IPEKULU 32 - BAIBEL (BSI)

Shunayi Mishitsu

¹ Muse no naghuto lono iqighimono ado kushuwa tilau auvekeu timiqono ithulu puzu panonguno Aron suhope ngoluveno pa vilo ishi pi, “Ithu no nighenguno alhou lakhi mlatsulo, tipau pelo ni sawu kepushilo kughengu Muse hupau, Ijip lono ningu saipeghikeu timi huye kishive akela ninguye mthavae.”

² Aron no panoqo vilo pi, “Nongu nipu ngo anuli anga qono akini lo shunayi kighi akeu lekholuvelo eno ilau sughilo.”

³ Ike timi kumtsuno akinilo shunayi kighi akeu kuqho luve eno Aron lau tipaqo sughi.

⁴ Pano tipaqo ikhi pesu kumlaveno shunayizu pesu abohulo lesu no shunayi mishitsu lakhi shitsu. Timiqono pi, “O Israil, hipauye ningu lhou, Ijip lono ningu saipeghi keuke.”

⁵ Aron no ti ithulu no pano amshitsu gizulo akiptia lakhi mlape qhi eno ishi asheshu, “Thoghiu ye AMPEU gihu keu ghulhu lakhi pinyini cheni.”

⁶ Thoghiu inaqhe panonguno itheno lhoxu hami pesu aghashi heqhi pitinike eno hami pesu kuposhu kulu kumllagho shinike sughi. Timiqono kuchu kusho shinike iqae, tiye muxo kuxu keu eno kiptimi totimi mithemo keulo ilove.

⁷ AMPEU no Muse vilo pi, “Pai ideiqivelo, kughengu owu timi nono Ijip lono saipeghi kemiqono axine shiauvae eno iphevae.

⁸ Panongu vilo ino pape lopi ahza tsukeu laghi qhivae; panonguye shunayizuno amshitsu lakhi shiluve no tipau mlla ghi agha kishi kumllagho tsu auvae. Panonguno pi keuno tipauno panoqo lhou, Ijip lono panoqo saipeghikeu kepi anie.

⁹ Timi hipaqoye kiutoi kuthovi cheni keno ino ithi anike.

¹⁰ Itehi noye ilakha kevilo. Niye panoqo lau axuide ani eno panoqo kutsaveniake. Tishi puzu ino opesu eno opolo kughukomi pesu ashiayeh kuloghi lakhi shitsuni.”

¹¹ Ikemu Muse no AMPEU pa Lhou vilo qhuiniju ghi pi. “AMPEU, noye kushiye owu timiqo nono akuka kumto kuloghi pesu Ijip lono xaphelukemiqo shou axu ideni kya?

¹² Kushiye Ijipmi pelo nono owu timiqo Ijip lono saipe puzu naghuto lono panoqo qhoi kutsa venike akupughu shike ipi piapeni kya? Ologhu idetsu kevilo; okukumsu kilive tsulo eno owu timiqo shou kutsa kungo keu puwutsu kevilo.

¹³ Oqemi Abraham, Isak eno Jakob kumsuchilelulo. Nono tsaqutsalei keu shoqhi panoqo lau shikeuno atsutsulo ayepu akeu jehi panoqo polo kughukomi shitsuni eno nono tsunikeu shi tushoqhi vekeu yeghi pesu panoqo polo kughukomi ghenguno alhokupuju mheghi shipe nikeu shi akeu kumsuchilelulo.”

¹⁴ Ike AMPEU no pa kukumsu kilive eno pawu timiqo shou kutsa kungo nikeu shi shikichi akeu sughimove.

¹⁵ Muse no atu pha kini putoputolo ahza yepua keu xapusu naghuto lono ideiqive.

¹⁶ Alhou ampino atu pha mlake eno ahzaqo pesu tipau qolo yepukuke.

¹⁷ Timiqono igha muku akeu Joshua no chilu kelo Muse vilo pi, “Aghazulo aghu shikeu sutsa niye chilu anie.”

¹⁸ Ikemu Muse no pi, “Tiye aghu tolukeu momu leluvekeu sutsa shiamoe; tiye alephe akeu sutsake.”

¹⁹ Kughou Muse no aghazu kupunu khoi ighi no amshitsu ithulu eno timiqono ilhe aghi keu ithuluke no paye axu ideve. Naghuto qholo tipa-a lono pano xapuche keu atu pha vekuluqhive eno kuboleve.

²⁰ Pano amshitsu khipau panoqono shipe puakeno tipau ikhi pesu ayizu kumlave, mukhumunoshi kughulhovetsu eno azu lono tipau xukutshuveno Israilmi pelo tipau zu shopeke.

²¹ Pano Aron vilo pi, “Timi hipaqoye olau kiu shive keno noye panoqo pelo axine lhoksa hikithipu shipe kya?”

²² Aron no ishi khochile, “Ilau amlo idekevilo; nono timi hipaqo ithi anike panonguye alhoksa shinishi kutu chekemiqoke.

²³ Panonguno ivilo, ‘Muse khuuno Ijip lono ningu saipeghi keno timi hupauye kishivea kela ninguye mthavae; ike nisaphe kepushi alhou lakhi mlatsulo pike.’

²⁴ Ino panoqo vilo shunayi nanu pepu aghikeu sughilo pike panonguno kuqhopesu itsukeu amilo vesu kelono amshitsu hipau ipeghive!”

²⁵ Muse no ithulu keuno Aron no timiqo kighileve aghi eno panoqo ghumi gizulo akukujopu shive peke.

²⁶ Ikehu pano aghazuqo hukikhalo puthugholuve eno ighamuku asheshu, “Khunono AMPEU kudaumi keno hilau ighivelo.” Ikelo Levi laghami qono pa suhope kumqoluve,

²⁷ tileno pano panoqo vilo pi,”Ningu lakhikhi vilo Israil Lhou AMPEU no ahza tsu anike pututa zuta pepu hipau hukikha lono lakhiu kutolo aghazulo wupuzu nothikuzumiqo noshounoqo eno nokusamiqo ghiqhilo.”

²⁸ Levimiqono aghokulu shi eno tipani timi 3000 ghiqhive.

²⁹ Muse no Levimi vilo pi, “Ishi tsalalo nonguno AMPEU kumlapu ghenguno nokuxu tsuno nonuliqo eno athikuzumiqo ghiqhike ghenguno AMPEU no pawu kukumgha nongu tsu ani.”

³⁰ Thoghiu Muse no timiqo vilo pi, “Nonguye kixikila xine shivae. Ikemu itaghi ino naghutolo AMPEU lau ikunicheni; ishiake ino nongu xine peive tsukulupu phuluveluvi.”

³¹ Muse no AMPEU lau idesu wuno pi, “Timi hipaqono kixikila xine shivae. Panonguno shunayi pesu alhou lakhi shi no tipau mlla.

³² Qeti panoqo xine peivetsulo; ikemu nono tishimo aye owu timi qo je yepuku chekeu kaku lono ije ikhivetsulo.”

³³ Tileno AMPEU no khochile pi, “Khunoqono ishou axine shikeno tipaqo jeye iwu kaku lono ino ikhive nani.

³⁴ Itehiye wulo, ino ovilo pipuakeu alo timiqo sawulo.Iwu kungumino osawu peni kepi kumsululo ikemu timi hipaqono axine shivekeu ghenguno ino panoqo ghimeqhini keu do ghuloki cheni.”

³⁵ Ikehu AMPEU no timiqo shou akusu lakhi puwu kughengu panonguno anguka shi Aron pelo shunayi mishitsu mlapeke.