Ephesiami 3 - BAIBEL (BSI)

Paul no Judakumomi lau Mla

¹ Akiqi hipau akeu ghenguno, ni Paul ye nongu Judakumomi ghenguno Khristo Jisu kughushi achekemi lakhi ke.

² Nongu kivipu shipenike Alhou no pawu kupukini itsukeu nonguye chiluve aghiniake,

³ ike ino yevekeu toi tuqhou kukughu achekeu hu ilau pephepiye ke.

⁴ Ino kiu yeveakeno tipau nonguno phiju aye, Khristo wu tuqhou kukughu ino jupililu akeu nonguno ithikutolu nani.

⁵ Wovekeu tiqhelimiqo lauye tuqhou kukughu hipau pimono acheke, ikemu itehiye Aghungu vechewo Alhou no pawu apostolmi akimthemi eno pawu tungkupmi lau tipau pephepiyevae.

⁶ Tuqhou kukughuye hike: atsakiviu vechewo Judakumomino Judami gholo amheghi kiyighimi, kumtsa aphimpilo kihikusumi eno Khristo Jisu gholono Alhou no piqhi puakeulo kusajekemi ke.

⁷ Alhou no pa kuka ivechewo mla akeuno pawu kupukini gho lono ipelo atsakiviu lokijimi lakhi shilupeke.

⁸ Niye Alhou timiqo gholo kumtsu nguno aku amighiu ke, ikeghi Khristo gholo kihikhamlakeu kini akeu Judakumomi vilo atsakiviu pikulha penike Alhou wu kupukini itsuke,

⁹ Alhou wu tuqhou kukughu kishi shiwoni cheni keno timi kumtsu pelo ithulupe niyeke. Thwokha lhotsukeu Lhou no wovekeu tiqhelimi kumtsu launo pawu tuqhou huye kusupe puacheke,

¹⁰ tishianguno akukuho vechewo itehiye kungulo yekipemi ngo kungulo kukaqo pelono Alhou suqhe kighithi jeli kumtsu ithipeniyeke.

¹¹ Hiye pano lhokta lono mijipe puachekeu ningu Mpeu Jisu Khristo lono mutsuqheyi shilupeke.

¹² Pa gholo kimepe akeu lono eno pa lau ningu kupulu akeu lono ninguno amlo kuloghi xapusu Alhou zulo vejoi ilolukepushi anie.

¹³ Tishiaye, ino nongu ghenguno aghime shiakeulo nonguye amlo kusa shikevilopi nongu qhuiniju ani, hiye nongu vehupu ghenguno ke.

Khristo Kimiyekini

¹⁴ Akiqi hitoikeu akeu ghenguno niye Apu zulo qhoqhunhe cheni.

¹⁵ Kungughalo na ayeghilo namu pa launo pututa muqono aje kuchou ithulu chekeu ke.

¹⁶ Ike nongu lolo akeu ampi mutotoi penike, pa kimthe jukuvu kinikulushi akeu pesu pa Ghungu no akuka nongu tsupenike ino Alhou vilo khu ani,

¹⁷ akupulu vechewo Khristo pelo nongu mlolo pa kungoa shilupeni. Nonguye kimiyekinino nongu boqha shilu eno kimiyekini kuhu qusulu penike,

¹⁸ tishianguno nonguno Alhou wu timiqo gholono Khristo kimiyekini akije akushu lau, akiqhe lau eno akutho lau kiukeno ithikutolu kepu kuka apenike.

¹⁹ Khristo kimiyekinino akighithi jeli kumtsu veche iku akeu nonguno ithipenike, tishianguno Alhou kupukulu kumtsu pesu nongu pelo chhitoilu penike.

²⁰ Itehiye khuno pa kuka khipau nilolo peitha anikeno tipau vechewo ninguno khukeu momu kumsulukeu nguno shishe alaushi mlatsu chekeu lau,

²¹ akukuholo eno Khristo Jisu gholono, tiqheli lakhi lono lakhiu kutolo alhokupuju ghenguno, Alhou lau akimthe jekipi shipelo! Amen.