ISAIAH 54 - BAIBEL (BSI)

AMPEU no Israil Kimiye

¹ Jerusalem, noye totimi anu hami lakhi toi acheke, ikemu itehi noye alokivi launo ighamuku alephelu nani. Noye totimi akimino khilemu phe mokeu nguno alaushi itehiye atianuli shilu nani!

² Nono ngochekeu phiki pekhope kije shikithelo; akighi kushuwa shikithe eno putakeu-su shikumtolo!

³ Sukumxaqha kumtsulo nonguye nolughi pekhowo nani; nowu timi qoye ashiayeh kutamino ayeghi qhasupe akeu luchile nani.

⁴ Msakevilo, nonguye kujomza kithemo ake; nongu pesu aqhokigheu shipemo ake. Noye anipu lhothemi amikucho kumo toivekeu hu kumsumave nani, eno topuchimemi lakhi kughukughaleive keu toive keu hu kumsumave nanike.

⁵ OLhophekeuye oghenguno akimi lakhi toive nani, pa jeye Aqokitikhi MPEU ke. Israil Lhou akimtheuno oxalu nani paye ayeghiqha shou ayehkipeuke.

⁶ Israil, noye anipu alhothe lakhi li kimino lipheveno shishe amlo kusa shiakeu toike. Ikemu AMPEU no li lau okuchile eno pi:

⁷ “Atuqhudo lakhi ghenguye ino oqhive ke; thonhei kimiyekeu pesu ino osachileu nani.

⁸ Atuqhudo lakhi ghengu likhi imlo ideye niye tsughu su wuveke, ikemu alhokupuju ghenguno ino kikimiye opiye nanike,” ipi AMPEU oxalukeuno pianike.

⁹ “Noha ghulokilo niye khilemu itaghi azuno ayeghi yimukeu shimoa kepi tushoqhike. Niye nongu shou itaghi amlo ide kithemo akepi tushoqhi ani; niye nongu sakiyi momu aghime tsumoake.

¹⁰ Naghuto ngo atoghiqono ipa ikiqiluvi, ikemu ino nongu kimiyekeuye khilemu ashekha shivemoke; iwu alokughunopu shoqhi niye alhokupujulo peche nani,” ipi nongu kimiyechekeu MPEU no pi ani.

Ighinikeulo Jerusalem

¹¹ AMPEU no pi, “O Jerusalem, no-aghime shikicheu, akukuphu kukuhau phughi, milakhimu olokughuno tsuni keu kuhakeu, Ino akughupu tu pesu ophughi boqha shiqhepukunike.

¹² Oki moleye rubi tu pesu ino shitsu nani, oghutu kikhaye ami toi vuqai keu tu pesu shitsu nani, eno nosumxape akeu ghutuye ameku sho chino shitsu nani.”

¹³ “Ni ampino nowu timi shikapiye nani, eno kinikulu ngo alakishi panoqo tsu nani.

¹⁴ Kuchou xakutha ngo achipiu pesu nongu mutotoi shitsu nani. Shikumsakeu, qodaqhikeu lono nongu xaluve nani.

¹⁵ Khualano nongu leighi aye, paye ino alepimoamu tishi anike; Khuuno nongu mujochileni keno ikiqive nani.”

¹⁶ “Ino ayikiyiqimi lhopheke, panoqono ami shipuzu aghunanu iqiphe cheni. Ghushimi ghi ino lhopheke, panoqono aghunanu peithano timi pithi cheni.

¹⁷ Ikemu kiu ghunanu pinamu nongu ghuzamla nani; nongu ngukukemi kumtsu vilo nonguno ghechile kulupu shi nani. Ino iqemiqo susholuve nani eno tokulupu panoqo tsu nani.” AMPEU no pivae.