IPEKULU 17 - BAIBEL (BSI)

Atuqu lono Azu

¹ Israilmi aqo-aho kuchopu Sin sayeqha qhive, AMPEU no ahza tsukeu lono a-a lakhi lono lakhilo iqewuke. Panonguno Refidim lo ngokepu-a shike ikemu tilehi yekepu zu kuhave.

² Panonguno Muse shou muchhouve puzu pi, “Yekepushi azu nitsulo.” Muse no khochile pi, “Nonguye kushiye muchho ani kya? Kushiye AMPEU ghukeju ani kya?”

³ Ikemu timiqoye ighono tughuthive eno Muse vilo tamono muchho auve. Panonguno ishi pi, “Noye kushiye Ijip lono ningu saipeghi kya? Atughu lono ningu eno ni tianuliqo pithive niye kesha?”

⁴ Muse no amlo tsuqhiyi AMPEU lau inikhu eno pi. “Niye timi hipaqo pesu kiu shivelo pi kya?. Panonguye atu pesu iveqhiniye kuto auvae.”

⁵ AMPEU no Muse vilo pi, “Israilmi sakiphemi khami ogholo sawulo eno timiqo gizulo wulo. Nono Nayil lo hesukeu kusu pewulo.

⁶ Ino Sinai Toghilo ogizulo atu lakhi shou puthugho nani. Atuqu shou hepukulo eno tipau lono azu ipeghi nani,tiye timiqo pelo yelupe nike.” Muse no Israilmi sakiphemi gizulo titoi shike.

⁷ Tipa-a pesu Masa ngo Meriba jekuvetsu, kughengu Israilmino muchhoke eno AMPEU ghukeju ghi ishi pike, “AMPEU ye ningu gholo anikeo mokya?”

Amalikmi sasu Aghushi

⁸ Amalikmino Refidim lo ighi puzu Israilmi leighi.

⁹ Muse no Joshua vilo pike, “Timi khami kishephe puzu thoghiu Amalikmi sasu aghu shipelo. Ino atoghi kutsuqalo puthugho ghi Alhou no ivilo pechelo pikeu kusu peqhepenike.”

¹⁰ Muse no ahza tsukeu Joshua no titoi shike eno Amalikmi sasu aghu shiniye wuke eno Muse ngo Aron eno Hur pano kuthuye atoghi kutsuqalo ikue.

¹¹ Muse no pau peqhepe ake thaqhuloye Israilmino tolu ake ikemu pano pau peqhiluve aye Amalikmino toluwuveke.

¹² Ikehu kughono Muse u qeive keno Aron ngo Hur pamano papelo iqa peniye atuqu sughitsuke eno pamano pa phivilo puthugho puzu pau peqhepetsuke, tsukinhe ilovemoke kutolo tammuyi mutuqhe pesu ngoke.

¹³ Hitoi shipuzu Joshua no Amalikmi qhoi leluveke.

¹⁴ Tile AMPEU no Muse vilo pi, “Tokulu ghili hipau abo akeshi yepe qhilo, tishianguno tipau kumsulu penike. Ino Amalikmi qhoi kutsave nani kepi Joshua vilo pilo.”

¹⁵ Muse no tilehi akiptia lakhi shipeqhi eno tipauje pesu “AMPEU ye amchiphi ke.”

¹⁶ Pano ishi pi, “AMPEU wu amchiphi qhemghai peqhelo: AMPEU no Amalikmi sasu alhokupujulo aghushi ache nanike!”