IPEKULU 30 - BAIBEL (BSI)

Pitikumna kepu Kiptia

¹ “Pitikumna kepushi akasia su pesu akiptia lakhi mlalo.

² Hiye ako bidi aphiphi shilo, akushulau sentimiter lhobidi pungu eno akije lau sentimiter lhobidi pungu eno akiqhe lau sentimiter lhotoku shilo. Tipau cheku bidilo aku akeu tipau sasu ashipa lakhi shipelo.

³ Tipau kutsuqa ngo ajibo bidi kujo eno aku bidiqoye shunayi kuchou pesu kuzuvelo eno tipau vehomxa ghi shunayi pesu ashe kile sulo.

⁴ Tipau xapuwu kelo xipu kepushi shunayi bocho mlalo eno tikuma pesu ashe kile qholo hula hila medalo, tiye akhadu xisu no tipau xapuwu kepushi.

⁵ Akasia suno akhadu mulalo eno shunayi pesu tipaqo kuzuvelo.

⁶ Akiptia hipauye Puloshoqhi Bohu zulo nhaqhi phi akeu nguno khalau qhilo. Tipa-a lono ino osasu kushonike.

⁷ Inaqhe atsutsu Aron no akulu kuquniye ighi keulo paye tipaulo tsungqui keu xokutsungu piti masa.

⁸ Pano avelau akulu kuquniye ighikelo ghi tipaphi shimasa. Pitikumna pesu mllakeu hipauye kavemono pulhapujulo tishi shiche masa.

⁹ Hipau kiptialo lakha puakeu axokumna, lhoxu pesu akumllagho shikeu momu athi kumllagho kiumu pesu mlla kevilo eno hipau shou ahji pesu mllakeu leqhi kevilo.

¹⁰ Ampe lakhilo ghuthu lakhi akiptia tipau shikimthe keu shinike axine ghenguno aghashikeu jih Aron no pesu tipaulo aku bidi akeulo beghi chinilo. Hiye ampe atsu-tsu pulhapuju shimasa. Akiptia hipauye ni AMPEU lau ikhiphe tsuvekeu shi qhoi akimthe shipe masa.”

AMPEU no Achekeu Phiki Zahme

¹¹ AMPEU no Muse vilo pi,

¹² “Kughou nono Israilmi timi lhoxu kikihi shini keno milakhi khino pa kuxu ghenguno ame itsu pelo tishi anguno timi lhoxu kihi akelo pa shou kutsakungo keu ikughi pemonike.

¹³ Timi lhoxu kihi keulo sukemi kumtsuno kiu tsukepushi kihitha pua tsukeno, aqha ghenguno kihithape mighi puatsukeu qhemi pesu tsulo. Kumtsuno akumllagho lakhi toi hipau tsu masa.

¹⁴ Timi lhoxu kihi keulo suvekemi, tiye timi ampe muku nguno kichimi shive kemi kumtsuno hipau mighi puatsukeu pesu itsu masa.

¹⁵ Kughou timino panoqo kuxu ghenguno hipau tsunikeno, kinimiye tinguno alau tsumoni momu kumlhomiye tinguno akimkheu shi tsukeu shimoni.

¹⁶ Pisa hipau Israilmi launo qhalulo eno tiye ino ache keu Phikilo qhusu-lisu kepu lono peithalo. Zahme hipauye panoqo kuxu ghenguno lochile keu meke eno ino panoqo susholu nikeu kumsumamo nanike.”

Alazayi Chithakhu

¹⁷ AMPEU no Muse vilo pi,

¹⁸ “Alazayi pesu ghokepua shipuzu alazayi chithakhu lakhi mlalo. Tipau pesu Aphiki ngo akiptia kuma dolo qhilo eno tipau lo azu qhilo.

^19-20 Aron ngo pa nuliqo ye Aphiki lo ilonike zulo momu achuqupu kumllagho pesu akiptialo mllaniye kupunu wuni ke zulo azu tipau pesu panoqo pukhu qhuve eno au mutsuvelo. Tishianguno panoqo pithivemo nani.

²¹ Panonguye au mutsu eno apukhu qhuvelo tishianguno thimo nanike. Hipauye panongu eno pano laghamino alhokupujulo shiche masakeu yeh lakhike.”

Nunikeu Teli

²² AMPEU no Muse vilo pi,

²³ “Tsungquikeuta akiqheu lulo, tiye musughuta kilogram tsugho, ngoini munakeu akusa kuhu kilogram kuthu ngoyini muna keu akhoi kilogram kuthu,

²⁴ eno akasia kilogram tsugho, hipaqo kumtsu aqhalo akimighi peitha chekeu qhemi lono mighilo. Tipaqo gholo oliv teli liter bidi kuqha,

²⁵ eno tipau pesu axokutsungu teli lekite puzu akimtheshi nukepu teli mlalo.

²⁶ Tipauye hipaqo nunikeulo peithalo: ino ngochekeu Phiki, Puloshoqhi Bohu,

²⁷ akibepu ngo tipaulo bepua keu jeli kumtsu, akulu kibepu eno tipaulo akeu jeliqo, piti kumna chekeu kiptia,

²⁸ agho piti chekeu kiptia eno tipau peitha chekeu jeliqo, chukepu chithakhu eno tipau ghokepua ngo ishi.

²⁹ Hipaqo nhemghaye hipa ghola lono ikhiphe tsuvekeu shilo eno tishi aye tipaqoye qhoi mitheve nani eno timi na kiukiu pinamu anhemgha tipaqo dilu keuye tipau kimtheno panoqo shipusave nani.

³⁰ Tishi puzu Aron ngo pa nuliqo nupukulo eno panoqoye ikumla shikeu lo achinemi shipenike akimthepu shilo.

³¹ Israilmi vilo pilo, ‘Nukepu teli akimthe hipauye alhokupujulo ikumla shikeulo peitha nikeuke.

³² Hiye inapughami shou lepuku kepu kumoe eno nonguye hikithipu ghola lono kutau vehupulo ghi kitekungokeu hipau paphi lono shikepu kumoe. Hiye akimtheke eno akimtheshi hipau peitha masa.

³³ Khunono hitoi keu kimihi shi mlani momu hipau pesu achinemi nguno kutami shou peitha nikeno paye iw timi gholo kihi sumove nani.’ ”

Tsungquikeu Mukhu

³⁴ AMPEU no Muse vilo pike, “Ngoyinikeu ta hipaqo akimighi aqhemi shi lulo: stakta, onicha, galbanum, muqhamiqhikeu musughuta.

³⁵ Hipaqo peitha puzu axokutsungu teli pesu lekiteno tsungquikeu-ta mlalo. Tipau pelo muqhamiqhiyi eno akimthe shi akepu shi amti sulo.

³⁶ Tipau kitila pesu mukhumuno shi kubo puzu ino ache keu Phikilo pewulo eno Puloshoqhi Bohu lo tipau kuxu pukulo. Hipau tsungqui keu mukhuye qhoi akimtheshi qhilo.

³⁷ Nolikhi nosala khilemu hipau ghola paphi lono tsungquikeu mlakevilo. Hiye akimthe thime ikhiphepe itsuve keu kepi kumsuluvelo.

³⁸ Tsungquikeu mukhu khualano hikithipu mla napiaye iwu timiqo gholo khilemu kihi sumove nani.”