IPEKULU 36 - BAIBEL (BSI)

¹ “Bezalel ngo Oholiab eno atshamgha shikithimi khunoqo lau AMPEU no shikithi eno vethakulu tsuvea keno eno khunoqono Aphiki kimthe shikepu shi akeu eno avehupu shi akeu shithi ani keno AMPEU no ahza tsuveke toi thwokha kumtsu shimasa.”

Timiqono Aghoqo Sughi

² Muse no Bezalel ngo Oholiab eno shikithimi kutami khunoqo lau AMPEU no shikulupu eno khunoqono kuphu nishi aghikeno tipaqo kuluve eno panoqo vilo mla thuvelo pike.

³ Aphiki kimthe shinikeu ghenguno Israilmi no akumllagho khipaqo sughikeno tipaqo kumtsu panonguno pa launo peluve. Ikemu ina atsu-tsu Israilmino Muse lau pano kumllagho tamono pesu ighi cheuve.

⁴ Tileno shitsami khunoqono akumla shi akeno tipaqono wuno

⁵ “Muse vilo piputo, AMPEU no shilo pi ahza tsukeu kumla ghenguno avehupu shi akeu nguno alau timiqono sughi auve.”

⁶ Ikehu Muse no aghazu qhalo ahza lakhi tsupuwu keuno Aphiki kimthe ghenguno puloniqhiyi tsukeu gho tsukevelo pive; tighenguno timiqono tsu kithemove.

⁷ Kiu sughive keno tiye akumla shiqhilukepu nguno alau shiveke.

AMPEU no Akeu Phiki Shi

⁸ Akumla kishimi gholo shitsamiqono AMPEU no achekeu Phiki shilu. Phepheikeu phi tsula biyei keu, hughai keu eno huchui keu mhi eno achishibo kupu kerubim ju aye shisukeu phi alla chighi pesu tipau mlake.

⁹ Alla kumtsu aqhemike, akushu lau miter chighi kini eno akije lau miter kini.

¹⁰ Panonguno alla pungu pesu ajoshi tsughuda eno amuqo lakhi lono alla pungu tsughudake.

¹¹ Panonguno tsula biyei keu phi pesu ashe kumtsulo ayiuno pufu kepu kidipe qhiwo.

¹² Amqo atughiulo pufukepu lhopungu suwo eno tipau ajoshi mighiju puzu aqhemi shi lakhiu loghi lhopungu panonguno tsughudawoke.

¹³ Panonguno shunayi pesu fulu kepushi lhopungu mlake tipau lono aphi muqo kuma lakhishi fukime kuqhaniyeke.

¹⁴ Tipathiu Aphiki nhaqhinike ghenguno ane mhi aphi alla chighi qhaqhi panonguno mla.

¹⁵ Tipaqo kumtsu aqhemishi panonguno mlape qhi, akushu lau miter chighi kuthu eno akije lau miter kini ishi.

¹⁶ Panonguno aphi alla pungu pesu amqo lakhi shi tsughukime eno lakhiu muqolo alla tsugho tsughukime.

¹⁷ Panonguno amuqo lakhilo alla ashekhaulo pufukepu phi lhopungu suke eno lakhiu muqolo ghi pufu kepu phi lhopungu suke.

¹⁸ Panonguno alazayi pesu fulukepu lhopungu mlano alla amqo kuma kime puzu nhaqhikepu lakhi shiniye mla.

¹⁹ Panonguno nhaqhi kepu kutau kini ghi mla, lakhino bheritsu yiko huchui bevekeu eno lakhino ashi yiko kivi pesu shi, tiye ashou nhaqhini kepu shiniyeke.

²⁰ Panonguno akasia pesu Aphiki choqhekepu su shi mla.

²¹ Akuchughi khagho lakhikhino akiqhelau miter bidi eno akije lau sentimiter lhotsugho tsugho,

²² tipau kutsuqo hulahilau pushuleikeu kini shike. Akuchughi khagho kumtsu pushulei keu hipaqo ake.

²³ Panonguno apeu kudau ghenguno akuchughi khagho muku mla

²⁴ eno tipaqo gholo ghokepua tsandiyino shikeu lhobidi mlake, khagho lakhi khi pushuleikeu choqhepe ngokepu ghenguno ghokepua kininike.

²⁵ Aphiki ahuu kudau ghenguno khagho muku mla

²⁶ eno khagho lakhikhi qholo choqhe kepu ghenguno tsandiyino ghokepua lhobidi mla.

²⁷ Aphiki zupo kudau, kulolau ghenguno khagho tsugho,

²⁸ eno acheku sala kini mlake.

²⁹ Hi achekulo sukeu khagho ye aqhou kudauno kime susu atsuqo kutolo kime, khagho kini acheku kini ghenguno shikeuye hipau ghola lono shike.

³⁰ Kumtsu kuqhalo khagho tache eno ghokepua tsandiyino shikeu chighi tsugho ake, khagho lakhikhi qholo ghokepua kinini ae.

³¹ Panoguno akasia su pesu hepta kepu khadu chighi pungu mla, akhadu punguno Aphiki jibo lakhilo, khagho akeqo ghenguno,

³² punguno ajibo tuxau ghenguno, eno punguye kulolau kudau, azupou khagho akeqo ghengunoke.

³³ Khagho amtalo heptakeu khaduye Aphiki ashekichi lakhi lono ashe kichi lakhiu kutolo chokilewoke.

³⁴ Panonguno shunano khagho kuzuve eno tipaulo shunayino khakepu yedapukuke tiye hepta keu khadu xipenike eno tipaqo ghi shunano kuzuveke.

³⁵ Panonguno phephei phi akivi pesu nhaqhi phi shike, tiye tsula biyei keu hughaikeu eno huchui keu mhino ghokeu eno achishibo kupu kerubim koghe aye shisukeuno ke.

³⁶ Panonguno nhaqhi phi pufuqhi nike ghenguno akasia su pesu atsu kucho bidi mlake, tiye shunano kuzuve eno shunayi pesu fulukepu meda puku pua. Panonguno atsukucho choqhekepushi tsandi yino ghokepua bidi ghi mlae.

³⁷ Aphiki ikulolalo nhaqhiphi ghenguno panonguno phephei phi akivi, tsulabiyei hughai eno huchui keu mhi pesu aye shisuke.

³⁸ Nhaqhiphi hipau ghenguno panonguno atsukucho pungu fulukepuyi sughi mla, tipau kutsuqa ngo putakepusu kumtsu shunano kuzuve no atsukucho qo ghenguno alazayi pesu ghokepua pungu shipe qhie.