BOTHUBO 38 - BAIBEL (BSI)

Juda nqo Tamar Pama

¹ Tipa ghulokilo Juda ye pa thikuzumi qhiveno Adullam ghami Hira ipi keu gholo auve.

² Tile akelo Juda no Kananmi lakhi Shua ipikeu no nga ithulue. Pano li luve eno li sasu zuve.

³ Lino mishiluve eno anu lakhi punutsu, pano paje Er kutsu.

⁴ Lino itaghi mishilu no anu lakhi punue eno paje Onan kutsu.

⁵ Itaghi lino mishiluve eno anu lakhi punu, paje Shela kutsu. Lino Shela punu kelo Juda ye Khezib lo ae.

⁶ Juda no panu anoghiu Er ghenguno anipu lakhi lutsu, li jeye Tamar.

⁷ Er wu ghushoghiliye AMPEU zulo alhoksae ikehu AMPEU no pa pithive.

⁸ tile Juda no Onan vilo pi, “Omu nipu valuvelo, eno ochi sasu zulo tishianguno omu tikughukotsu kepushi.”

⁹ Ati anuliqo hu pawu shimo nani kepi Onan no ithi ake hu pano pachi sasu zuke kumtsu pa phizu ayeghilo kighijive che, tishianguno pamu jelono atikughuko tsumoniaye ke.

¹⁰ Pano kiu shikeno tiye AMPEU zulo alhoksae, ike AMPEU no paghi pithive.

¹¹ Tile Juda no pamukishiu Tamar vilo pi, “Inu Shela no kichimi shimoke kuto opuno kilo wono chime aghilo.” Juda no hi pikeuye kutau ghenguno kumono pamu pama toi Shela ghi pithivetsu nosakeu musave. Ikehu Tamar ye idewo papu no kilo acheuve.

¹² Ado hami wove kethiu Juda nipu Shua nonga hu thive. Juda no mloqa keu do tavekethiu pashou Adullam noghami Hira pama paw bheriqo mhi ghonike Timnat lo iqho.

¹³ Timi khamino Tamar vilo panguye Timnat lo pawu bheri mhi ghowuni chenipi pive aghi.

¹⁴ Ike lino chimemi phimini uakeu xave eno shonha kepu pesu li nhapuve eno Enaim phulo iloni keu kubala lo iqa ngoa. Enaim ye Timnat lo wucheke lalo aphu lakhi ke. Lino hitoi shikeuye kutau kumono Shela ye kichimi shiveamu li pelo pa sasu kulau pemo keu ghenguno ke.

¹⁵ Kughou Juda no li ithulukeno pano kumsukeuno liye kusalhalimi kughashive kughengu lino pagi shonhapuve kehu.

¹⁶ Pano ala phelo li lau tsughu ighi no pi, “Hila ighilo, ino osasu zunie.” Kughengu liye pa mukishiu kepi paye mtha. Tile lino mopi, “Noye kiu itsuni keno isasu zuniepi ani kya?”.

¹⁷ Pano khochile pi, “Iwu bheri loji lono ati lakhi otsupuwunie.” Lino pi, “Nono ti itsupuwu moke kutolo onhemgha hami igholo puaghini ma?”

¹⁸ Pano iniju, “Kiu nhemgha ogholo puaghilo pikya?” Lino khochile pi, “Ou kukhai, okichhelo yeho, o-ulo akusu akeu ngo ishi.” Pano tipaqo li tsuve, eno li sasu zuve eno tithiu liye mishiuve.

¹⁹ Tishieno lino ithu puzu wuve. Lino aphi shonhapukeu hu ikhiveno li wu chimemi phimini uluve.

²⁰ Juda no Adullam no ghami pashou gholono aneti lakhi tsupuwu puzu totimi lau huno pa nhemgha puakeu sughi peniye puwu, ikemu paye li phumlave.

²¹ Pano tipa alo kuami vilo ishi iniju, “Inami alaghiphilo kutuqhalimi achekeu hu khile ani kya?” Ikemu timiqono pa khochile pi, “Tiholo kutuqhalimi ngochemoe.”

²² Pano Juda lau idewo no “Niye li phumlae eno tipa alo kuami ghi tiholoye kutuqhalimi achemoe pike.”

²³ Juda no pi, “Li pelo inhemgha puakeu luve pelo eno palo kutovelo, itou timino ithiveno junu thaigha anosake ghenguno aneti tsupuwu kemu nono li phumlave ke.”

²⁴ Aqhi kuthua thiu Juda no chilu keuno pamukishiu Tamar ye kutuqhalimi toi timi sasu zupuzu anga mishi aniepi chilu. Juda no pi, “Li alaghi lalo sapeghi puzu pitiqhi pithivelo.”

²⁵ Li sasu alaghilalo ipeche kelo lino asutsa hipau pangu lau ishi pi puwue. “Anhemgha hipaqo khuu wu kela tipau nga niye mishipu anie. Hipaqoye khuu wu kela tsaqui jukutolo, hi au kukhayi, akichhe yeho eno akusu ishi.”

²⁶ Juda no tipaqo kimchiluveno pi, “Lino inguno achipiue. Ino achipi kumovae, kughengu ino inu Shela pelo li sasu kulauvepe kepushi ake.” Tithiu paye khilemu li sasu zumove.

²⁷ Lino punu kepu do toveno apunu kusu su akelo li polo anga kini aghie.

²⁸ Lino punumlano suakelo anga lakhino pa-u chhopipe. Apunulo hikujuuno ayeho akuhu pesu tile tshupukuve tsuno pi, “Hino punu tughue.”

²⁹ Ikemu pano pa-u sunhe suluve eno pa thikuzuu paghi punuve. Tile apunulo hikujuu huno pi, “Kishino opaghino atughushi vexu iqhighivekea!” Ikehu pano pa je Perez ku-tsu.

³⁰ Pa shelo pa thikuzuuye ayeho kuhuno pa-u khapususu punue. Pa jeno Zeraxu ku-tsu.