EZEKEL 38 - BAIBEL (BSI)

Gog ye Alhou Zuta angu toi

¹ AMPEU no ivilopi,

² “Thinikuau timio, Magog yeghilo Meshek ngo Tubal shiayehqo shou ayehpetou shou tungkuptsa piqabelo. Pa ngukulo,

³ pa vilo ni, Akughushu MPEU ye pa ghumi kepi pilo.

⁴ Ino pa satsughu chile nani, pa mukhulo ayi kughuho pesu fuluve nani pa eno pawu ghushimi kumtsu sunhe sawu nani. Pa ghushimiye khurshi ngo tipa shou aphiphi phimini pepuno ikukemiqoye kutsasa kumzapuke eno ghushimi lakhi khino azuto pecheni eno azutakihi pepu anike.

⁵ Persia, Sudan eno Libya lono timiqoye pagholo cheni, eno kumtsuno azuto ngo ayi kutsu kuqho pu akhani.

⁶ Ahuu Gomer ngo Bet Togarma ghakhulo aghu shikithimi kumtsu pa gholo ani eno tihutoi ashiayeh kutami kutomo pa gholo ani.

⁷ Pa vilo kutope ngolulo pilo eno pano ahza tsupuzu pawu ghushimi kumtsu kutope ngolo pilo.

⁸ Ampe kutomo thiu ino ahza pa tsu puzu aghakhu lakhi lewupe nani. Tipau ghakhulo timiqoye ashiayeh kutamiqo launo kumqo saghi puzu aghukishi musamono xuache keqoke. Pano Israil naghuto leighi nani tipaqoye ado kushuwa piyighive eno kughukughaleive ke, ikemu itehi timiqoye tilehi sushokulu shi kughunaluve ake.

⁹ Pa eno pawu aghushimiqo eno pa gholo ashiayeh kutami kutomo akeqono pasapagha toi leighi nani eno khungkusu lakhi toi ayeghi nhaluve nani.”

¹⁰ Akughushu MPEU no Gog vilo piakeuye hike: “Kughono tipau ghuloki ighini keno noye amqu lhoksa kumsulu ipeghive nani.

¹¹ Noye akukuphu kuhamithe keu ghakhu lenikeu shi xatha nani. Tipau ghakhulo timiqoye iquighai eno kupunakeu kuhano eno mujochileni keu kuhakeu eno putukhamokeu taunqolo kughuna achenike.

¹² Aphughi puzuuye ixapinyi acheke itehiye timi kughunauve kemiqo shou nono haleqhi eno anhemghaqo xulepuwuve nani. Tipaqolo kughuna akemiqoye ashiayehqo launo kumqo saghike eno itehi panonguye pichepighi eno tinhemgha pighi anike eno ayeghiqhalo kathaiqho iqikeu lalo kughuna acheni.

¹³ Sheba ngo Dedan lo akemiqo eno Spein taunqolo alhikishimino ovilo iniju nani, ‘Noye haleqhi eno xulepuwuve nike ghenguno oghushimiqo hekutsu kumqo kesha? Noye shunayi ngo tsandiyi, pichepighi eno tinhemgha luniye tishi kesha? Tipaqo kumtsu xapukishe wuniye shikesha?’ ”

¹⁴ Ike Akughushu MPEU no Gog vilo kiu piani keno tipau pipe niye ipuwu no pike: “Kughou iwu timi Israilmi no sushokulu shi xuani keno, noye o-a ahuu alakushuwa lono

¹⁵ chesu ipe nani eno ashiayeh kutomo launo ghushimi aghushimi akuka-kumto saphe sasuwu nani, tipaqo kumtsu khurshi shouno ikupuzu wu nani.

¹⁶ Pasapagha lakhino ayeghi shou itha ighikeu toi nono iwu timi Israilmi leighi nani. Kughono ado toveni keno, ino opelo iyeghi lewupeniye puwu nani,tiye ashiayehqo pelo niye khuu keno piyeni kehue eno ikimthe piyenike.

¹⁷ Ado kushuwa lono ino piachekeu huye noke, tiye ino iqemi, Israil lo tungkupmi vechewo ino pipuzu Israil lepenikeu picheke.” Akughushu MPEU no piveake.

Alhou no Gog Ghimeqhi

¹⁸ Akughushu MPEU no pike, “Kughono Gog no Israil lenikeno tipa tsalalo niye muqhumuzaive nani.

¹⁹ Ino iloghu kighide lono piphetsu anike, tipa tsalalo Israil lo ayeghi kughutha kutsasa ipeghi nani.

²⁰ Ayeghilo ashi, aghau, akha jeli kije na kitila namu eno timi lhoxu kumtsu imusa kelauno khokhoshive nani. Naghutoqono ikiqive nani, atuxuqono ipopinyive nani eno putukeu tupikiye kumtsu ilaiqive nani.

²¹ Ino avekusa jeli thwokha lono Gog shikighime qhini. Ni, Akughushu MPEU no pivae. Pawu timiqoye lakhino lakhi ghiqhi chilewukhave nani.

²² Ino kusukini ngo ghiqhikile keu pesu pa ghimeqhi nani. Pa eno pawu aghushimi eno ashiayeh kumzapu pa kudau shi akemiqo shou tsuqhu tsughukeu ngo apughu eno tipa gholo ami ngo amichu lepukutsu nani.

²³ Hipa ghola shipuzu ashiayeh kumtsu lau niye kije eno niye akimthe kepi ino piye nani. Panonguno niye AMPEU kepi tileno ithi nani.”