LESHELE 108 - BAIBEL (BSI)

Aghumi Tokulupu Kighini

¹ Imloye iqemoke, O Alhou! Ino alephe osheqheni! Ithulo, ingulho!

² Ithulo, ilebo eno ikighilebo! Ino tsukinhe kuda puthu nike.

³ O AMPEU, ashiayehqo gholo ino osheqhenike. Timiqo gholo ino osheqheni.

⁴ Owu iqemokeu kikimiyeno kungugha toke; omikuchoye atsutsu dilu acheni.

⁵ Atsutsulo okuloghi piyelo, O Alhou, okimthe jekipi ayeghi shou piyelo.

⁶ Okumtono nixalulo, ikighini kho chilelo; tishianguno nono kimiye kemi xaphelu kepushi.

⁷ Alhou no pa ghuno-a lono pi, “Ajekipishi ino Shekhem kijeni eno Sukot Khila kijetha pesu iwu timiqo tsuni.

⁸ Gilead ye iwuke eno Manase ghi iwuke; Efraim ye ikutsu kuqho, eno Juda ye iyehkipe suluke.

⁹ Ikemu ino Muab pesu axine qhukeu bohu shini eno Edom shou ipu khu kuqho bepukuni, tiye iwuke ipikeu michi shinikehu. Ino Filistiyami shou tokulu ghule kunike.”

¹⁰ Khuno isasu aphughi putukhapua keulo wuni kya? khuno isasu Edom lo wuni kya? O Alhou!

¹¹ Noye kuchouno ni peve akesha? Noye niwu ghushimi sasu wumo kesha?

¹² Aghumi shou tokulupushi ni kuphulo; timi kukuphuye ame kuhae.

¹³ Alhou no ni kudau anapiaye ninguno tolu nike; pano ni ghumi haleluve tsunike.