Ephesiami 4 - BAIBEL (BSI)

Aphimpi Kuqhape akeu

¹ Tishiaye, ni Paul, Ampeu ghenguno akughumi shi achekeuno nongu qhuiniju anike, Alhou no kiu qhemilo nongu kuluve akeno tipaulo akuzupushi xulo.

² Akumtsha kughuvu shilo, ivunhei xulo, pulhapuju kutuo kutuulo, lakhino lakhi lau kusuqhikulu lono kikimiye piyelo.

³ Aghungu no alokiqipu pesu nongu tsughakuqhano kuqhakulu nongu tsukeu hu amlo tsuqhiyi pewonikeu pukaputsalo.

⁴ Alhou no lajupu lakhilo nongu kuluve ketoi aphimpi lakhi eno Aghungu lakhi likhi anike.

⁵ Ampeu lakhi, akupulupu lakhi, baptiz shikepu lakhi likhi,

⁶ Alhou lakhino ningu kumtsu pa Puh ke, pano kumtsu shou Ampeu, kumtsu lau mla ani eno kumtsulo ani.

⁷ Ikemu Khristo wu kumsagho qhemi lono ningu lakhikhi lau Alhou kupukini tsuke.

⁸ Tighenguno ishi pike, “Kughou pano kunguu iku keno akughumi kutomo pa gholo sawuke, Pano kumsagho timiqo tsue.”

⁹ “Pano kunguu iku” ipi pikeu kiqiye pano ayeghi qhou iqi paghike.

¹⁰ Ike khuno aqhou iqighi keno kunguu ikuvekeu ghi pake, pano kungugha hechesu ikuveke, tighenguno pano a-a kumtsulo aniyeke.

¹¹ Pano kumsagho tsukeuye khamino apostolmi, khamino Tungkupmi, khamino tsavipemi khamino Pastormi, khamino Shikukami shipeniyeke.

¹² Tishikeu lono Khristo phimpi shiqhe apeniye Alhou no akumlami sukusu shipe qhitsuke.

¹³ Tiye ningu kumtsu akupululo tekhoilu, Alhou Nu ithikutolu eno Khristo ye khuu keno pa ghili ithi kupu lumoke kutolo mla apeniyeke.

¹⁴ Tishianguno ninguye itimi toi izuichoi pemo eno pishikiqhimi kukutsu jelino ningu fusasu wuvepemo nani, timi hipaqono muqu mugha vesuno kutami ghi akumou lalo sawuve chenike.

¹⁵ Ikemu kikimiye lono kuchou pini keloye Khristo khuu akutsu keno alaghi kumtsulo pa sasu thuwu akepue.

¹⁶ Pa launo aphimpi kuchopu kimepe eno tsughakuqha pesu ani eno anhu tsupuakeu huno aphimpi kuchopu kimelu anipeke. Kughou aphiau lakhi khilo kiu shikepu keno shiaghiaye kimiyekeu vechewo aphimpi kuchopu thuwulu cheni eno xaqhepukulu cheni.

Akuxu Aqau eno Akitheu

¹⁷ Tishiaye, Ampeu je lono ino hipau piani eno hi pikithe ani: nonguye khilemu Alhou kuhakemi toi xukevilo; panongu kukumsu abokumsake,

¹⁸ panongu kukumsuye akuzulo ani. Kughengu panonguye ayekumthami eno amlo kumkamike ghenguno Alhou no tsukeu kuxu lono tusumike.

¹⁹ Panonguye akukujo kuhamithe eno kusakugha shinike pano likhi pano pephetsuve cheni, eno jukusapu shinikeu kiumu suchilekeu kuhano aghukha shi acheni.

²⁰ Ikemu nonguye Khristo ghili tishi shikaluke kumoe.

²¹ Nonguye pa ghili chiluvea putsake eno nonguye pano kutsuluvekemi ke Jisu launo kuchou kiu akeno tipau nongu shikavae.

²² Tighenguno nonguye puzuu kuxu ghola pishikiqhi eno shikupsa lhoayeh aqau qhivelo.

²³ Nongu kukumsu ngugha kumtsu kilikitheve masae,

²⁴ nonguye alhoaye akitheu pepuve masae, hiye Alhou kimihi lono lhokeu kuchou kudauno ighikeu, amikucho eno akimthe lono shipepiye cheni.

²⁵ Tighenguno akimkitsa pikevilo. Milakhikhino pa kusau vilo kuchou tsa pilo, kughengu ninguye kumtsu aphimpi lakhilo anike.

²⁶ Axuide kepushive namu tipau pelo axinelo osailove pekevilo, eno atsala kupuju axuide auvekevilo,

²⁷ eno adokivi tughami tsu kevilo.

²⁸ Timi pukaqhi chekemiye hinguno hilauye puka kevilo, ikemu pa phiau peithano akikhishi mlano qechulo, tishino kumlhomi kuphukulupu shilo.

²⁹ Shipusakile kepu tsa nongu kichi lono piphe kevilo, ikemu pikuzupu eno xaqhekulupu akivi likhi pilo, tishianguno otsa iniakemi pelo kumghakeu ithulupenike.

³⁰ Alhou Ghungu Kimthe Shikulosu kevilo, kughengu xakulu Tsalalo nonguye pawu kepi aghungu nongu shou amichishipe qhivae.

³¹ Kuqhu mo,aloghu, amlo kighide, muqhumuza eno thaighakeu jeli kumtsu pevelo.

³² Eno lakhino lakhi kimiyekile, amlo ighiqhiyi eno kuzakuzuyi shilo, eno Khristo gholo Alhou no nongu kipimi pevetsu ketoi nongu lakhino lakhi kipimi pevetsukilelo.