EZEKEL 32 - BAIBEL (BSI)

Ijip Kukau Akhangushupe Kimighi

¹ Ni haphe puwuvekeu mipe chighi akiniulo aqhi chighi akiniu atsala atughiulo AMPEU no iputsano ivilo pike,

² “Thinikuau timio, Ijip kukau lau iquighaikeu sutsa lakhi pesu kutughulo. Isutsa hipau pesu pa tsulo: Noye ashiayehqo gholo abongushu toi mla itha ani ikemu noye tinguno alau akhangushuno aghokilo azu hele akeu toike. Opukhu pesu azu puqove ani eno aghokiye qunniyi ani.

³ Kughou ashiayeh kutomo kumqoni keno, ino ikhame lono omeluve nani eno tipaqo pelo amkulo osunhepheve pe nani.

⁴ Ino ayeghilo ovepheve nani eno ayeghiqhalo aghau ngo tughashiqo saghino ochuvepe nani.

⁵ Okithi kumo kumna pesu ino naghuto ngo akhila vechighivepe nani.

⁶ Ino oji pesu naghutoqo nhakha eno aghokiti shepichhi moke kutolo peleqhi nani.

⁷ Kughou ino okutsani keno ino khungkusu nhaluve eno ayepuqo kuzuphove nani. Tsukinheye khungkusu thiu itshuluve nani eno aqhino akuvu tsumove nani.

⁸ Atsutsulo akuvu akeu kumtsu ino pinhevetsu nani eno oyeghiye zumoikeulo zamemeivepe nani. Ni, Akughushu MPEU no pivae.

⁹ “Okutsaleve keu sutsa pesu nono khilemu chimla aphikeu ghakhulo ino kulha keulo ashiayeh kutomono amlo kupunave nani.

¹⁰ Ino oshou kiu shikeno tipauno ashiayeh kutomo shithughuive nani. Kughou ino izutakihi kuloni keno, kukamiqoye akumsano khokhoshive nani. Nono ikiqive keu tsalalo panongu kumtsu pano kuxu ghenguno musano khokhoshi nani.”

¹¹ Akughushu MPEU no Ijip kukau vilo piani, “Noye Babilon kukau shi azutakihi sasu kusho nani.

¹² Ino ayikusa shiayehqo ghushimi pelo pano zuta sujo pesu nowu timi kumtsu pithivepe nani. Nowu timi kumtsu eno nonguno jupe qheza achekeu jeli kumtsu kutsaleve nani.

¹³ Azupuki kumtsulo nowu atsu aqu akeqo ino kutsave nani. Timi pina lhoxu pinamu azu puqo kitheni kemi kuhavepe nani.

¹⁴ Ino nongu wu azuqo bukughutha pemove nani eno tsughukhuivepe nani eno nowu aghokiqo pelo qummuyi qowupe nani. Ni Akughushu MPEU no pivae.

¹⁵ Kughou ino Ijip pesu kughukughalei xalevetsuni eno tile akeqo kumtsu kutsaveni keno, panonguno niye AMPEU kepi ithi nani.

¹⁶ Hi iquighaikeu tsa kutughuakeu huno akithilo le lakhi shive nani. Ashiayeh kutauqolo totimino Ijip eno tile achekemiqo shou mloqah hipau le phe nani. Ni, Akughushu MPEU no pivae.”

Kithimi Yeghiqha

¹⁷ Ni haphe puwuvekeu mipe chighi akiniu aqhi atughiu tsala chighi apungu shiakelo AMPEU no ivilo pi,

¹⁸ “Thinikuau timio, Ijip lo timi kumzapu ghenguno mlo qahlo. Ashiayeh kumtomi kutamiqo gholono panongu ghi kithimi yeghiqhalo piqilo.

¹⁹ Panoqo vilo pilo: ‘Nonguye kutami nguno ajukiviu Kepi nonguye kumsu ani kesha? Nonguye kithimi yeghiqhalo iqi nanike, kixikilami gholo ihozulo.’

²⁰ “Ijip lo akemiqoye aghukishilo khunoqo thive keno tipaqo gholo ikiqi nani. Azutakihino panoqo kumtsu pithive nike kutope ani.

²¹ Aghutomi kijemi eno khunoqono Ijip laumi shipuzu aghushi chekeqono kithimi yeghiqhalo Ijipmi salu ani. Panonguno ighae: ‘Kixikilami aghukishi lono thivekeqoye hilau iqighivae eno panonguye hilau ihozu anie!’

²² “Asiriya ye tilau ani, liwu ghushimiqo kumo-a aqha kumtsulo ani.

²³ Panongu kumtsu aghushi lono pithiveke, eno panoqo kumoa ye kithimi yeghiqha akuthou qhalo anike eno panoqo kumo-a no li kumo-a vehope ani. Ikeghi, ghuthu lakhiye panonguno kuxumi yeghilo akeqo shithughui cheke.

²⁴ “Elam ye tilau ani, liwu ghushimiqo kumo-a ye aqha kumtsulo ani. Panongu kumtsu aghushi lono thiveke, eno panonguye aphighu yiko ghamono kithimi yeghiqhalo iqike. Xuakelo panonguno pughuqhikeu vechhoke ikemu itehi panonguye thive puzu kujomza kepushi ihozu ani.

²⁵ Elam ye aghushi lono thivekemiqo gholo ihozu ani eno liwu ghushimiqo kumo-a no li sumxa pesu ani. Panongu kumtsu aphighu yiko ghamoke, kumtsu aghushi lono pithiveke. Xu akelo panonguno pughuqhi keu vechhoke, ikemu itehi panonguye thive puzu kujomza kepushi ihozu ani eno aghushi lono thivekemiqo ngukusa kusaje ani.

²⁶ “Meshek ngo Tubal ye tilau ani, panowu ghushimiqo kumo-a aqha kumtsulo ani. Panongu kumtsu aphighu yiko ghamoke, kumtsu aghushi lono thiveke. Ikeghi ghuthu lakhiye panonguno kuxumi shikumsa cheke.

²⁷ Panonguye kha-ghi aghutomi kumo qhokeulo agigihu tsukeu toi panoqo tsumoe; tipaqoye aghunanu qhoi pepipeno kithimi yeghiqhalo wuke, panongu zutakihi pesu akutsu qholo qhitsu eno panongu zuto pesu aphimpi shou qhitsuke. Aghutomi hipaqoye ghuthu lakhiye akuka kumtoshi kuxumi shikumsa kulupu shicheke.

²⁸ “Ijipmi tikithipushi aphighu yiko ghamokemi aghushi lono thivekemiqo gholo itapinyi ihozu nanike.

²⁹ “Edom ye tilau ani, li kukami ngo li shou ayehkipemi sasu anike. Panonguye akuka kumto ghushimike ikemu itehi panonguye kithimi yeghiqhalo aphighu yiko ghamokemi aghushi lono thivekemiqo gholo ihozu anike.

³⁰ “Ahuu kukapumi kumtsu tilau ani, eno tihutoi Sidonmi ghi ani. Ghuthu lakhiye panoqo kuka kumtono shithughui cheke ikemu itehiye panonguye aghushi lono thivekeqo sasu kujomza kepushi iqivae eno inaqhoi ihozuvae, aphighuyiko ghamoke. Panonguye kithimi yeghiqhalo iqikemiqo kukujopu kusajeke.

³¹ “Aghushi lono khunoqo pithivekeno tipaqo ithulu keu huno Ijip kukau ngo pawu ghushimiqo lokughunopu shi nani,” ipi Akughushu MPEU no pike.

³² “Ino Ijip kukau pelo kuxumiqo shithughui peke, ikemu pa eno pawu aghushimi kumtsu pithive nanike eno aphighu yiko ghamokemi aghushi lono thivekeqo sasu ihozu ngove penanike.” Akughushu MPEU no pivae.