EZEKEL 28 - BAIBEL (BSI)

Tur Kukau lau Tungkuptsa

¹ AMPEU no ivilopi,

² “Thinikuau timio, Tur lo ayehkipeu vilo ni, Akughushu MPEU no pa vilo kiu pianikeno tipau pesu pilo: Aqhekuzashi tsutsungojuve puzu noye alhou lakhi kepi piwuveke. Nono pikeuno noye alhou lakhi toi azughino vehopesu akuka lakhulo iqa. Noye alhou lakhi kepi tipau kishishi shiaghiluvi, ikemu noye thinikuami kethono alhou kumoe.

³ Noye Danel nguno alokutsuu eno kiumu olauno tuqhou qhipuave mlakepi nono kumsuke.

⁴ Olokutsu eno nono shitsa shikeuno shuna ngo tsandi kinikuluno opelo kinimi shilupeke.

⁵ Nono amqukini shi alhikishi peitha eno ala kighishelu acheni. Noye okinikulu jupe kiutoi qheza ani kela!

⁶ “Tighenguno ni, Akughushu MPEU no kiu piani keno tiye hike: Nono noye alhou lakhi toi alokutsu kepi kumsu anike ghengu,

⁷ ino aghumi ayikusami saghi puzu ole nanike. Nono olokutsu eno oshitsa lono jukivipu thime hekutsu pesu puakeu kumtsu panonguno kutsave tsu nani.

⁸ Panonguno opithive nani eno anixoxolo akumo-alo opuwuve nani.

⁹ Kughou panonguno oghiqhiveniye ighi kelo noye tikutolo alhou lakhi kepi nani keniake? Oghiqhikemi sasu kusholu kelo noye akithi shive nani eno alhou ipikeu tsa kuhave nani.

¹⁰ Noye Alhou mthakemi inaghami ulo atsuqu lakhi toi thive nani. Ni Akughushu MPEU no ahza tsuvae.”

Tur Kukau Ikiqive

¹¹ AMPEU no itaghi ivilo pi,

¹² “Thinikuau timio, Tur kukau shou kiu shiveniye kutope ani keno tipau ghenguno amlo sa-alo. Pa vilo ni, Akughushu MPEU no kiu piani keno pesu pilo: Ghuthu lakhilo noye kupukulai keulo kichekipiye lakhi shiacheke. Noye kiutoi alokutsu eno jukivipushi acheke la!

¹³ Noye Alhou ghutu Eden lo xuacheke eno akughupu tu jeli nicheke: rubi, hira, topaz, beril, karnelia jesper, safir, emeral eno garnet. Noye shunayino shikeu achila acheke. Tipaqoye olhoke tsala lono oghenguno mlape qhike.

¹⁴ Ino akuighupu kungumi lakhi okhepe nike qhitsuke. Noye iwu akimthe toghilo xuacheke eno phuphuyikeu tu gholo iqhoiqicheke.

¹⁵ Olhoke tsala lono nono alhoksa shimoke tsala kutolo owu ghushoghiliye kupukulai aloke.

¹⁶ Noye mighimghai qhu ache eno je acheke eno tipauno omusupe heqhi buqhi eno axinelo sawuveke. Ike ino tsuikhomo iwu akimthe toghi lono opuwuve eno kungumi okhe achekeu huno phuphuyikeu tu gholono ohapupove.

¹⁷ Noye ajukivi kepi qheza cheuve eno ojekipino opelo mubomzumi toi mulaithauve peke. Highenguno ino ayeghilo okughape veqhi eno kukami kutamiqo shipiyeniaye okughape tishi qhiveke.

¹⁸ Nono qhu keu eno je keulo alhoksa alomokeu shikeu lono okumlla-a kumtsu shipusaveke. Ikehu ino aphughilo ami suvetsuke eno ayeghilo piti daqhiveke. Itehi oju kemi kumtsuno noye ayevu kughulhovekeu ithuluke.

¹⁹ Noye chevae, alhokupuju chevae eno ashiayeh oghili chilukemi kumtsuno musa thughui vae, panonguye oshou kishive keno tipau sholu nikeu musa auvae.”

Sidon shou Tungkuptsa

²⁰ AMPEU no ivilo pike,

²¹ “Thinikuau timio, Sidon phughi kudau ogi kughopuwono tungkuptsa pipukulo.

²² Tilehi timi akeqo vilo ni, Akughushu MPEU no panoqo ghili kiu piani keno tipau pesu pilo: Niye oghumike, Sidon ino olau kiu shikeno tipau ghenguno timino isheqhe nani. Niye AMPEU kepi panonguno ithi nani, tiye kughono ino ogholo kughuna akemiqo ghimeqhini keno tileno niye kiutoi akimthe keno piye nani.

²³ Ino oshou kusukini puwu nani eno olaghilaqolo ahji qowupe nani. Noye aqha kumtsu lono ole ighive nani eno ow timiqoye pithive nani. Tileno niye AMPEU kepi nonguno ithi nani.”

Israil Kumghatsuni

²⁴ AMPEU no pike, “Acheaxulo ashiayeh kutami akeqo khunoqono Israil thaigha acheni keno tipaqoye itehiye khilemu koghesahu eno ashuyesahu toi itaghi Israil qhuqhimove nani. Panonguno niye Akughushu MPEU kepi ithi nani.”

²⁵ Akughushu MPEU no pike, “Ino ashiayeh kutami khunoqo gholo Israil kuthole puwuve keno tipaqo launo Israilmi sachile saghi nani, ashiayeh kumtsuno niye akimthe kepi ithi nani. Israilmiye pano ghakhulo xucheuve nani, tiye ino iqeu Jakob tsukeu ghakhuke.

²⁶ Panonguno kiumu kupunamono xulu nani. Panonguno aki shisu eno atsayilu chisu nani. Pano cheaxulo kuami khunoqono panoqo thaigha chekeno ino tipaqo ghimeqhi nani, Israil ye sukusho qholo anani. Tileno niye panoqo Lhou AMPEU kepi panonguno ithi nani.”