John 15 - BAIBEL (BSI)

Jisu ye Atsayibo Kuchou

¹ “Niye atsayibo kuchouke eno iPu ye alukichiu ke.

² Iloka khijehi axathi pithimo keno pano micheve cheni eno axathi pithikeu loka kumtsu alaushi pithi penike pano tipaqo kixiphe cheni.

³ Ino nongu vilo pivekeu tsaqo vechewo nonguye mitheluvae.

⁴ Igholo kimepe achelo eno ino nongu gholo kimepe anani. Aloka lakhino atsayibolo kimepe moke thaqhu loye pa likhi pa kutoshiye axathi pithimla ketoi nonguye igholo kimepe moke thaqhu loye athi pithimlae.

⁵ Niye atsayiboke eno nonguye alokaqoke. Khunono igholo ani eno ino khuno gholo ani keno, tipanono axathi shishe pithi cheni, kughengu isumo keloye nonguye kiumu shimlae.

⁶ Khunono igholo kimepe moni keno aloka lakhi toi pa ikhipeve cheni eno thizummuyive cheni. Aloka tipaqoye xukumqono amilo vesuveno pitive cheni.

⁷ Nonguno igholo kimepe aye eno itsano nongu lolo aye, nonguno kiu pulo keno khulo, tipau nongu ghenguno shitsu nani.

⁸ Nonguno axathi kutomo pithikeuno iPu jukuvupu shitsulu acheni; eno tishikeuno nonguye ino kutsuluvekemi shilu nani.

⁹ Apuh no ikimiye ketoi niye nongu kimiye cheni, ike iwu kikimiyelo kimepe achelo.

¹⁰ Ino iPuhno ahzatsukeu papelu puzu pawu kikimiyelo kimepe acheke toi, ino ahzatsukeu nonguno papelu aye nonguye iwu kikimiyelo kimepe anani.

¹¹ “Ino nongu vilo hipaqo piakeuye ilokivi nongu lolo apeniyeke, eno nongu lokivi shikupu lupeniyeke.

¹² Ino ahza yetsu akeuye hike: Ino nongu kimiyeke toi nongu lakhino lakhi kimiyekilelo.

¹³ Timi lakhino pawu shompami ghenguno akuxu tsuvekeu nguno kikimiye akiqheu kutau kuhae.

¹⁴ Ino kiu ahza tsukeno nonguno tipau shiaye, nonguye ishompami ke.

¹⁵ Hinguno hilauye niye nongu pesu aqemi ipimae kughengu aqemi lakhiye pa mipeuno kiu shicheni kela mthae. Ikemu niye nongu vilo shompami kepi kuni kughengu iPuh lau ino chilukeu tsa kumtsu nongu vilo pivae.

¹⁶ Nonguno ikisheluke kumoe, ikemu ino nongu kishelu eno nongu hekutsulu eno wupuzu tamono axathi kutomo pithipeni yeke. Tishianguno nonguno ije lono Apuh vilo kiu kiumu khu aye pano nongu tsu nani.

¹⁷ Ino ahza hipau nongu tsu ani: Nonguye kimiyekilelo.”

Ayeghilomino Mithikeu

¹⁸ “Ayeghiqhano nongu mithi aye nongu zuuno ipaghi mithivae ipi nonguno ithilo.

¹⁹ Nonguno ayeghiqha laumi keaye, ayeghiqhano pano laumi kimiyeni cheke. Ikemu ayeghiqha launo ino nongu kishelu eno nonguye tipau laumi kumoe, tighenguno ayeghiqhano nongu mithi cheni.

²⁰ Ino nongu vilo pivekeu tsa kumsululo: ‘Aquaxemi lakhiye pa mipeu nguno akijeu kumoe.’ Panonguno ipishipuju aye nongu ghi pishipuju nani, panonguno itsa papelu aye nongu tsa ghi papelu nani.

²¹ Ikemu nonguye ilaumi keghenguno panonguno nongu shou hi kumtsu shi nani.

²² Ino ighimove eno panoqo vilo pimo keaye panonguye axine shikeu kuqumoni cheke, ikemu itehiye panongu xine ghenguno jeku kivishi kepu kuhavae.

²³ Khunono imithi cheni keno iPu ghi mithi cheni.

²⁴ Khunomu shichemokeu kumla ino panongu gholo shimo ke aye panonguye axine shikeu kukuqu kuhani cheke, ikemu itehiye ino kiu mlakeno panonguno ithuluve keghi panonguno ni eno iPuh ikujo mithi cheni.

²⁵ Hiye tishimasa kepushive, tishianguno panongu yezahlo ishi yepuakeu tsa shikupuni kehu, ‘Jekujeli lakhimu kuha kemu panonguno kutsazu lono imithike.’

²⁶ “Ikemu Shikumtokutsuu kuchou Ghungu, Apu kudauno ipekighiu hu, Apu launo ino nongu lau puwu nani. Kughou pano ighini keno, pano ishepe shitsu nani.

²⁷ Eno nongu ghi ishepe shitsu nani, kughengu nonguye abothu lono igholo acheke.”