LESHELE 14 - BAIBEL (BSI)

Timi lolo Kixikila

¹ Kughuzumino pa mlolo ishi picheni, “Alhou kuhae.” Panongu kumtsu shikupusake eno kuchhube kepu kumla shi ani; milakhimu achipiu shikemi khumu kuhae.

² AMPEU no kungugha lono jupiqieno timi nuliqoye alokutsu anikeo mokela eno Alhou phuju chenikeo mokela ju acheni.

³ Ikemu panongu kumtsu lavelalo wuvea, panongu kumtsu shipusa khavae. Panoqo gholo milakhimu achipiu shikemi kuhae, moe lakhimu kuhae.

⁴ Akighithi kuha kesha? Kusakughami kumtsuno hipaqono asho chukeshi iwu timiqo tsa khaveke, eno panonguye AMPEU vilo inikhu moe.

⁵ Panonguye shithughuyive nani, kughengu Alhou ye pa ghokulumi gholo ani.

⁶ Alhoksamino kumlhomi kukughu hexavetsu cheni; ikemu AMPEU no sushokuluu ke.

⁷ O Zion lono Israilmi lau xakulupu ighilupeke aye! Kughou AMPEU no akumgha pawu timiqo lau suchile sughi tsuni keno. Jakob no alovi nani, Israilmino amlokiqi shilu nani.