LESHELE 140 - BAIBEL (BSI)

Shokhapenikeu Kighini

¹ O AMPEU, alhoksami launo ixaphelulo; heqhi buqhikemi launo ipukhape qhitsulo.

² Panonguye pulhapuju alhoksa kuchughu acheni, pulhapuju mutomushukeu xukutho acheni.

³ Panoqo miliye apighi mili toi tsughaminhei, panoqo tsaye tuu-pighi tughu toike.

⁴ O AMPEU, kixikilami usugha launo isusholulo; heqhi buqhichekemi launo ipukhape qhilo; panonguno ipuxaqhiniye kuchughuke.

⁵ Qheza-laki chekemino ighenguno alichhe shipesu ani, panonguno akighi pucho pesu imeniye kuto puani, eno imeluve nike panonguno alaphelo alichhe shipepuani.

⁶ Ino AMPEU vilo pi, “Noye iLhou ke” ikuphupe nike ighakeu chilutsulo, AMPEU!

⁷ AMPEU iLhou akumtoshi ixaphe kuluu, aghukishilo nono isusholuveke.

⁸ AMPEU, kixikilamino kiu pulokeno shitsukevilo; panonguno alhoksa kuchughu akeu achipikalupe kevilo.

⁹ Ighumi pelo tokulu shilupe kevilo; Panonguno ishikichi akeu idewo pano shou ikuvepelo.

¹⁰ Amibalu iquakeu panoqo shou ikuve pelo; panonguye aqohlo vesuvelo eno khilemu ipeghimla kepu shivepelo.

¹¹ Akimki lono kutami pipusa chekemi pelo a-a shilupe kevilo; alhoksa pelo heqhi buqhi chekemi qhive pe eno kutsavepelo.

¹² AMPEU, ino ithi anike noye shiluksami susho cheni, eno kumlhomi chipiu xathatsu chenike.

¹³ Kuchouno amikuchomino oje shikimthi nani; eno akumzumiye ogholo xuche nani.