IPEKULU 18 - BAIBEL (BSI)

Jethro no Muse sasu Kusholu

¹ Alhou no Muse ngo Israilmi sasu Ijip lono saipeghi kelo pano thwokha shikeu ghili kumtsu Muse pangu Mediami achineu Jethro no chilu khave.

^2-3 Ike pano Muse lau ighi eno pagholo Muse nipu Zipora eno anu Gershom ngo Eliezer pama ighi, liye Muse no qhipuaghi puzu wuveke. Muse no ishi pike, “Niye inami yeghilo inaghami shi acheke.” Ikehu pano panu lakhi je Gershom kutsuke.

⁴ Pano highi pike, “Ipu Lhou no ikuphu eno Ijip lo akukauno iheqhiveniye akeu lono ixaluke.” Ikehu pano anu lakhiu je pesu Eliezer kutsuke.

⁵ Jethro no Muse nipu ngo linu pama sasu asayeqhalo ighi tiye Muse no akimthe naghutolo ngoa keu alo.

⁶ Pano Muse vilo panongu chekeu azuuno asutsa tsupuwu,

⁷ ikehu Muse ye pa sasu kushonike ipeghi eno pa zulo itsaqi tsuno valuve. Pama lakhino lakhi vilo kiu toi akhani kela iniju kile puzu Muse phikilo ilo.

⁸ Muse no Jethro vilo AMPEU no Israilmi xapheluniye Ijip lo akukau ngo timiqo shou kiu shivekeno thwokha kumtsu pitsu. Pano panongu vilo timiqoye alalo chekelo akijiksa kiu sholukeno eno AMPEU no kishi panoqo xalukeno tipau pesu pitsuke.

⁹ Jethro no tipaqo kumtsu chilu puzu paye aloviveno pi,

¹⁰ AMPEU no Ijip lo akukau ngo timiqo launo nongu xaluke, pa sheqhelo!” AMPEU no pawu timi aquaxemi kuxu lono xaluke, pa sheqhelo!

¹¹ Itehiye ino ithiveake AMPEU ye alhou kutauqo kumtsu nguno akijeuke, kughengu Ijipmino Israilmi jumithi ghi peithapusa acheke lono pano hipau shivetsuke.”

¹² Tileno Jethro no akuchopu piti mllakeu ngo heqhi mllakeu kutau ngo ishi AMPEU mllanike sughi; Aron ngo Israilmi sakiphemi kumtsu pa gholo wupuzu mllakeu lakhi shighi akimthe libe chuke.

Xakuthami Susukeu

¹³ Tishiwo thoghiu Muse ye timiqo gholo kupunakeu vehu xathatsu ae eno paye inaqhe lono kijiliu kutolo mighimughai ake.

¹⁴ Muse no shikepu shi akeu kumtsu Jethro no ithulu puzu pano ishi iniju, “Nono timiqo ghenguno thwokha kumtsu shiakeu hiye kiu kya? Kushiye timiqo pelo inaqheno kijiliu kutolo osasu kusholu niaye puthugho anipe eno olikhino hipaqo kumtsu shi ani kya?”

¹⁵ Muse no khochile pi, “Niye hipaqo shimasaveke kughengu timiqono Alhou pulou ithinishiye ilau ighi anike.

¹⁶ Kughono mikini dolo akupuna aveaye panonguno ilau ighi cheni eno pama khuuno achipiu keno ino xathatsu cheni eno ino panoqo vilo Alhou no ahza tsukeu eno ayezah pesu pitsu chenike.”

¹⁷ Tileno Jethro no pi, “Noye achipiu lono shiamoe.

¹⁸ Noye olikhi opelo eno timiqo pelo imeve anipeke, hiye milakhi likhino shinikeu ihuloke.

¹⁹ Itehi ino akukumsu kivi hami otsuni eno Alhou pelo ogholo apenike. Alhou zulo nono timiqo zuqhu shitsukeu eno pa lau panoqo kupna sughikeu tiye achipike.

²⁰ Noye Alhou zahkutsu pe panoqo shikapiye, panonguye kishi xuakepu keno eno kiu shimasa keno ti panongu vilo pitsukepue.

²¹ Ikemu tinguno alauno, pilu shilukemi khami kishelu puzu timiqo sakiphemi shipenike susu kepue: 1000 sakiphemi, 100 sakiphemi, lhopungu sakiphemi eno chighi sakiphemi ishi. Panonguye Alhou sukumsami, pukhubekulumi eno tuqhouno kulugho chumo kemi shimasake.

²² Panoqo pelo pulhapujulo timiqo shou kughakuthami shipelo. Panonguno shimasakepu jeli olau sughilupelo ikemu akupuna kititiqoye panongu pelo xatha lupe kepue. Panonguno osasu tipau kusaje luve keuno oghenguno amakho kumthulu nani.

²³ Nono hipau shi aye, Alhou no ahza tsuketoi noye olikhi oghimemove nani eno timi hipaqo kumtsu pelo pano wu kukupuna xatha luveno akilo wolu kepu shi nanike.”

²⁴ Jethro no akukumsu tsukeu Muse no luke

²⁵ eno Israilmi gholono pilu shilukemi khami kishelu. Pano tipaqo pesu 1000 shou, lhopungu shou eno chighi shou sakiphemi shipe qhi.

²⁶ Panonguno pulhapuju timiqo shou kughakuthami shi mula cheke, akupuna mlaleyi keuye panonguno xathavetsu eno kushokutsuye Muse lau sughi acheke.

²⁷ Tithiu Muse no Jethro sasu ileno wolo pi kinive eno Jethro ye akilo idewove.