ISAIAH 25 - BAIBEL (BSI)

Shekiqhe Le

¹ O AMPEU, noye iLhou ke; Ino ogihuni eno oje sheqheni. Kughengu nono akumzapu kumla shike; Nono ado kushuwa lono kughu pe puakeu amikuchoshi shiwoke.

² Nono aphughiqo pesu ixapiniyive tsuke eno tipaqo liwo kuptu kutsa pinyive tsuke. Nighumino aki kuloghi shikeqoye alhokupuju ghenguno hauvae.

³ Akuka kumto shiayehqono osheqhe nani; ayikusa shiayehqo phughilo omusakeu anani.

⁴ Kumlhomi ngo kuhakemino olau powuke eno shiluksa ghulokilo nono panoqo puxupe qhike. Nono pasapagha launo panoqo kusuqholuve eno pitipuzakeu kushu lono panoqo susholuve. Ayikusamino susutsalalo pasapagha toi leighike, qhaike yeghilo tsughumoveke tsala toike.

⁵ Ikemu no AMPEU no nighumi hasuve tsuke; khungkusuno atsala kushukumkotsu keshi nono ayikusami ghugha hasuvetsuke.

Alhou no Aghulhu Kutopeqhi

⁶ Hi Zion toghilo Aqokitikhi MPEU no ayeghiqhalo ashiayeh kumtsu ghenguno aghulhu lakhi kuto nani, tiye achuqupu kiviu eno atsayiji akiqheu.

⁷ Ashiayehqo kumtsu shou amlo kusano khungkusu toi nhape achekeu hu pano hileno zuleno lhavetsu nani.

⁸ AMPEU Alhou no alhokupuju ghenguno akithi kutsavetsu nani! Pano timi kumtsu nhethi lono anhezu isuvetsu nani eno pawu timiqono ayeghiqha zulo kujo muzakepushi imeachekeu ikhipe wuvetsu nani. AMPEU ampino pi ani!

⁹ Tipa tsalalo kumtsuno ishi pinani, “Paye niLhou ke! ninguno pa pukhu khecheke eno pano ningu xapheluke. Paye AMPEU ke! Ninguno pa pukhu khecheke; itehiye pano nixaluke ghenguno ninguno alokiqishi alovini.”

Alhou no Muab Ghimeqhini

¹⁰ AMPEU no Zion Toghi susholu nani, ikemu Muab lo akemiqoye abalo aghijini qodave keshi panoqo qodave nani.

¹¹ Panonguye azugha akeshi panongu u-sukhope chhopuwu nani ikemu Alhou no panoqo ghakumpave nani eno panonguye kiumu shi mlaveno ilove nani.

¹² Pano Muabmi liwo eno tilehi putukeu qhemghaikeqo kutsave nani eno tipaqoye ayeghi mukhu lo kuluqhiveno ayeghilo hedave nani.