LESHELE 12 - BAIBEL (BSI)

Kuphupenikeu Kighini

¹ Ni xalulo, AMPEU; kughengu kivimi lakhimu kuhavae, Timi nuliqo gholo amikuchomi havae.

² Panoqo kumtsu lakhino lakhi vilo akimki tsa pie; muqushe eno amlo kikinino lakhino lakhi pishiqhi cheni.

³ Muqushemi mutsu hupaqo kumtsu ghovetsulo, Shishe qheza-laki chekeu mili ishi pichekeu lakhavelo;

⁴ “Ni mili pesu nino tokulu shi nani, nishou ampiu khuu ani kya?”

⁵ “Ikemu itehi niye ithughiniae, kughengu kumlhomi akijiksa shiakeqo eno ichhe-ime ake qono shishe igha-su auvae; Panonguno laju aketoi ino panoqo sushope qhinie,” ipi AMPEU no pi.

⁶ AMPEU no piqhi puakeuye mutsu mishei ke; tipaqoye amqubo lono tsandiyi ghuthu tsuni ghukimthevekeu toike.

⁷ Kughou kixikilami suqheveni keno aqha kumtsulo panonguno iqho iqi cheni; timi jeli kumtsuno kixikila sheqhe cheni.

⁸ O AMPEU, nono nisusholo, eno timi hutoikeu loji launo nikhea tsulo.