LESHELE 143 - BAIBEL (BSI)

Kuphupenikeu Kighini

¹ O AMPEU, ikighini initsulo! Omikucho lono ino qhuini jukeu chilutsulo; ochipiu lono ikhochile tsulo!

² Ni oqeu pelo thaiqho thaiqi keu zulo ilopekevilo; kughengu timi lakhimu ozulo pimimokeu kuhae.

³ Ighumino ihaqhi cheni, eno ayeghilo imnudaqhi cheni. pano zumoikeu kughukilo ikughape qhino kha-ghino thivekemi toi iqape.

⁴ Tighenguno inguaghaye lhovae, eno niye ikukumsu mamaivae.

⁵ Ino wovekeu tsalaqo kumsulu, nono shikeuqo kumtsu ino kumsukutoju, nono mlaqhipuakeu kumtsu kumsupukuju.

⁶ Ino i-u peqhepe ovilo akighinishi; qhaikeu yeghi toi ingulho no tughuthi ophu cheni.

⁷ Mtazu ikhochile tsulo, O AMPEU! Ino lajuchekeu kumtsu puhavae. Ilauno ogi kusuluve kevilo, tishiveaye niye kithimi yeghilo iqivekemi toive niake.

⁸ Ipelo ina-atsu-tsu okikimiye iqemokeu chilu pelo, kughengu oshou ino pukhube ani. Ikighini olau peqhepe ighi ani, ino wukepu laghi ipiyetsulo.

⁹ Isusholupe nike olau cheni, O AMPEU, ighumi launo isunhephelulo.

¹⁰ Noye iLhou ke, opulou shipe nike ishikapiyelo. Ilau akivi shitsulo eno ala kumzulo isachelo!

¹¹ Nono piqhivekeu toi ixalulo, O AMPEU; owu akivi kiqi lono ino shilusa akeu launo ixalulo!

¹² Nono ikimiyekeu kiqi lono ighumi pithive tsulo eno ineda-qodakemi kumtsu kutsavelo, kughengu niye oqeuke.