IPEKULU 26 - BAIBEL (BSI)

AMPEU no Ngokeu Phiki

¹ “Akimithe phiki, ino ngonikeu Phiki alouye tsulakibiyei keu ngo hughaikeu eno huchui keu mhi pesu phephei jukivipu shi ghokeu alla chighi pesu shilo. Tipaqolo achishibo kupu kerubim koghe aye shisulo.

² Alla tipaqoye aphiphi shi aqhemi shimasa, akushulau miter chighi kini eno akije lau miter kini.

³ Aqha lakhilo pungu amuqo shi tsughukimelo eno lakhiu ghi pungu pesu tishilo.

⁴ Amqo lakhikhilo alla ashekhauqo kichilo tsula kibiyei keu phi pesu xikepu puchope qhilo.

⁵ Atughiu muqolo xikepu pucho lhopungu sulo eno akiniu muqolo ghi ashe kumtsa puzu a-a aphiphi lono xikepu pucho lhopungu sulo.

⁶ Shunayi ihokeu lhopungu mlano ti amuqo kuma fukime pesu lakhi kughulholo.

⁷ “Ane mhi pesu aphi ghokeu alla chighi qhaqhi pesu aphiki nhakepu shi mlalo.

⁸ Tipaqo kumtsu aphiphi shi aqhemi shi mlalo, akushu lau miter chighi kuthu eno akije lau miter kini.

⁹ Amuqo lakhilo alla pungu tsughu kimelo eno lakhi muqo lono al-la tsugho tsughu kimelo Aphiki gikudau loye ti al-la akutsughouye kuqhuchhe kini shivelo.

¹⁰ Amuqo lakhi shekichilo apucho lhopungu sulo eno lakhiu lono lhopungu ishi sulo.

¹¹ Alazayi pesu fuluve kepu ihokeu lhopungu shipuzu pucho keulo fukimelo eno tikuma pesu nhakeu lakhi kughulho kepushi.

¹² Kuqhuchhe keu tachu tuxa pesu Aphiki zupou nhaqhilo.

¹³ Akushulau hula hilau sentimiter lhopungu achili akeuye Aphiki jibolo tipau nhakeu shi pufuqhini keuke.

¹⁴ “Nhakepu kutau kini mlalo, lakhino bheriyiko huchui beve keu eno lakhino ashiyiko akivi pesu shilo, tiye khalau nhaqhi kepu shilo.

¹⁵ “Akasia su pesu Aphiki kuchughilo qhikepu aghoghi mlalo.

¹⁶ Aghoghi lakhikhino akushu lau miter bidi eno akije lau semtimiter lhotsugho tsugho shilo,

¹⁷ eno tipau kutsu kichiye aphiphi shilo tishianguno aghoghi qoye kimelu kepu shilo. Aghoghi kumtsulo akichi hipaqo shimasake.

¹⁸ Apeu kudau ghenguno aghoghi muku mlalo

¹⁹ eno aqhou xapuqhe kepu kini, tiye choqhe keu kini puqheni kehu.

²⁰ Aphiki ahuu kudau ghenguno aghoghi muku shilo

²¹ eno aqhou ghoqhe kepu tsandiyi no shikeu lhobidi, aghoghi lakhi khi qholo ghoqhe kepu kini.

²² Kulolau Aphiki zupo kudau aghoghi tsugho mlalo,

²³ eno acheku ghenguno aghoghi kini shilo.

²⁴ Achekulo qhikepu aghoghi qoye aqhou kudauno kime puzu kunguu atsuqa kutolo kutshukime masake. Acheku kini lo aghoghi kini koghe huye hipa ghola lono shilo.

²⁵ Ike titoi keu aghoghi tache anani eno tsandiyino puqhe kepu shikeu chighi tsugho, aghoghi lakhi khi qholo ghoqhe kepu kini anani.

²⁶ “Piphiu hektalu kepu su akasia su pesu chighi pungu mlalo,

²⁷ aphiki jibo tuxau aghoghi akeqo ghenguno pungu eno punguno kulola, azupou aghoghi akeqo ghenguno.

²⁸ Amtalo hektalu kepu su aghoghiqo mutalo qhikeuye. Aphiki shekichi lakhi lono lakhiu kutolo chokime kepu shilo.

²⁹ Shunayi pesu aghoghiqo kuzuvelo eno shunayi abocho pesu tipaqolo sulo, tipauno hektalukeu su peqhe penike.

³⁰ Ino naghutolo opiyekeu ghola kiqi lono Aphiki shipe qhilo.

³¹ “Tsulakibiyei keu, hughai keu eno huchui keu mhi pesu aphikivi ghokeuno nhaqhiwo kepu phi mlalo. Achishibo kupu kerubim koghe tipaulo aye shisulo.

³² Tipau pesu akasia suno shikeu tsukucho bidi, shunayi no kuzukeu, pufukepu supuakeu eno tsandiyino ghoqhe kepu shikeu bidi akeulo nhaqhiwolo.

³³ Nhaqhiwo kepu phi pesu aphiki kungu kudau pufukepu ajoshi akeulo pufu wolo eno nhaqhiwo keu phi zupou Puloshoqhi Bohu, atu pha kini supuakeu pesu tile qhilo. Nhaqhi phi huno Akimthe-a ngo Shishe Akimthe-a kuma dolo kututakeu shi nani.

³⁴ Puloshoqhi Bohu lo akunha pesu nhavelo.

³⁵ Nhaqhikeu phi nguno khalau aphiki jibo ahuu kudauno akibepu qhilo eno apeu kudau no akulu kibepu qhilo.

³⁶ “Aphikilo iloche keu lalo qhinike ghenguno tsulakibei keu, hughaikeu eno huchui keu mhi pesu phephei ghokeu phi pesu nhaqhikepu shilo eno tipaulo aye shisukeu shilo.

³⁷ Nhaqhikeu phi hipau ghenguno akasia su pesu atsukucho pungu shilo, shunayino kuzuvekeu eno shunayi pufupe keu sukeu; tipaqo tsukucho ghenguno alazayi pesu ghoqhe kepu shikeu mlalo.”