IPEKULU 20 - BAIBEL (BSI)

Ahza Chighi

¹ Alhou no pitsuke eno hipaqoye pa tsake;

² “Niye AMPEU nongu Lhou ke, Ijip yeghilo nonguno aquaxemi shi achekeu lono ino nongu saipeghike.

³ “Nonguye inguno kutau lhouqo mllamoni.

⁴ “Nonguye atsutsulo akeu, ayeghilo akeu momu ayeghi qhou azulo akeu julho kiumu nongu ghenguno shipe qhimoni.

⁵ Kiu kiu suatu julho lau pinamu itsaiqi tsumoni momu tipau mllamoni kughengu niye nongu Lhou AMPEU ke eno isasu kusuxanikemi qhimoke. Ijumithikemi shou eno panoqo polo kughukomi akuthuu eno abidiu tiqheli kutolo ino ghimeqhi tsu cheni.

⁶ Ikemu iqhuivulayi kemi eno iyezah gholuche kemiqo shou tiqheli qhethonhe kutolo ino qhuivulayi keu piye cheni.

⁷ “Alhoksa kimiji ghenguno ije peithamoni kughengu khunono ije peitha pusani keno Ni, nongu Lhou AMPEU no ghimeqhi nanike.

⁸ “Sabat tsala ikhilulo eno tipau akimthe shi pelulo.

⁹ Atsala tsugho nonguno akumla mla itha nani,

¹⁰ ikemu atsala akutsuniye akulho kiqhi tsala ikhiphepe tsuvekeu ke. Tipa tsalaloye khuunomu akumla shimoni, no pina, otianuli pina, oqemi pina, atsu-aqu pina momu noghakhulo inaghami aghikeu pinamu akumla shimoni.

¹¹ Atsala tsugho lono Ni, AMPEU no ayeghi, atsutsu, azughi eno tipaqolo akeu kumtsu lhoke ikemu atsala akutsuniulo ino akulho qhike. Tighenguno Ni AMPEU no Sabat tsala kumghatsu eno tipau akimthe shitsuke.

¹² “Opu ngo Oza gihulo, tishianguno ino otsu akeu yeghilo noye axushulu penike.

¹³ “Noye timi ghiqhi kevilo.

¹⁴ “Noye shupu salha kevilo.

¹⁵ “Noye puka kevilo.

¹⁶ “Noye akimki lono kutami nguku kevilo.

¹⁷ “Noye kutami ki-alu jumine kevilo; momu kutami nipu, paqemi, patsu-aqu, pawu gadaha momu pawu kiu kiu aghi pinamu jumine kevilo.”

Timiqoye Msave

¹⁸ Kughou tsutsu sukeu ngo afuko ighakeu chilu eno tsutsupha ngo naghutono amchhi phokeu ithulu keno panonguye akumsano khokhoshive eno putosuu puthughope ngove.

¹⁹ Panonguno Muse vilo pi, “Nono ningu putsa aye ninguno initsuni ikemu Alhou no ningu putsa aye ninguye msake, ninguye thive nanike.”

²⁰ Muse no ishi khochile, “Msakevilo, Alhou ye nongu pejunike ghengu likhino ighi anike eno nongu pelo pa sumsa ache peniyeke tishi anguno nonguye axine shimo nanike.”

²¹ Ikemu timiqono putosuu puthugho pesu auve eno Muse likhino Alhou no khile akeno khungkusu zuchiyikeu-alo punukhoi wuke.

Akiptia Yezah

²² Israilmi vilo pipenike AMPEU no Muse vilo ishi ahza tsu; “Ni, AMPEU no kungugha kudauno kishi oputsa keno nono ithuluvae.

²³ Nonguye inguno alau kutau tsandiyi momu shunayi pesu aju lhouqo shipe qhipuzu mllanikeu shikevilo.

²⁴ Ighenguno ayeghi pesu akiptia lakhi mlape qhilo eno tipau shou piti mllakeu eno kuposhukulu shi mllakeu shinike nowu bheri ngo atsuaqu pesu agha shilo. Imlla penike a-a khipaqo ino pakutashi nongu ghenguno qhitsuni keno tipa-alo ino nongu lau ighi puzu nongu kumghatsuni.

²⁵ Nonguno ighenguno atu pesu akiptia shitsu aye tiye hetha sughikeu tuqu pesu shikevilo kughengu nonguno ayikhumu pesu atu shou peitha aye tipaqoye ino peitha nikeulo akuzupu kumovae.

²⁶ Momu ighenguno akiptia shikeulo anepa lo ikukeu tipaulo shi puku kevilo; nonguno tishi aye tipaulo pukaiku chekelo okukujopu tipau shou lhapiyeve nanike.”