LESHELE 118 - BAIBEL (BSI)

Tokululo Shikimthi Kighini

¹ Shikimthi AMPEU tsulo, kughengu paye aloke, eno pa kikimiye ye lhokta kutoke.

² Israilmino ishi pilo: “Pa kikimiye ye lhokta kutoke.”

³ Aron laghamino ishi pilo: “Pa kikimiye ye lhokta kutoke.”

⁴ Pa mllachekemi kumtsuno ishi pilo: “Pa kikimiye ye lhokta kutoke.”

⁵ Ikijiksa lono ino AMPEU kuke; pano ikhochile eno ikhaqhipheve.

⁶ AMPEU ye igholo ani niye musamoke; khuno ilau kiu shikulupu kya?

⁷ AMPEU no ikuphunike ani, eno ighumi haleluvekeu ino ithulu nani.

⁸ Timi mungube nikeu nguno alauno AMPEU pukhukeu pavike.

⁹ Timi sakiphemi mungube nikeu nguno alauno AMPEU pukhukeu pavike.

¹⁰ Aghumi kutomono isumxape ake; ikemu AMPEU kuka lono ino panoqo kutsave!

¹¹ Aghumiye aqha kumtsulo isumxape ake; ikemu AMPEU kuka lono ino panoqo kutsave!

¹² Panonguno akhi toi kutuqu pesu isumxaluve, ikemu asahuli gholo ami aketoi panonguye pitiqhive, tiye AMPEU kuka lono ino panoqo kutsave!

¹³ Panonguno ayikusashi ihae eno ihaleluve, ikemu AMPEU no ikuphuke.

¹⁴ AMPEU no ipelo akuka kumto shi mutolupe pano ixaluveke.

¹⁵ Alhou timiqo phikilo toluke ghugha ighakeu inijulo: “AMPEU kuka kuloghino tipau shiluveke!

¹⁶ Pa kukano tokulu nilau sughitsuke aghukishilo pa kuka kuloghi hu noke!”

¹⁷ Niye tishinike zuqhulo xulu nani, eno AMPEU no kiu shikeno asheshuni.

¹⁸ Pano shishe ighimeqhiveke, ikemu paye ipelo thivepemoe.

¹⁹ Achineki ghutu kikha khaqhi itsulo; ino tile ilono AMPEU shikimthi nike!

²⁰ Hiye AMPEU ghutu khaghoke; amikuchomi likhino iloghilu nani.

²¹ Ino osheqheni AMPEU, kughengu nono itsa chiluke, kughengu nono tokulu itsuke.

²² Akikishimino atu khipau kileve keno tipau no kumtsu nguno alau atsukupu-u shive.

²³ Hiye AMPEU no shitsuke; kiutoi jukivipu akumzapu kela!

²⁴ Hiye AMPEU no toluvekeu tsala lakhie ningu alovi puzu tipaulo alokivi shini.

²⁵ Nixalulo AMPEU, nixalulo! Tokulupu nitsulo, O AMPEU!

²⁶ AMPEU jelono khuno chenikeno Alhou no kumghatsu peni! AMPEU chinekilo ninguno okumghatsuni.

²⁷ AMPEU ye Alhou ke, paye nilau aloke. Asuloka nongu ulo pepuzu tiqhe tini tsala huthulo eno agho kipiti khache veholo.

²⁸ Noye iLhou ke, niye oshikimthini; ino noye kijekepi asheshuni.

²⁹ Shikimthi AMPEU tsulo, kughengu paye aloke, pa kikimiye ye lhokta kutoke.