LESHELE 135 - BAIBEL (BSI)

Shekiqhe Le

¹ AMPEU sheqhelo! Paje shelo, nongu AMPEU qemiqo!

² AMPEU kilo puthugho chekemiqo, ningu Lhou chinekilo achekemiqo, nongu AMPEU qemiqo, paje sheqhelo!

³ AMPEU sheqhelo, kughengu paye akivike; paje shipililo, kughengu paye kimiyekinike!

⁴ Pano pa likhi pa ghenguno Jakob kisheluke, Israilmi pe pawu shiniye kisheluke.

⁵ Ni MPEU ye kije kepi ino ithi ani. Paye alhou kutau kumtsu nguno akijeu.

⁶ Kungughalo, ayeghilo, azughilo eno aqhou akuthokulo pano kiu shinishi keno shi acheni.

⁷ Pano ayeghi shekha kudauno pasapagha khungkusu saghi cheni; tsutsughu ghenguno tsutsupha mla cheni, eno pano amlhubo lhaphe cheni.

⁸ Ijip lo timi na tughashi pimu anoghiu pithikhave tsukeu huye pano ke.

⁹ Farao eno pa qholo akemi kumtsu ghimeqhi nike tilau pano amchipu eno akumzapu shipiyeke.

¹⁰ Pano ashiayeh kutomo kutsapinyi vetsu eno kukami akumtomi hipaqo pithive:

¹¹ Amarimi kukau Sihon, Bashan kukau Og eno Kanan lo kukami kumtsu.

¹² Eno panoqo yeghi pesu pawu timiqo mheghipu shitsu; Israilmi lau tipaqo tsuke.

¹³ AMPEU, noye Alhou kepi pulhapuju oje pikulha che nani, tiqheli kumtsulo okumsulu che nani.

¹⁴ Kughengu AMPEU no pawu timiqo saphu nani, eno paqemi shou kimiyeqhiyikeu anani.

¹⁵ Ashiayeh lhouqoye tsandiyi ngo shunayino shike eno timi-uno mlakeuke.

¹⁶ Tipaqoye akichi puani ikemu atsa pilu chemoe, anhethi puani ikemu ithulu chemoe.

¹⁷ Tipaqoye akini puani kemu chilu chemoe; tipaqoye atuthu ghi shelu chemoe.

¹⁸ Khunono tipaqo mlano tipaqo pukhu cheni keno panonguno ajulho shisukeu kimihi ilhouve pelo!

¹⁹ O Israilmiqo, AMPEU sheqhelo! O Aron laghamiqo, AMPEU sheqhelo!

²⁰ O Levi laghamiqo, AMPEU sheqhelo! Nongu Alhou sumsa chekemiqo, AMPEU sheqhelo!

²¹ Zion lo eno paki Jerusalem lo akeulo AMPEU sheqhelo! AMPEU sheqhelo!