EZEKEL 31 - BAIBEL (BSI)

Ijip pe Kedar Kimighi

¹ Ningu haphepuwuve keu mipe chighi aqhaqhiulo aqhi akuthuu atsala atughiulo AMPEU no ivilo pi,

² “Thinikuau timio, Ijip kukau ngo pawu timiqo vilo pilo: Noye kiutoi akuka kumto kela! Niye okugha pesu kiu sasu kimighini kya?

³ Noye Libanon lo Kedarsubo lakhi toike, jukivipu, tubolei akeu loka toike. Chuqumughai keu subo kehu khungkusu toni keshike.

⁴ Tipau thuwulu penike tilehi azu ake, ayeghiqhou ghokino tipau pulhu cheni. Asubono thuwu akeu-alo tipaqono azu sutsu acheni, Aghasulo asubo kumtsu lau aghokiti puwu cheni.

⁵ Tiye azu akivishi sukehu, tino asubo kutau nguno chuqumughaike. Tipau lokaqoye kije kushuwo shi sukhowove.

⁶ Aghau jelino tipau lokaqolo apusu pesu; Tipau sukusho qholo tughashi qono ati pitike; Tipau kicheqholo ayeghilo ashiayeh qono akulho qhike.

⁷ Asuboye kiutoi jukighilepu kela! Shishe chuqumghai, alokano kushuwoke. Tipau kuhuno alou qowu akeu ghokiti ilo toluke.

⁸ Alhou ghutulo akeu kedarsubo lakhimu tipau sasu kimighimla. Asahusubo lakhimu aloka tikithipu kuha, Aphisubo lakhimu titoi miniphoi keu kuhae. Alhou ghutulo asubo lakhimu titoi jukivi kuhae.

⁹ Tipauno aloka sukho pesu jukighilepu shi ino mlake. Tiye Alhou ghutu, Eden lo asubo kumtsuno jumineqhiyi cheke.

¹⁰ “Tishiaye, itehi ni, Akughushu MPEU no ti asubo khipau thu-iku khungkusu toakeu lau kiu shiveni cheni keno ino ovilo pini. Tipauno chuqumughai thu-iku kelo tiye qhezauve;

¹¹ ikehu ino tipau lumoveke eno inaghami ayehkipemi lakhi pelo tipau luvepe. Tipau subono kixikila lhoksa ghenguno ithulu kepushi akeu qhemi ayehkipemino pa tsu nani.

¹² Akuighupu inaghamino tipau yeqhipe qhive nani. Tipau loka ngo anipa phoqo ye aghakhulo atoghi eno akhila kumtsu shou iluqi iku nani. Ashiayeh khijehi tipau kicheqholo achekeno wukhave nani.

¹³ Aghauqono ighi puzu iluqivekeu subolo yeiku nani eno tughashi qono tipau lokaqo shou iqho iqi nani.

¹⁴ Ikehu hinguno hilauye, kiu papushi azu suanamu asubo lakhimu tipau tohi thu-ikumo nani, momu tipau ketsughono khungkusu cholukeu shipuzu qhemghai keu shimla nani. Panongu kumtsu thinikuau timiqo toi thinikeu hakusapu ani, kithimi yeghilo akemi gholo kumtsa acheuve nike iqinikeu hakusapu shivae.”

¹⁵ Akughushu MPEU no kiu piani keno hike: “Asubono kithimi yeghiqhalo iqike tsalalo, mulo qakeu michi shi ino ayeghiqhou azu akeu pelo tipau nhaluvepe nani. Ino aghoki tsuquchilepe ngove nani eno aghokiti kutomo qoipe pemo nani. Asuboye thiveake ghenguno Libanon Naghutoqo shou ino zumoikeu sughi nani eno aghasulo asuboqo kumtsu thizumyivepe nani.

¹⁶ Kughou ino kithimi yeghiqhalo tipau piqiveni keno tipau iluqikeu sutsano ashiayehqo sukughutha nani. Eden lo asuboqo eno Libanon lo kishekiphe, azu akivishi suchekeu subo khipaqo aqhou yeghiqhalo wuvea keno tipaqono asubo tipau iluqighi keulo amlo kiqishive nani.

¹⁷ Panonguno tipau sasu kutami khunoqomi ikiqive akeno tipaqo gholo kumtsaluvenike kithimi yeghiqhalo wu nani. Khunoqomi tipau yekukhu qholo ache keno ashiayehqo gholo hale puwuve nani.”

¹⁸ “Asubo huye Ijip kukau ngo pawu timiqoke. Eden lo asuboqo namu titoi chuqumghai eno kije kumoe. Ikemu itehiye Eden suboqo toi tiye kithimi yeghiqhalo iqive nani eno mithemokemi ngo aghukishi lono thivekeqo gholo kumtsa acheuvenike. Ino piveake,” ipi Akughushu MPEU no pi.