EZEKEL 14 - BAIBEL (BSI)

Ajulho shou Alhou no Kughatha

¹ Israilmi sakiphemi khamino AMPEU pulou ithinike isasu kushokileluke.

² Tileno AMPEU no iputsa puzu pi,

³ “Thinikuau timio, timi hipaqoye asu-atu julho lau panoqo mlo tsuvae eno tino axinelo panoqo sawuvepe cheni. Niye khokichile panoqo tsu nani kepi panonguye kumsu ani kesha?

⁴ “Tighenguno panoqo putsalo eno ni, Akughushu MPEU no panoqo lau kiu piani keno pesu panoqo vilo pilo: Israilmi khuuno asu-atu julho kudau pa mlo tsuve puzu tipaqo pelo axinelo pa sailove peni keno tithiu tungkupu sasu kusholuniye ighini keno ilauno khokichile ithulu nani, tiye pa su-atu julho kutomo akeqono ithu lukuzupu qhemi khokichile tsu nani!

⁵ Asu-atu julho hupaqono Israilmi pelo ilauno tsughusu wuvepeke ikemu iwu khokichile pesu panongu pelo iqhoqhupe nike niye laju ani.

⁶ “Tighenguno itehiye Israilmi vilo ni Aqokitikhi MPEU no kiu piani keno tipau pesu pilo: Idechile ighivelo eno no kuchhube kutsula su-atu julho phevelo.

⁷ “Kughokughomu Israilmi lakhi momu inaghami Israilmi qo-aho gholo xuachekemi lakhino ilauno tsughusu wuve puzu asu-atu julho mllani eno tishi puzu tungkupu sasu kushokileni keno, ni AMPEU no khokichile pa tsu nani!

⁸ Ino timi tipau kutotsu nanike, ino pa kughape kichekipiye eno kughakichepu lakhi shitsu nani. Iwu timi qo-aho gholono pa ikhive nani tishianguno niye AMPEU kepi nonguno ithi nani.

⁹ “Tungkupu lakhi pishiqhive puzu pano khokichile kichileu tsuaye tiye ni AMPEU no pa pishiqhive kehue. Ino Tungkupu tipau Israilmi gholono ikhive nani.

¹⁰ Tungkupu ngo pa sasu kushokileniye ighikeu timi kinikujo aphiphishi aghime ithulu nani.

¹¹ Ino hipau shinikeuye Israilmi pelo iqhive pemoniyeke eno pano likhi pano xineno panoqo shipixi pemo peniyeke. Panonguye iwu timi shi akepuke eno ino panoqo Lhou shia nanike.” Akughushu MPEU no pivae.

Noha, Danel eno Job

¹² AMPEU no iputsa,

¹³ “Thinikuau timio, aghakhu lakhino axine shive puzu ilau amikucho shimove aye, ino iu chhopuwu puzu tipaulo achuqupu sughichekeu laghi shipusavetsu nani. Ino puqumiye keu puwu puzu timi ghi pichepighi ghi pithive nanike.

¹⁴ Noha ngo Danel eno Job pano kuthuno tilehi xuaghi namu panonguno akivipu shikeuye pano kuxu likhi xaluve nani.” Akughushu MPEU no pivae.

¹⁵ “Momu ino tughashi puwu puzu timiqo pithive peluvike eno ayeghi pelo ighono akuighupu shive puzu milakhimu tipau kathasu kicheghuzu shimlavepe nani.

¹⁶ Timi hupano kuthuno tilehi xuaghi namu kuchouno ni Akughushu MPEU ye xuachekeu Lhou ke, panonguye pano tianuli namu xamla kepu shi nani. Panonguye pano kuxu xalukeu likhi shi nani eno ayeghiye kughukughalei keu lakhi shive nani.

¹⁷ “Momu ino aghukishi tipa ghakhu shou sughiluvi eno kutsalevekeu ghunanu puwu puzu timi ghi pichepighi ghi puhakhave peluvike.

¹⁸ Timi hupano kuthu tilehi xuaghi namu, kuchouno ni Akughushu MPEU ye xuachekeu Lhou ke ghenguno panonguye pano tianuli namu xamla kepu shi nani, ikemu pano kuxu xalukeu likhi shi nani.

¹⁹ “Momu ino kitixe kusu tipau ghakhulo puwuni kelo eno iloghu lono lhoxu kutomo kuxu luvetsuni, timi ghi pichepighi ghi;

²⁰ eno Noha ngo Danel eno Job pano kuthu tilehi xuaghi namu, kuchouno ni Akughushu MPEU ye xuachekeu Lhou ke, panonguye pano tianuli namu xamla nani. Panonguno akivipu shichekeu huye pano kuxu xalukeu likhi shi nani.”

²¹ Akughushu MPEU no piakeuye hike: “Ino iwu aghimepu akusa akusau bidi pesu Jerusalem shou puwuni chenike, tiye aghukishi, puqumiyekeu, tughashi eno kusukini timi ashi-aghau aphiphishi kutsave peniyeke.

²² Timi khualano xuaghi puzu pati anuli puxupe aghi aye panonguno nongu lau ighikelo tipaqo shou jupukujulo panonguye kiutoi alhoksa kela julo eno tipau lono ino Jerusalem shou aghimepu sughikeu huye achipi kepi mutsumishei ithilo;

²³ eno ino mlakeu thwokha kumtsulo akiqi akivi akeu ghenguno kepi nonguno ithi nani.” Akughushu MPEU no pivae.