JOYIL 1 - BAIBEL (BSI)

¹ Hiye Pethuel nu Joyil lau AMPEU tsape ighikeuke.

Axa Kutsavekeu mlo ghime

² Hipau inilo, nongu muchomiqo; Juda lo akemiqo kumtsuno inilo. Nongu ghulokilo momu no puasu qo ghulokilo hikithipu shi puani ma?

³ Notianuli vilo hipau pilo, panoqo pelo pano tianuli vilo pipelo, apasushi tiqheli lakhiu vilo piwonanike.

⁴ Amtshuno axabo chukhakumo tulhaqu no chuve, tulhaquno chukhakumono tutughuno chuve eno tutughuno chukhakumo qhivekeu ningamino ashekhashi chupuhave.

⁵ Nongu shokumzumiqo, idathughilo eno qalo; nongu aji kumxomiqo, igha qalo; Aji anileshi mlakepushi akeu tsayithiye shipusakhavae.

⁶ Tulhaqu loji muqono niyeghi levetsue; panonguye akumto kutsasake eno kihikhamlake; Panoqo huye abongushu hutoi tsughaminheyike.

⁷ Panonguno nitsayibo shipusakhavea eno niwu khughuthiboqo tsatha pinyivae. Panonguno tipau koza tsalha qhive tsuae eno alokaqoye metsughoiveake.

⁸ Timi lakhino ilimi lakhi sasu kulawu nikeu shiake lono thive kelo mloqa keshi nongu timiqo ghi qa-alo.

⁹ Achinekilo athi momu atsayiji pesu mlla kepu kuhaveake; Achinemino mloqa ani kughengu panonguye AMPEU mlla kepu kiumu kuhake.

¹⁰ Aluzaye zaghulei ani, ayeghino mloqa ani, Kughengu athi kutsakhavea, atsayithiye qhayiveake, eno oliv suboye thizumuivae.

¹¹ Nongu alukichimiqo, amlo ghujupuke, nongu atsayilu kichimiqo, igha qalo, Kughengu asho thi ngo barlithi eno axabo kumtsu kutsakhave ake.

¹² Atsayibo ngo khughuthiboye thizummuyivae; axathibo kumtsu kimghoiveno thivae. Timiqo lokivi chevae.

¹³ Yeqhiyephi pepuno qanimlolo, nongu achinemi, akipti-alo mlachekeqo! Achinekilo ilolo eno puthotsu mloqalo! Nongu Lhou mlla kepu thi momu atsayiji kuhake.

¹⁴ Kumvu penike ahza tsulo; kuhokumqo kepushi kulo! Juda lo sakiphemi ngo timiqo kumtsu AMPEU nongu Lhou chinekilo ku-kumqolo eno pa lau igha qalo.

¹⁵ AMPEU tsalaye kupunuvae; tiye AMPEU no kutsakungokeu sughinike tsalake. Tipa tsalano akuighupu kiu sughini kela!

¹⁶ Nixabo kutsave kelo ninguye kiumu shimlano juke likhi juake. NiLhou chinekilo alokivi kuhake.

¹⁷ Ayeghi qhaikeulo apiti yisukeu thivae, pekutsupe qhikepu athi kuhake, Ikehu ale kumsashi akeqoye ixapinyi ani.

¹⁸ Tughashiqono avekusa launo igha suani, Amshi lojiqoye a-a shimlano ani kughengu atsuni muzakepu kuhake; Bheri loji ghi inayi khaveake.

¹⁹ O AMPEU, ino ovilo ighamukuke, kughengu achukumzapu eno asuboqoye amino tipaqo pitive keshi thi zummuyi khavae.

²⁰ Aghalo tughashi ghi ovilo igha mukuke kughengu aghokitiqoye qhaive ake, amino pitive keshi achukumzapu kumtsu thikhavae.