikuchomi kimiye cheni.

⁹ Inami ni yeghilo achekemi pano susho; chimemi ngo mighimgha pano kuphu, ikemu kixikilamino kughu puakeu hexavetsu cheni.

¹⁰ AMPEU ye alhokupujulo akukau. O Zion, iLhou no ado kumtsulo ayehpe chenani. AMPEU sheqhelo!