LESHELE 105 - BAIBEL (BSI)

Alhou eno Pa wu Timi

¹ Shikimthikeu AMPEU tsulo, Paye kiutoi kijekeno asheshulo; ashiayehqo vilo pano mlakeu piwolo.

² AMPEU sheqhe shipililo; pano akumzapu kumla shikeu piwolo.

³ Ninguye pawuke alovilo; pa mllache kemi kumtsuno alokivi shilo,

⁴ AMPEU lau wupuzu kuphupelo eno tamono pa mllalo.

⁵ Pano akumzapu kumla shikeu kumsululo, pano akichiqhipu shi keu eno kughakutha piqhikeu ithilo.

⁶ O Abraham laghami, pa qemiqo Jakob nuliqo, pano kisheluve kemiqo!

⁷ AMPEU ye ningu Lhou ke; Pano ahza tsukeuye ayeghi kumtsu ghengunoke.

⁸ Paye pawu puloshoqhi alhokuthu penani eno pano tushoqhive keuye tiqheli qhethonhe kutolo ananike.

⁹ Pano Abraham sasu puloshoqhi shikeu peche nani eno Isak lau tushoqhi keu peche nani.

¹⁰ AMPEU no Jakob sasu puloshoqhi lakhi shike, tiye alhokupuju ache nani.

¹¹ “Ino Kanan yeghi nongu tsuni, tiye omheghi shicheuve peni,” ipi pano pike.

¹² Alhou wu timiqoye timi aghulo likhi, Kanan yeghilo inamike,

¹³ Panonguye ayeghi lakhi lono lakhiulo, eno akukaqha lakhi lono lakhiulo iqho iqiche.

¹⁴ Ikemu Alhou ye timi khuu pelomu panongu qhasupemoe; Panoqo sushoni kehu Alhou no kukami kutughuve tsuke:

¹⁵ “Ino kisheluvekeu iqemi shipusalu nosake; iwu tungkupumi bukevilo.”

¹⁶ Alhou no panoqo yeghilo puqumiye puwu eno panoqo chuqupu kumtsu luvetsu.

¹⁷ Ikemu pano panongu zuwuno aqemi lakhi toi Josef jepuwuve.

¹⁸ Pa pukhuye ayikichhe kighi pipe, eno aye kuokha pesu pa kuo veho pipe,

¹⁹ Pano azunatha ghi pikeu shikupuke kuto tishi ake. AMPEU tsano pa pelo achipiu shi aghive peke.

²⁰ Tithiuno Ijip lo akukauno pa kuqho pheke; ashiayeh shou ayehkipeuno pa pheveke.

²¹ Pano Josef pelo pawu yepeka peitha peni keu shive eno pa yeghi shou ayehkipeu shivepe.

²² Paye akukau qholo kijemi akeqo shou akuka ae eno akukau vilo akukumsu tsuchekeqo shou atou shiveke.

²³ Tipathiu Jakob no Ijip lo ighi; pano yeghilo Jakob ye poighi kemi shiauve;

²⁴ AMPEU no pawu timiqo lau atianuli kutomo tsuke; panongu ghumi nguno akumtou shilupe.

²⁵ Pano Ijipmi pelo pawu timiqo mithiu vepe eno pa qemiqo pishipujukeu sholupe.

²⁶ Tithiu pano pa qeu Muse ngo Aron puwu, pano kishelukemiqoke.

²⁷ Pamano Alhou wu akichiqhi michipu shike eno akumzapu kumla Ijipmi yeghilo shike.

²⁸ Alhou no akuzu ayeghi shou puwu ikemu Ijipmiye pano ahza tsukeu gholumoe.

²⁹ Pano panoqo ghoki pelo ahji ilhovepe eno akha kumtsu pithivetsu.

³⁰ Pano yeghiye achuyino nhachhive, akukau kilo thotsu tipaqo chhitoive.

³¹ Alhou no ahza tsukeulo, amiyi ngo amiyi aghulouno ayeghi kumtsulo taiqho taiqi.

³² Tsutsughu zuqhulo Alhou no ayeghi shou apughu ngo tsutsu kukulo puwu;

³³ Pano panoqo tsayibo ngo khughu thibo kutsavepe eno asubo kumtsu vethapinyive tsu.

³⁴ Pano ahza tsu eno tulhaquno phikha kumlapushi ighi;

³⁵ tipaqono ayeghilo asutsani kumtsu chukhave eno axabo kumtsu chuvetsu.

³⁶ Pano Ijipmi kibolo anu anoghiu pithivetsu.

³⁷ Tishi puzu pano Israilmi sasu ipeve; panonguno tsandiyi eno shunayi xapuwuke, eno panongu kumtsu ashiaji kivi eno chochiyi keqoke.

³⁸ Ijipmiye panoqo jupesu musave eno panoqono chevekelo alovive.

³⁹ Alhou no khungkusu pesu panongu nhape eno putholo amino panongu akuvu shitsuke.

⁴⁰ Panonguno khukehu pano atsungu puwutsu; eno panoqo ghapiqi tsuniye kungugha lono achuqupu tsuke.

⁴¹ Pano atuqu lhaphe kelo azuno qoipeghi eno aghoki toi asaye qhalo qowuke.

⁴² Pano pa qeu Abraham lau akimthe shoqhi shikeu hu kumsuchileluke.

⁴³ Pano kishelukemi sasu ipeve, eno panonguno alokivi launo ighamuku alepheke.

⁴⁴ Pano kutami yeghi pesu panoqo tsuke eno panongu pelo tipaqo ki-alu luvepeke.

⁴⁵ Tishianguno pawu timiqoye pa yezah pape peniye eno pano ahza tsukeu kumtsu aghokulu shipeniye ke. AMPEU sheqhelo!