Ephesiami 1 - BAIBEL (BSI)

¹ Alhou pulou vechewo Jisu Khristo wu apostolmi shiluvekeu Paul no Efesia lo Alhou timi, Khristo Jisu gholo pukhubekulu shi akeqo lau ye ani.

² Ningu paPuh Alhou eno Jisu Khristo kudauno kupukini ngo alokiqipu nongu lau apeniu.

Khristo lono Aghungu Kukumgha

³ Ningu Mpeu Jisu Khristo paPu Alhou lau ninguno sheqhe ani. Ninguno Khristo gholo xukimepe akeu pano angugha kukumghapu jeli kumtsu kungugha lono pesu ningu kumghavetsuke.

⁴ Tiye ayeghiqha lhomphi lono Alhou no ninguye pawu shipenike Khristo gholono ningu kishephevae, tishianguno ninguno pa zulo akimthe shichepe eno pimi pemoniyeke.

⁵ Pano kimiyekeu lono Jisu Khristo vechewo ninguye pa nuliqo shipenike ado tomphi lono kutope qhive, tiye pa puloulo mijipe puakeu kiqilono ke.

⁶ hiye pawu kupukini kimthe jukuvupu khikhi pano Kimiyekicheu gholono kumsano ningu tsukeu sheqhepe niyeke.

⁷ Khristo no aji pele thikeu gholono ningu xachilelukeu eno ningu xine pevetsukeu ani.

⁸ Pawu kupukini khikhi ningu shou lepukutsukeno tiye kiutoi shishe kupukuno kela! Pa kighithi eno ithikututa shilukeu kumtsu lono

⁹ pa pulou muzamughaleyi kusupe achekeu ningu lau kighithivepeke, tiye pano Khristo gholo shikupuniye akimji shipe puachekeuke.

¹⁰ Alhou kukughuye ado achipi lono shikupuniye akeuye, atsutsu eno ayeghilo ake jeli kumtsu hekutsukumqo pesu Khristo pelo akutsu shipenikeuke.

¹¹ Kughengu thwokha Alhou kukughu eno pano kughathape puakeu kiqi lono shicheni; pano mijipe puakeu ghenguno abothu lono kughathavekeu shou bepe puzu Khristo gholono pawu timi shipenike ningu kishelu.

¹² Ningu khunoqono atughiu shi Khristo shou lajubelu keno, Alhou kimthe jekipipu sheqhepe nikeu shi kishepheveke.

¹³ Khristo gholono nongu ghi titoi shike, kughou nonguno kuchou tsape ti nongu xakulupu tsakiviu chilukeno nonguno Khristo shou pululuveke, ikehu nonguye pawuke pikeu michipu shi pano piqhivekeu toi Aghungu Kimthe pesu nongu tsuke.

¹⁴ Alhou launo ningu mheghi kumtsu ighilumoke kutolo tipau ithulu nani putsa ipikeu michipushi hipau tsupuanike. Ningu pa kimthe jekipi sheqheni nolo.

Paul Kighini

¹⁵ Highenguno, nonguno Ampeu Jisu lau akupulu akeu eno Alhou timiqo lau kimiyekini akeu ino chilu kethiuye

¹⁶ niye nongu ghenguno tamono Alhou lau shikimthi tsu acheni. Ino ikighinilo nongu kumsulu acheni.

¹⁷ Ningu Mipeu Jisu Khristo Lhou, Akimthe jekipi Apu pelo alokutsu ngo piyesukutsu ngugha nongu tsupenike inikhu cheni, tishianguno nongu pelo Alhou ithilupenike.

¹⁸ Ino inikhu achekeuno nongu kukumsu yepuvutsu puzu kiu lajupulo pano nongu kulukeno tipau ithipeniyeke, Alhou timiqo gholo akimthe jukuvu mheghi kinikulushi akeu ithipeniyeke,

¹⁹ ningu kupulumi lolo pa kukano shishe kihikhamla kepushi akeu ithipeniyeke. Ni lolo tipau kuka akeu huye

²⁰ pano khipau kuka kumto peithano akithi lono Khristo xuputhu keno tipau ke, eno kungugha qhalo pau ajeu Khristo pesu kughuqa ke.

²¹ Khristo no tilau kungugha yehpemi, mughachhoi yehpemi, kukami eno amipemi kumtsu shou akiqheu yehpeu shi ani; paye hipau yeghiqha eno hipa shelo yeghiqhalo akuka je jeli kumtsu nguno akiqheu ke.

²² Alhou no thwokha Khristo pukhu qholo qhitsu eno akukuhou kumtsu shou Ampeu. akiqheu shipenike tsupuani.

²³ Akukuhouye Khristo phimpi, thwokhalo pano shikupu chekeu huno pa likhi pa shikupu anie.