EZEKEL 24 - BAIBEL (BSI)

Tsapuha akeu Li

¹ Ningu haphe puwuvekeu mpe atokuulo aqhi achighiu atsala achighini AMPEU no ivilo pi.

² “Thinikuau timio, ishiye kiu tsala keno tipau yepesu qhilo kughengu hipa tsalanino Babilon kukauno Jerusalem khasu pesu lekeu huthu anike.

³ Ihekibidemi iw timiqo vilo ni, Akughushu MPEU no panoqo ghenguno kimighi piyekeu tsa hipau akeu pesu pilo: Ami shou ali pepukulo eno azu pesu tipaulo lesulo.

⁴ Ashi leqhi akiviu pesu tipaulo sulo, abi eno aluko shi sulo, eno aghi kivi ghi kidepesu tile sulo.

⁵ Bheri akiviu shi peithalo; ali qholo asu sughulo. Azu muqhokide pelo; aghi ngo ashi lholo.”

⁶ Akughushu MPEU no kiu piani keno tiye hipauke: “Ghiqhikichemi phughiye ahasapuke! Hiye ali tsapuha akeu toi tiye kitilamu kusumono anike. Ashi leqhi lakhikhino ikhipheve eno lakhimu qhimove.

⁷ Aphughilo ghiqhi heqhikeu anike ikemu tipaqo jiye ayeghi shou iji ikumoe, tiye ayeghi mukhulo daluveno ithumlaveni cheke; tiye atuqu thoqhaleikeu shou lepukuke.

⁸ Ajiye tilehi ino tishi anipeke, tipau kusuvemla kepu alo, aloghu ide amkhu lukepushi tipauno khuanike.”

⁹ Akughushu MPEU no kiu piani keno tiye hipauke: “Ghiqhikichemi phughiye ahasapuke! Ni ampino amusu sukutsusupe kumqo nani.

¹⁰ Asu alau sughilo! Ami fuqhilo! Ashi lholo! Akulhozu kishi puhavelo! Aghiqo pitilevelo!

¹¹ Itehiye alazayili kumsa akeu pesu amibalu shou pepukulo eno tipau pelo huchuyi shukuthuive pelo.

¹² Tsapuha akeu ami mililo qhoi hauve keu shimo namu tipau pitileve kethiuno aliye itaghi achineyehlo muqhamiqhiyi kithelu kepu shi nani.

¹³ Jerusalem, okimthekumo kumlaqono oshipixivae. Ino pukaputsa othakimtheju akemu noye kitiqe pesu auvae. Noye iloghu kighide muqhamiqhiyi keu shimlano anani.

¹⁴ Ni, Akughushu MPEU no pivae. Ino chhosu masakeu ghuloki ighivae. Niye oxineqo palokutovemo nani momu kimiyekeu eno kupukeu piyemo nani. Nono mula puakeu ghenguno oghimeqhive nani.” Akughushu MPEU no pivae.

Tungkupuu nipu Kithi

¹⁵ AMPEU no ivilopi,

¹⁶ “Thinikuau timio, ino kihe lakhi lono nono kimiyekutu chekeu ikhisuwuve nani. Noye muchho kevi momu qakevi momu anhezu piji kevilo.

¹⁷ Okuqa chilupe kevilo. Muloqakeu michipu shi apukhu kumsa, akutsusa nhapumono iqho iqikeu shikevilo. Ogi nhapu kevi momu muloqakemi no chuchekeu chuqupu chukevilo.”

¹⁸ Tipa tsalani inaqhe niye timiqo sasu kuptsa ake. Tipaji inipu thive ike thanau ivilo pipe puakeu toi ino tishi shike.

¹⁹ Timiqono ivilo iniju, “Noye kushiye hikithipushi shiani kya?”

²⁰ Ike ino panoqo vilo pi, “AMPEU no iputsa puzu ivilo

²¹ nongu Israilmi lau atsape hipau tsulo pike: Nonguye Achineki kumto jupesu qheza anie. Nonguno tipaulo jupuku anishi cheni eno tipau xujuwu anishi cheni, ikemu AMPEU no tipau shipixive tsuni cheni; eno nobolomi lhothemi Jerusalem lo qhivekeqo huye aghukishi lono pithive nani.

²² Tileno nonguye ino kiu shiveakeno tipau shi nani; nonguye nongu gi kuzupumo nani momu muloqakemino chuchekeu chuqupu chumo nani.

²³ Nonguye akutsusa miyemo momu apukhu kumsa iqhoiqimo nani momu igha mulo qamo nani. Nonguye nongu xine ghengu lono ijunayive nani eno lakhino lakhi lau sukutu igha nani.

²⁴ Tileno niye nongu ghenguno amichipu lakhi shive nani; nonguye ino shivekeu kumtsu shi nanike. AMPEU no pike kughono hipau shini keno paye Akughushu MPEU kepi nonguno ithi nani.”

²⁵ AMPEU no pi, “No Thinikuau timio, tipa tsala lono panonguno jupesu qheza eno alovi achekeu, khikhi panonguno juanishi acheni eno tipau xujuwu acheni keno, akumto chineki tipau ino panoqo launo ikhisuwuve nani. Ino pano tianuliqo ikhisuwuve tsu nani.

²⁶ Ino hipau shike tsalalo timi khami kutsakungokeu lono pokawulu kemino ighi puzu nongu vilo tipau pinanike.

²⁷ Tipa tsalanino nonguye atsa pilu kepu kuka khipau nonguno puhave keno tipau ithuluchile nani eno nonguno pa sasu kuputsa nani. Hipau ghola lono noye timiqo lau amchipu lakhi shive nani eno niye AMPEU kepi panonguno ithi nani.”