Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Ephesiami 2 - BAIBEL (BSI)


Akithi lono Akuxu Shilu

1 Nonguye axine eno pimikeulo acheke lono pano nongu puxu tsuke.

2 Tipa ghulokilo nonguye ayeghiqhalo kusakugha laghi papeche; eno amulhulo aghahwu kukaqo jeli shou ayehpeu hu papeche, tiye Alhou gholumokemi qhasupe achekeu ghahwu huke.

3 Ghuthu lakhiye ningu kumtsu timi tipaqo toi ningu shi-aji pulouno minheqhikeu xapusu xucheke eno ningu phimpi akukumsuno minechekeu papecheke, ikehu timi kutamiqo toi ninguye alhoaye lono Alhou loghu sholukemi shicheke.

4 Ikemu Alhou kikimiye ye shishe kije kehu

5 ninguno pimichekeulo thi acheke lono Khristo gholo akuxupu akeu kudau pano ningu sasu ighiluke, Alhou wu kupukinino nongu xaluveake.

6 Khristo Jisu gholo xukimepe akeu lono ninguye pa gholo xuputhuve eno kungughalo ningu pelo pa gholo iqapeke.

7 Pano tipau shikeuye Khristo Jisu gholono pawu kupukini kutomo ningu lau kimiyekeu lono piyeniyeke.

8 Kughengu Alhou wu kupukinino akupulu vechewo ningu xaluvae; eno hiye nonguno shiluke kumoe ikemu hiye Alhou no aghotsukeuke.

9 Hipaulo timi khumu qheza kepu kuhae kughengu akumla lono kumoke.

10 Ninguye Alhou ghenguno mlakuqha chekeqoke, eno Khristo Jisu gholono akumla kivi shipeniye pano ningu lhoqhike, ningu pelo tipaqo shipeniye Alhou no puzuuno kutope qhiveke.


Khristo lono Lakhi

11 Tighenguno nongu aji lono Judakumomi shiaghikeqo, aphimpilo achineyeh michi shipuake ghenguno, Judami aphighuyiko ghathakemino nongu pesu “aphighuyiko ghamokemi” ipi kuchekeqo, nonguye puzuuye kiutoi achekeno kumsululo.

12 Tipa ghulokilo nonguye Khristo launo kututashipe acheke. Nonguye inami shi ache, Alhou no kishelukeu Israilmi laumi kumoke, eno Alhou no pawu timi lau piqhikeu puloshoqhi shikeu launo tusumi shiache, eno hipa yeghiqhalo lajupu kuha eno Alhou kuhano acheke.

13 Ikemu itehiye Khristo Jisu gholo xukimepe akeu vechewo nongu khunoqomi putosupe achekeno Khristo no aji pele thivekeu lono punukhoi sasu ighivae.

14 Kughengu Khristo ye ningu sasu alashikutsuuke, pano ningu Judami ngo Judakumomi pesu lakhi shivetsuae eno pa phimpi pesu kothakile aghumi shi achekeu tozuhu hephovetsuke.

15 Pano Judami yezahlo shilo pikeu yeh eno kithikiyi yeh jeli kumtsu lakhavetsuke, tishikeu lono pa gholo kimepe akeu vechewo ashiayeh muqo kini pesu timi akithe muqo lakhi lhotsuniyeke, tishi puzu alashitsuke.

16 Pano Kros lo thikeu vechewo kimthikile chekeu shipuhavetsu niye eno ningu timi aqo kini pesu timi muqo lakhi shikuqhaveno Alhou lau saghiniyeke.

17 Ike Khristo no ighi puzu nongu Judakumomi Alhou launo putosupe akeqo vilo alakishi tsa pikulhake, eno Alhou kupunukhoyi akeqo Judami vilo alakishi tsa pikulhake,

18 Kughengu Khristo vechewo ningu Judami ngo Judakumomi amuqo kinikujo Aghungu lakhilo Apu lau ighikulupu shitsue.

19 Tishiaye, nongu Judakumomi ye inami eno kichekupomi kumovae ikemu Alhou wu timiqo sasu aghakhumike eno Alhou kibolomike.

20 Nonguye apostolmi ngo Alhouw tungkupmino aboqha shipuzu shiqhepukukeu ki lakhi ake, tipau puqhe akeu tuqu huye Khristo ke.

21 Aki kuchopu pano choqhe kuqhape akeuke eno tipau pelo Ampeu lau akimthe chineki shilupe nike thuwulupe ani.

22 Pa gholo xukimepe akeu vechewo nongu ghi kutami kumtsu gholono Alhou no ngokepuki Aghungu no shiqhepuku ani.

Sumi Naga CL Bible - BAIBEL

Copyright © 2013 by The Bible Society of India

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ