EZEKEL 20 - BAIBEL (BSI)

Alhou Pulou Timino Mujochile

¹ Ni hale pupove keu ampe akutsuniu aqhi apunguu eno atsala achighiu shiakelo Israilmi sakiphemi khamino isasu AMPEU pulou ghili ithikileniye ighino igi zulo iqae.

² Tile AMPEU no ivilo pike,

³ “Thinikuau timio, timi hipaqo putsalo eno panongu vilo Akughushu MPEU no ishi pikeu pitsulo: Nonguye ipulou inijunike ighiani kema? Kuchouno niye xuakeu Lhou ke niye nongu pelo ivilo kiumu inijupemo nanike. Ni Akughushu MPEU no pivae.

⁴ “Thinikuau timio, noye panoqo shou xakutha shiniye ani kema? Tishiaye tishilo. Panoqo vilo panoqo puasuno kuchhube kutsula kiu shiche keno tipau pesu piputolo.

⁵ Ino kiu piani keno tipau panoqo vilo pilo. Kughou ino Israil kishelu keno ino panoqo lau tushokiqhi lakhi shike. Ijip lo akelo ino panoqo lau ni ampino pephepiye eno panoqo vilo pike: Niye nongu Lhou AMPEU ke.

⁶ Tithiuno ino Ijip lono panoqo saipeghini keu eno panoqo sasu ino kishepua keu yeghi, kinikulu eno aghumakua yeghi, ayeghi kumtsu nguno akiviulo sawunikeu tushoqhike.

⁷ Ino panoqo vilo panonguno kupu achekeu kuchhube kutsula su-atu julhoqo peive eno Ijipmi kichileu lhouqo pesu panoqo shipixi kevilo pike, kughengu niye AMPEU panoqo Lhou ke.

⁸ Ikemu panonguno ihebideke eno itsa initsumoe. Panonguye panowu kuchhube kutsula su-atu julho peivemoe momu Ijipmi lhouqo phevemoke. Ijip lono panoqo pelo iloghu kighide kumgha pupeniye kutoveke.

⁹ Ikemu niye tipau tishimoveke ino tishive keaye ije kusapu shiveni cheke kughengu panonguno timi khunoqo gholo xuache keno tipaqo zulono ino Israil vilo niye Ijip lono panoqo sasu ipeveni cheni kepi asheshuveke.

¹⁰ “Ike ino Ijip lono panoqo sasu timi kughunamo ke-alo wuve.

¹¹ Ino ahza pesu panoqo tsuke eno iyezahqo panongu shikake, khunono tipau papelu cheni keno akuxupu sughitsu cheni.

¹² Ningu dolo xatha lukeu michi Sabat pinye ikhilu penikeu shi ino shitsuke, tiye ni AMPEU no panoqo pesu akimthe shikeu panoqo pelo kumsu chilelu apeniyeke.

¹³ Ikemu timi kughuna moke-alo ghi panonguno ihebideke. Panonguno iyezah kuboleve eno ino ahza tsukeu khunono tipaqo pelu nikeno akuxupu sughi chekeu panonguno milive. Panonguno Sabat pinye shipixi khavetsu. Timi kughuna moke-alo ino panoqo pelo iloghu kighide kumgha pupeniye kutove eno panoqo kutsaveni keu shive.

¹⁴ Ikemu niye tipau shimoveke, tishiveke aye ino Ijip lono Israilmi sasu ipechekelo tipau ithulu puakeqo shiayehqo gholo ije kusapu sughiveni cheke.

¹⁵ Ike timi kughuna moke-alo ino tushokiqhi lakhi shive keuno ino panoqo tsuvekeu yeghi, kuakini eno aghuma yeghi, kumtsu nguno akiviu yeghilo niye panongu sawumoni keu shike.

¹⁶ Ino tushokiqhi shiveke kughengu panonguno ino ahza tsukeu milive, iyezah kuboleve eno Sabat pinye shipixiveke; panongu mloye pano su-atu julho mllani keulo aukhaveke.

¹⁷ “Ikemu niye panoqo jupe amlo ighiqhive, eno timi kughuna moke-alo panoqo kutsalevemo nikeu momu panoqo pughavemo nikeu ino kughathave.

¹⁸ Ike timi kughuna moke-alo ino pano tianuliqo vilo pikeuno: nongu puasuqono ayezah mlakeu pekevilo; panoqo khuayeh pape kevilo momu pano su-atu julho pesu nongu kitiqe kevilo.

¹⁹ Niye AMPEU nongu Lhou ke. Iyezah ngo ino ahza tsukeu pelulo.

²⁰ Sabat pinye akimthe tsala lakhi shilo tishianguno tipauno puloshoqhi ninguno shipuakeu michipu lakhi shipe nike eno tipauno niye nongu Lhou AMPEU kepi nongu piputolu nani.

²¹ “Ikemu tipano tiqhelimiqo ghi ihebideveke. Panonguno iyezah kuboleve eno ino ahza tsukeu pemoveke, khunono tipau peluni keno akuxupu sughi cheni kelauye tipau pemoke. Panonguno Sabat pinye shipixivetsu. Timi kughuna moke-alo niye panoqo pelo iloghu kighide kumgha pupeniye eno panoqo kumtsu pithive nikeu kutoveke.

²² Ikemu niye tipau shimove, tishive ke aye ino Ijip lono Israilmi saipeghi kelo tipau ithulu puakeqo shiayehqo gholo ije kusapu sughiveni cheke.

²³ Ike timi kughuna moke-alo ino tushokiqhi kutau lakhi shike. Ino tushoqhive keuno niye panoqo kumtsu ayeghiqha kumtsu kutholeve nikeu shive.

²⁴ Ino hipau shike kughengu panonguno ino ahza tsukeu milivetsu, iyezah kuboleve tsu, Sabat pinye shipixive tsuke eno pano puasuqono asu-atu julho qechekeu panongu ghi tipau mllauveke.

²⁵ “Tithiuye, ayezah vimo keu eno akuxupu sughi chemokeu zah kutsu pesu ino panoqo tsuke.

²⁶ Ino panoqo pelo pano kumllagho pesu panoqo kitiqevepe eno ino panoqo pelo anu anoghiuqo heqhi mllapeke. Hiye panoqo ghimeqhiniye ke eno niye AMPEU kepi panongu piyeniyeke.

²⁷ “Itehiye, O thinikuau timio, Israilmi vilo ni Akughushu MPEU no kiu piani keno panoqo vilo pilo. Pano puasuqono pano mikuchokumo lono ithaighakeu kutau highi shipuanike.

²⁸ Ino panoqo tsuniye tushoqhive keu yeghilo ino panoqo saghike. Ikelaye, kughou panonguno atoghi qhemghai keu eno asu minipho ithulu keno panonguno tipaqo kumtsu-alo heqhipe mllaukhave. Panonguno lhoxu heqhipe pitikeu eno akumllagho atsayiji peighikeu huno ipelo aloghu idevepeke.

²⁹ Ino panoqo vilo inijuke. Nonguno atoghi qhemghai keu-alo wuchekeuye kiu kya? Ikehu tinguno tipathiuye Qhemghai keu-a ipi kuvetsuke.

³⁰ Tighenguno Israilmi vilo ni, Akughushu MPEU no kiu piani keno tipau pilo: Kushiye nongu papuqono shichekeu xine nonguye shiani eno panoqo su-atu julho papesu hacheni kya?

³¹ Ishi tsala kutolo nonguye puzuu akumllagho atho pesu mlla cheni eno amilo nongu tianuli heqhipe puzuu tho asu-atu julho mllakeu lono nongu kitiqeve anike. Tishive keghi nongu Israilmiye ipulouye kiu keno inijuniye ighi cheni kesha! Kuchouno, ni Akughushu MPEU ye xuakeu Lhou ke, niye nongu pelo ivilo kiumu khu pemo nanike.

³² Nonguye ashiayeh kutami paphi shinishive keu nonguno kumsu auvae, ti ayeghi kutau xuakemino asubo ngo atuqu mllache keu toi shinishi auvae. Ikemu tiye khilemu shilupemo nanike.

Alhou no Ghime eno Axine Peivetsu

³³ “Kuchouno niye Akughushu MPEU, xuakeu Lhou ke ino nongu piputovetsu anike iloghu kighide lono ino i-u kumto, ikuka kumtsu pesu ino nongu shou ayehpe nanike.

³⁴ Ino ikuka eno iloghu kighide nongu piye nani, tiye aghakhu khilehi nongu kuthole puwuve keno tilauno ino nongu xukumqono nongu sachile saghi keu lono piye nani.

³⁵ ‘Ashiayehqo Sayeqhalo’ ino nongu sailoghi nani eno tilauno nongu gi thepesu nongu ghushove nani.

³⁶ Ino Sinai Sayeqhalo nongu papunoqo ghushove keshi itehino ino nongu ghusho nani,” ipi Akughushu MPEU no pianike.

³⁷ “Ino nongu ghasukeu kusu qholo ngope nani eno nongu pelo iwu puloshoqhi gholupe nani.

³⁸ Ino nongu gholo khunoqono aghekulu kumomi keno eno axine shi acheni keno tipaqo ikhive nani. Panoqono itehi khipa-alo ani keno tipau yeghi lono ino ikhive nani ikemu niye panoqo pelo Israil yeghilo idewo pemo nani. Tileno niye AMPEU kepi nonguno ithi nani.”

³⁹ Akughushu MPEU no pi, “Itehiye nongu Israilmiye nolikhi nongu pulou shialo! Pututa su-atu julho qewuvelo! Ikemu ino nongu kutughuve anike tipathiu nonguye igholumasa kepu shi nani eno nowu asu-atu julho lau akumllagho tsukeu lono ije kusapu shichekeu tavekepu shi nani.

⁴⁰ Aghakhulo, iwu akimthe naghuto, ti Israil lo naghuto akuchuquulo nongu Israilmi kumtsu no imlla nani. Niye nongu lau ilokiqi anani eno nongu launo lhoxu heqhi mllakeu, nowu akumllagho akiviu eno nowu akimthe gho ilau sughipe nike laju anani.

⁴¹ Khilehi nongu kuthole puwuve keno tipa ghakhuqo lono ino nongu saipeghive kethiu eno nongu hekutsukumqove kethiuno nonguno heqhi pitipe mllakeu ino ikhilutsu nani, eno kutami shiayehqono niye akimthe kepi ithulu nani.

⁴² Ino nopuasuqo tsunikeushi tushoqhivekeu Israil ghakhulo kughou ino nongu saideghini keno tileno niye AMPEU kepi nonguno ithi nani.

⁴³ Tithiuno nonguno kujomza kepu jeli khije shichekeno eno kishi nolikhi nokitiqeve chekeno nonguno kumsu chilelu nani. Nonguno alhoksa jeli kumtsu shikeu ghenguno nolikhi nongu jupesu niqhunilai keu shive nani.

⁴⁴ Kughou ijekipi sushonike ino mlani keno, nongu Israilmino niye AMPEU kepi ithi nani, kughengu niye nongu kumla lhoksa kugha qhemi lono nongu peithamoke.” Akughushu MPEU no pivae.

Apeu Ami Ipeghi

⁴⁵ AMPEU no ivilopi,

⁴⁶ “Thinikuau timio, apeu kudau timio, apeu jupiqilo. Apeu shou pipukulo eno apeu ghasu shou tungkuptsa pipukulo.

⁴⁷ Apeu akeu ghasu vilo Akughushu MPEU no kiu piani keno tipau pesu pilo: Julo! Ino ami lakhi shi ani eno tipauno okudau asubo khije ani keno kumtsu pitileve nani, akuxu na akithi subo shiaghi pinamu, khunomu tipau ghapinhe mla nanike. Tipauye apeu ahuu kudau qhawo nani eno thwokha kumtsuno amimili shukuthui keu ithi nani.

⁴⁸ Panongu kumtsuno ni AMPEU no tipaulo ami sukepi ithulu nani eno milakhi nomu tipau ghapinhe mla nani.”

⁴⁹ Tileno ino ighachile pike, “Akughushu MPEU, kumtsuno ino kepi anie! Kumtsuno muchho akeuno ino pulhapuju aholeuno piani kepi piakhanike.”