Ephesiami 5 - BAIBEL (BSI)

Akuvulo Xukeu

¹ Tighenguno nonguye Alhou no kimiyechekemi nuli kehu nonguye Alhou kimihi shilo.

² Khristo no ningu kimiyeno axokutsungu kumllagho eno Alhou lopushi tsungquyikeu kumllagho eno lhoxu pesu akumllagho lakhi ningu ghenguno pa kuxu pephetsuveke toi nonguye kimiyekeu lono xulo.

³ Nonguye Alhou wu timiqo shivea kehu, shupu salha, mithekumo jeli momu alakiminepe khilemu nongu shou pipukupe kepu kumoe.

⁴ Tike kumono, alhoksa tsa, ghapha ghale tsa eno mithemokeu tsaye nongu ghenguno akuzupu kumoe. Tishinike zuqhulo shikimthikeu Alhou tsukepue.

⁵ Mutsuqheyino hi ithilo: shupu salhakemi momu mithekumomi eno alakiminemiye Khristo ngo Alhou kukaqhalo amheghi ithumla nani, kughengu alakimineye alhoayeh julho kumllami ke.

⁶ Hipaqo vehu inapugha pichekemi pelo nongu pishiqhive pekevilo, kughengu hipaqo thime ghenguno Alhou loghuye hebidekemi shou ikughi cheni.

⁷ Tighenguno titoikemi timi sasu kukusu kevilo,

⁸ kughengu ghuthu lakhiye nonguye akuzulo acheke, ikemu Ampeu wu timi shive akehu nonguye akuvulo akemi toi chechelo.

⁹ Kughengu akuvulo chechekeu lono akivipu, achipiu eno kuchou ipeghilupe cheni.

¹⁰ Ampeu lopu shinikeu pukaputsano shikalulo.

¹¹ Akuzulo athi pithimokemi kumlaqolo chhosu kevilo, tishinike zuqhulo tipaqo pesu akuvulo saipeghilo.

¹² Panonguno kusuuno shichekeqo ghili pinikeu ghi akukujopuke.

¹³ Kughono thwokha akuvulo saipeghini keno tiye kiukeno ithuluve cheni,

¹⁴ eno kiu kiu namu ithuluvepe aye akuvu shiluve cheni. Tighenguno ishi pipuanike, “Ithuvelo, O zuakeu Kithimi gholono ithughivelo, Eno Khristo no oshou yepuvu tsu nani.”

¹⁵ Tishiaye nonguye kishi xuacheni keno jukutokugholo. Kiumu mthakemi toi xukepu kumoe ikemu alokutsumi shi xulo.

¹⁶ Itodoloye ado lhoksa shianike ghenguno ado ithukulu kumtsu akivishi peithalo.

¹⁷ Tighenguno mbomuzumi shi akevilo ikemu Ampeu no nongu pelo kiu shipenishi anikeno ithikutolulo.

¹⁸ Aji shomzu kevilo, kughengu tiye oshipusa nanike; ikemu Aghungu Kimthe pesu nongu hupitelulo.

¹⁹ Lakhino lakhi vilo leshele, eno alejo aghungulo le phelo; nongu mlo kuchopu tsupuzu Ampeu lau leshele ngo lejole phelo.

²⁰ Thwokha thime ghenguno ningu Mipeu Jisu Khristo jelono Apu Alhou lau pulhapuju shikimthi tsulo.

Anipu ngo Akimi

²¹ Khristo sumsakeu ghenguno nongu lakhino lakhi qhoqhu kilelo.

²² Anipunoqo, Ampeu lau toi nongu kimiqo qhoqhulo.

²³ Khristo no akukuhou shou atou shi aketoi akimi lakhiye pa nipu shou atou ke; eno Khristo no akukuhou, pa phimpi xakuluuke.

²⁴ Tighenguno akukuhouno Khristo qhoqhu ketoi anipuqo ghi thwokhalo panongu kimi qhoqhumasae.

²⁵ Akimiqo Khristo no akukuhou kimiye puzu li ghenguno pa kuxu tsuve ketoi nongu nipu kimiyelo.

²⁶ Khristo no hipau shikeuye pa tsa pesu azu toi akukuhou qhuve puzu akimthe shipesu Alhou lau tsuniyeke,

²⁷ tishianguno Khristo no akukuhou pelo tukutiye eno jekujeli kuhano jukighilepushi tsughukhuyi eno akimtheshi pa lau saluniyeke.

²⁸ Tipaphishi akimiqoye panongu phimpi toi panongu nipu kimiyekepue. Timi khuno pa nipu kimiye chenikeno pa likhi pa kimiye anike.

²⁹ Kughengu timi khumu pa likhi pa phimpi mithi chemoe, ikemu Khristo no akukuhou tucho mujo ketoi paye pa phimpi loji eno tuchomujo kepue,

³⁰ kughengu ninguye Khristo phi a-uqoke.

³¹ “Hi ghenguno, timino pa pu-aza qhiveno pa nipu sasu kughuna kimepe auve cheni, eno pamaye aphi-ashi lakhi shiwuve cheni.”

³² Tuqhou tsa hipauye kuchou kije lakhike eno hile Khristo ngo akukuhou kuma ghenguno kepi ino ithitoi ani.

³³ Tishimu, nonguno pututa alikhi akimiyeke toi pututa nipu kimiyelo, eno anipuno li kimi sumsa chelo.