IPEKULU 40 - BAIBEL (BSI)

AMPEU Phiki Ikhiphetsu

¹ AMPEU no Muse vilo pi,

² “Aqhi atughiu atsala atughiu lono AMPEU no ache keu Phiki ghope qhilo.

³ Tipau alou Puloshoqhi Bohu lo Ahza Chighi supuzu qhilo eno tipau zuu nhaqhiphi qhilo.

⁴ Akibepu sughilo eno peitha chekeqo suwo tipaulo belo. Akulu kibepughi suiloghilo eno tipaulo akulu kuqu belo.

⁵ Puloshoqhi Bohu gizulo musughuta piti kepu shunano shikeu akiptia qhilo eno Aphiki ikulo lalo nhaqhi phi nhaqhilo.

⁶ Aphiki gizulo akumllagho pitinikeu kiptia qhilo.

⁷ Qhukepu chithakhu pesu akipitia ngo Aphiki kuma dolo qhilo eno tipaulo azu lesulo.

⁸ Homxa bokutha shiwolo eno tipau ikulo lalo nhaqhiphi nhaqhilo.

⁹ “Tishi puzu Aphiki eno tipau peitha kepu nhemugha kumtsu akimthe teli pesu nupuzu ikhiphe tsukeu shilo eno tiye akimthe shive nanike.

¹⁰ Tipashelo, akiptia ngo tile peithakepu kumtsu teli pesu nuno ikhiphe tsukepu shilo eno tiye qhoi akimthe shive nani.

¹¹ Qhukepu chithakhu ngo tipau ghokepu ghi tipaphishi ikhiphe tsukepu shilo.

¹² “Aphiki ikulolalo Aron ngo panuliqo saighilo eno chinikeu zukukuchhu shilo pilo.

¹³ Achinemi phimini pesu Aron pepipelo, teli pesu pa nutsulo eno titoi shipuzu pa pesu akimthe shi tsuvekepu shilo, tishianguno paye achinemi shi iqelu nani.

¹⁴ Pa nuliqo saghi puzu aphikuzu puulo.

¹⁵ Tishino nono panoqo papu teli pesu nu ke toi panoqo ghi nutsulo tishianguno panonguye achinemi shi iqelu nani. Hipau nukeu huno panonguye alhokupujulo achinemi shiluvepe nani.”

¹⁶ AMPEU no ahza tsuve keu Muse no thwokha kumtsu shivetsu.

¹⁷ Israilmino Ijip qhivekeu ampe akiniulo aqhi atughiulo atsala atughuni AMPEU no achekeu Phiki shipe qhi.

¹⁸ Muse no tipau akughoaqo qhiwo, akuchughi khagho kimewo, piphiu hekupta khadu chuxusuwo eno atsukuchoqo ikhiqhepuku.

¹⁹ Pano Aphiki nhaqhikepu sukhowo eno tipau shou nhaqhi kepu sukhowoke, tiye AMPEU no ahza tsupua keu toi shike.

²⁰ Tipathiu pano atu pha kuma ikhipesu Puloshoqhi Bohu lo suve eno akhadu pesu ayi bocholo chuxusuno akunha pesu tipau shou beve.

²¹ Tishieno pano Abohu pesu Aphikilo suve eno sushovekeu nhaqhiphi nhaqhive. Hitoi shipuzu, AMPEU no ahza tsupuakeu toi pano Puloshoqhi Bohu sushope qhive.

²² Pano Aphikilo akibepu pesu ajibo ahuu kudau qhi, tiye nhaqhiphi nguno khalau

²³ eno tipau shou AMPEU mllakeu sho pesu qhi.

²⁴ Pano akulu kibepu pesu ajibo apeu kudau akibepu ghungulo qhi,

²⁵ tileno pano AMPEU gizu lono akuluqo kuqu, AMPEU no ahza tsupua keu toi shi.

²⁶ Pano Aphikilo shunano shikeu akiptia pesu nhaqhiphi gizulo qhi

²⁷ eno AMPEU no ahza tsupua keu toi tipaulo ngoniyi munakeu ta pesu piti.

²⁸ Aphiki ikulolalo pano nhaqhiphi nhaqhive,

²⁹ nhaqhiphi tipau gizulo akumllagho pitichekeu kiptia pesu qhi. Tipau shou piti pesu mllakeu gho pesu pano aghashi eno athi pesu mllakeu gho tsu, tiye AMPEU no ahza tsupuakeu toi shike.

³⁰ Pano qhukepu chithakhu pesu Aphiki ngo akiptia kuma dolo qhipuzu tipaulo azu lesupe qhi.

³¹ Tipau lono Muse ngo Aron eno pa nuliqono panoqo phiau qhuve che,

³² kughou panonguno Aphikilo ilo momu akiptialo wukelo tishi cheke, tiye AMPEU no ahza tsupuakeu toi shike.

³³ Aphiki ngo akiptia vehomxa pesu Muse no bokutha shipeqhi eno bokutha ikulolalo nhaqhi phi pesu nhaqhive. Ike Muse no akumla kumtsu qhoi shitave.

AMPEU Phiki Shou Khungkusu

³⁴ Tipathiu khungkusuno Aphiki kuzupholuveno AMPEU no achekeu kuvu saghu saghui keuno tipau chhitoive.

³⁵ Highenguno Muse ye Aphiki alou ilomlakepu shive.

³⁶ Aphiki lono khungkusu taikuve kethiu likhino Israilmiye panoqo ghazu iqesusu a-a kutau wukepu shiche.

³⁷ Khungkusuno Aphiki shou ake thaqhu loye panonguye aghazu iqesusu wumoe.

³⁸ Panonguno iqho-iqi itsu cheke kumtsulo AMPEU no Aphiki shou akeu khungkusuno amchishi puchouno ithulu ache eno putho lono tipau shou ami iquakeu ithulu cheke.