EZEKEL 27 - BAIBEL (BSI)

Tur ghenguno Akithilo le

¹ AMPEU no ivilo pike,

² “Thinikuau timio, Tur ghenguno akithilo le lakhi phelo,

³ ti azughi mukulo ngono azughi kumxalo kughuna achekemi sasu kilhishi achekeu phughi ghenguno phelo. Akughushu MPEU no kiu piani keno tipau li vilo pilo: Tur, noye ojukivi akighiche jupe qheza cheni.

⁴ Okiye azughike. Oshiqhe pukukemino noye zukilu jukivi toi mlatsuke;

⁵ Panonguno Hermon toghilo milisubo pesu alpa mlake Libanon lo Kedar subo pesu okhetsukucho shike.

⁶ Panonguno ashukalisa shinike Bashan lo aphisu akeu peithake; Cyprus lo asahusu pesu aghuza shi- tsuke eno akuhahu pesu medapukuke.

⁷ Amlhuno fusawu kepu phiye phepheyikeu phino shike, Ijip lono ayeh shipukukeu phike, putosuu ghi pai michi lukeuke. Onhasukeu aphi aghileno shike, Cyprus zudoyeghi lono sughi keu hughai phike.

⁸ Owu ashuka lisa kipemiye Sidon ngo Arvad phughi laumike. Nowu ashuka sakichemiqoye shitsamike.

⁹ Zukilulo asu kiyiqimiqoye Biblo lono akivishi qophevekemi ke. Azughilo ashuka sakichemi kumtsu o-a lono onhemgha kuqhu kili shike.

¹⁰ “Persia, Lidiya eno Libya lo ghushimino nowu aghushimi shi acheni. Panonguno nowu ghushimiqo kilo panowu azuto ngo ayikutsuqho pufuqhike. Timi hipaqono oghenguno ajekipi qesughi tsuke.

¹¹ Arvad lo ghushimino nowu putukeu atupikiye lo aghukhe shicheni, Gamad lo timino nowu aghukhe qoghe khecheni. Panonguno nowu akuptu tupikiyelo pano zuto pufuqhi cheni. Panonguye okughape jukivipu shitsu chekemiqoke.

¹² “Nono Spein lo kuqhukili shike eno onhemgha kupukunoshi akeu me tsukeu nono tsandiyi, tinyi, ayi eno akusayi lutsuke.

¹³ Nono Grik qhalo, Tubal ngo Meshek qhalo kuqhukili shike no nhemgha pesu aquaxemi ghenguno eno alazayi nhemgha kuqhukili shike.

¹⁴ Nono onhemghaqo pesu anhemgha pukishe nikeu khurshi, ghushi khurshi, eno Beth Togarma lono ipeghikeu gadaha qo qhuluve che.

¹⁵ Rhodes lo kuamino osasu kilhishike; azughi sukumxalo akeu ghakhulo akemi kutomono onhemghaqo kusukidi keulo akuhahu ngo asu kimishi pesu otsuke.

¹⁶ Siriya lo kuamino onhemgha ngo nono mlaphekeu kutomo qhuluveke. Panonguno onhemgha ghenguno Emeral tu, aphi hughaikeu, ayeh shisukeu phi, phepheyikeu phikivi, korel ngo achiku ishi pesu otsuchileke.

¹⁷ Juda ngo Israil ghi onhemghaqo me ashothi, akhi ngozu, oliv teli, eno vepujumukhu pesu otsuke.

¹⁸ Damaska lo akemiqono olhi-nhemgha ngo nono mlaphekeu qhulukeulo Helbon lo tsayiji ngo Sahar lo mhi kimiye pesu otsuke.

¹⁹ Panonguno onhemghaqo thelilo ayino shikeu jeli eno vepujumukhu otsuke.

²⁰ Dedan lo kuamiqono onhemghaqo thelilo qha iqa kepu phi otsuke.

²¹ Arabmi ngo Kedar ghakhulo ayehkipemino olhinhemgha me bheriti, bheri eno ane otsuke.

²² Olhi nhemgha thelilo Sheba ngo Rama lo alhikishimino akughupu chi, shuna eno vepujumukhu akiviu pesu otsuke.

²³ Haran, Kanne, Eden phughiqo ngo Sheba lo alhikishimi, Ashur ngo Khimad phughiqo kumtsuno osasu kilhishi cheke.

²⁴ Panonguno ovilo aphimini akiviu, hughaikeu phi, ayeh shisukeu, aghuzalo qhakeu phi phuphuikeu, akighi kipili eno akichhe kighi ovilo jesutsuke.

²⁵ Olhi nhemghaqoye akho kupu zukilu aqo akuloghiu qono xapuwu cheke. Noye azughilo zukilu lakhino Akho kimishino chhitoi puchekeu toike.

²⁶ Kughou nowu ashuka lisa kipemi no azughilo osaghi keno, ayeghi launo putosuu akelo kipela mulhuno oshipusave.

²⁷ Olhi nhemgha okinikuluqo kumtsu, Owu zukilu kusami kumtsu, Oshukakilo asu kiyiqimi eno olhikishimi, Zukilulo kichemi ghushimi kumtsu, Ozukilu shipusave keulo tipano- qo kumtsu azughi lono puhakhave.

²⁸ Zukilu sakichemi putsuqhiake miqo ghugha amuku kudau vekuvavake.”

²⁹ “Zukilu kumtsu phekhavae, eno zukilu sakichemi amuku kudau wuvae,

³⁰ Panongu kumtsu oghengu shishe muloqake, pano kutsulo amukhu vepuku eno ayevulo ihike.

³¹ Panonguno oghenguno akutsusa miyeve eno yeqhiye phi pepuluve. Panonguye amlo kughuta shi qake.

³² Panonguno oghenguno akithile mijeke: ‘Khuuno Tur sasu kimighikulupu kya? Itehi Tur ye azughilo inaqhoi ani.

³³ Kughou olhikishimino azughi kacheuve keno, Ashiayeh kumtsuno avehupu shi akeu nono sutsuluke. Onhemgha kinikulushi akeu pesu kukamiqo kinikulu shipeke.

³⁴ Itehi noye azughi lono shipusavae; Noye azughi kutho lo ikiqi ilovae. Onhemgha ngo oghenguno mla chekemiqo, kumtsu ogholo azughi lono hauvae.’

³⁵ “Azughi sukumxalo kughuna achekemi kumtsuno noye kishive keno ithulupe apuchopungovae. Panoqo kukami ghi musa thughuivae eno panongu kumtsu akumsa gi xapu auvae.

³⁶ Noye chevae, alhokupuju chevae eno ayeghiqha kumtsulo alhokupuju chevae eno ayeghiqha kumtsulo alhikishimiqoye musa thughuivae eno panonguye oshou kishive keno tipau sholunikeu musa auvae.”