IPEKULU 22 - BAIBEL (BSI)

Lochilenikeu Yezahqo

¹ “Timi lakhino amshi momu bheri lakhi puka luni eno tipau heqhive momu jeve aye paye amshi lakhi thelilo amshi pungu eno bheri lakhi thelilo bheri bidi pesu lochile masa.

^2-4 Pano kiu pukalu keno tipau lochile masa. Pano kiumu kuha aye pukaluve keu lochileni ke ghenguno pa likhi pa kugha pesu aqemi lakhi shinikeu lo jeveni. Tsala pukalukeu lhoxu amshi, gadaha momu bheri huye akuxu shi ghi pano pighi aghiaye paye lhoxu lakhi thelilo kini pesu lochileni. “Kupkami lakhino putholo aki hexu ilo cheghi kelono pa heqhive namu tipauye kuquve amoe. Ikemu puchouno tishi aghi aye paye kuquvae.

⁵ “Timi lakhino patsu aqu aluzalo atsayi lulo axabo ipeghi akeu muzave tsu aye tipau thelilo pa lulo momu pa tsayililo ipeghikeu xa pesu amheqivekeu lochilevetsu masa.

⁶ “Timi lakhino pa lulo ami shiakelo amaniteni lono qhawove puzu kutami lulo athi ipeghi akeu momu ghope kutsupua keu pitivetsu aye, ami kishiu huno kutsave keu lochileni.

⁷ “Timi lakhino kutami wu pisa momu amekusho nhemugha qhi puatsu nikeu shi pulo kuqhani eno tipaqo pa kilono pukaluveni kelo, akupkau kughalu aye, paye tipau jejehi kini pesu lochileni,

⁸ Ikemu akupkau kughamlave aye, anhemugha qhipuatsu keu mpiu huye akumlla kilo saghi masa eno tilehino paye kutamiu nhemgha pukalu tsumokepi ashoqhi shimasa.

⁹ “Tinhemgha ghenguno kutsame kile keu kumtsulo, tipaqoye amshi, gadaha, bheri aphimini momu anhemugha puhave keu kiu kiu aghi pimu, tinhemgha tipau kutsame akeu timi pamaye akumlla-alo sawulo. Timi khuu shou kuqu ani kepi Alhou no pitsuni keno pano ghuthu kini jejehi pesu lakhiu lopelo.

¹⁰ “Timi lakhino kutami wu gadaha, amshi, bheri momu lhoxu kutau kutami ghenguno pighi aghitsu nikeu shi pulo kuqhave, lhoxu thive, izave momu le ighike lono pewuve eno thopi shitsuni kemi kuhave aye,

¹¹ timi tipauye akumlla kilo wumasake eno paye kutami wu lhoxu pukalumo kepi ashoqhi shi pelo. Atsu aqu huye pukasuwumo aye tipau ampiu no amheqive keu shimasae eno kutami pelo pa lochilepe kevilo.

¹² Ikemu lhoxu hu pukasuwuve aye timi hu ampiu lochile pelo.

¹³ Tungtughano tipau heqhive aye timi hu mutsuqhei shikeu michi asaghi sughi masa eno paye tungtughano heqhivetsu keu ghenguno lochile akepu kuha.

¹⁴ “Timi lakhino kutami launo lhoxu lakhi nalu no tipau ampiu kukuha lono lhoxu ye izave momu thive aye timi tipau lochile masa.

¹⁵ Ikemu ampiu kua lono shi aye tiye lochile akepu kuhae. Kughengu lhoxu huye thive namu piqesu keu jume tsukeulo kuqhaveake.

Akikhi eno Achine Yezah

¹⁶ “Timi lakhino ilitathe, timino ini mphi kemi musu sawo shipusave aye paye kulaliu ghenguno ameh tsuno li sasu kulauve masa.

¹⁷ Ikemu li puno papelo li lupemo piaye paye ilitathe kulaliu me tsuchekeu qhemi pisa pesu lipu tsu masa.

¹⁸ “Totimi khuuno kuduu shicheni keno heqhi pithivelo.

¹⁹ “Timi khuuno lhoxu kutau sasu kughupani keno pithivelo.

²⁰ “Timi khuuno ni AMPEU nguno alhou kutau lau aghashi pesu mllani keno pa shou kughatha keu shi heqhi pithivelo.”

²¹ Inaghami peitha pusa momu nedaqoda kevilo.

²² Chimemi momu mighimgha lakhimu peitha pusa kivelo.

²³ Nonguno tishi aye panonguno kuphu lepi ighakeu lo ni, AMPEU ye panoqo tsa inivetsu nani,

²⁴ axu-ideve nani eno aghukishi lono nongu ghiqhive nani. Nongu nipuqoye chimemi shive nani eno noti anuliqoye apu kuhakemi shive nani.

²⁵ “Nonguno iwu timi kumlhomi khuu khuu laumu pisa puna aye noye pisa punachekemi toi pa pelo akighishe sughi olochile pe kevilo.

²⁶ Timi lakhi pelo olochile penike ashoqhi shikeu phikuzu nono lupaghi aye, noye tsukinhe ilove mphilono tipau pa tsu chilevelo,

²⁷ kughengu pa ghenguno luvuyi nhapu nikeu tipau likhike. Paye kutau kiu pepuno zuluni kya? Kughono pano kuphulepi ivilo ighamuku aye niye pa tsa khochilevetsu nani kughengu niye kupukinike.

²⁸ “Alhou lhoksa pikevilo eno nowu timi sakipheu musuini kevilo.

²⁹ “Nongu thi, nongu tsayi-ji eno nongu wu oliv teli itsukepu do tove keulo nonguye pesu imllalo. “Nowu anu anoghiuno itsulo.

³⁰ Nowu amshi ngo bheri piti tughiu atsuye itsulo. Atsu piti tughiu pelo paza gholo atsala tsuni apelo eno akutacheu tsalalo tipau ilau millavelo.

³¹ “Nonguye iwu timiqoke, ikehu nonguye khetsushi shi khilemu chukevilo; tishinike zuqhulo tiye atsuqo tsuvelo.”