ISAIAH 38 - BAIBEL (BSI)

Akukau Hezekiya Akusu Vive

¹ Tipa ghulokilo akukau Hezekiya ye suve eno thiveni cheghive. Amuz nu Isaya tungkupuno pa putsaniye wuke eno pa vilo ishi pi, “AMPEU no ovilo pianike noye thwokha kumtsu kutokupui luvelo piani, noye vikithemo nanike ghenguno thivekepushi kutolulo.”

² Hezekiya no atozu kudau pa gi tsughuwo puzu ishi inikhu:

³ “O AMPEU, ino amikuchoshi eno aghokulushi oqe chekeu kumsululo eno niye pulhapujulo nono ipelo kiu shipe nishi keno tipau shinike pukaputsa cheke.” Eno pano amlo kughujushi qahke.

⁴ Tileno AMPEU no Isaya vilo Hezekiya lau idewo puzu ishi pilopi ahza tsu,

⁵ “Ni AMPEU, osu David Lhou no okighini chiluvea eno onhezu ithuluveake; ino opelo itaghi ampe chighipungu alau xupeni.

⁶ Ino Asiriya kukatou ulono no eno aphughi hipau xaphe nani eno ino aphughi sushope ache nani.”

²¹ Isaya no akukau vilo khughuthi chishe kighini shi puzu pa mishelo dalo pike tishianguno vive penike.

²² Tileno akukauno iniju, “Niye Achinekilo wulukepu shinani ke ipikeu michi kiu itsu ani kya?”

⁷ Isaya no khochile, “AMPEU ye pano piqhivekeu shinanike ipikeu amichi lakhi otsu nani:

⁸ Akukau Ahaz no akala mulape puakeulo AMPEU no yekukhu pelo kupka chighi idewope nani.” Ike yekukhuno kupka chighi athiu idewo.

⁹ Hezekiya no pa kusu lono viluve kethiu sheqhekeu le hipau yeke:

¹⁰ Ino kumsukeuno akuxu ahelo aphi lono niye kithimi yeghilo cheveni, ikuxu khilemu xulumoake.

¹¹ Ino kumsukeuno kuxumi yeghi hipaulo niye khilemu AMPEU ithulu kithemoake momu kuxumi ithulumoake.

¹² Ikuxuye ghithavea eno ashekha shivea, aphiki lakhi xaqhivekeu toike, Aghikugho suta lono aphi ghathaveke toi, Alhou no ikuxu kishekhavetsu anikepi niye kumsuve.

¹³ Ighime launo ino puthotsu qah, abongushuno ighi tsaphovetsu keshi. Alhou no ikuxu kishekhave tsu ani kepi ino kumsuve.

¹⁴ Isutsaye yezuyive eno qeyive, eno niye amiqhi toi isughughuive. Inhethino kungugha kudau jukeno akulho shive. AMPEU, shiluksa hipau lono ixaphetsulo.

¹⁵ Niye kiu pini kya? AMPEU no hishivetsuke. Imloye khumtsaive eno niye zuhu mlaveke.

¹⁶ O AMPEU, niye oghenguno xunike, oghengu likhi xunike; Ishipivitsulo eno ipelo xulu pelo.

¹⁷ Ikukhu kimji ye alokiqipu shive nani. Akuighupu kumtsu launo nono ikuxu xaluke; Nono ixine kumtsu pevetsuke.

¹⁸ Kithighalo akemi khunomu osheqhelu chemoe; Kithimiye noye amikucho kepi pulubelu chemoe.

¹⁹ Kuxumino osheqhelu cheni, itehi ino osheqhe akeu toi. Apuhno anuliqo vilo noye kiutoi amikucho keno picheni.

²⁰ O AMPEU nono ishipivike. Ninguno akighilebo kuighano oshipili osheqheni Ninguno xuake thaqhulo ochinekilo oshipili sheqheni.