AMUS 2 - BAIBEL (BSI)

Muab

¹ AMPEU no pi, “Muab lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguno Edom lo akukau saghi phimo gihumo puzu tipaqo piti pesu ayevu kughulhoveke.

² Muab yeghi shou ino ami suvetsu nani eno Keriot liwo qogheqo pitilevetsu nani. Muab lo kuamiye aghukishilo aghushimino yeyeshi igha eno afuko kuyigha keu sutsa muta lono thive nani.

³ Ino Muab lo ayehkipeu ngo tipa yeghilo sakiphemi kumtsu ghiqhi pithive nani.”

Juda

⁴ AMPEU no pi, “Juda lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguno ino kutsupiyekeu jukunathake eno ino ahza tsukeu pechemoke. Panoqo puasuno qechekeu kichile lhouqo huno tipatho shi panoqo sabideveke.

⁵ Tighenguno Juda shou ino ami suvetsu nani eno Jerusalem lo aliwo qogheqo pitilevetsu nani.”

Israil shou Kughathabe

⁶ AMPEU no pi, “Israil lo kuamiye anguno anguno axine shi acheni eno tipau ghenguno niye mutsuqheyino panoqo ghimeqhi nani. Panonguye amikuchomino apiagha lomlano akeqo, kumlhomi khunoqono pano pukhukuqho tuna lakhi me ghi lochilemlano akeno tipaqo kugha pesu timi qecheuve peniye panonguno jechuke.

⁷ Panonguno kumlhomi qodaqhi eno shilukusami tuha pupoveke. Timi lakhi ngo papuh pamagha aqeliu lakhi sazuke eno tishike lono ije kimthe kitiqeveke.

⁸ Kumlhomino apiagha tsumla kehu tipau zuqhushi aphimini qhikeuhu timiqono pesuwo akumlla-a kumtsulo tipaqo qhazuke. Apiagha puakemi launo atsayiji qhupe panoqo Lhou Achine ki lono sho cheni.

⁹ “O iwu timiqo, nonguno tishi keghi niye nongu ghenguno Amarimi qhoi kutsakhaveke, timi tipaqoye kedar subo tohi chuqumghai eno aphisu toi choshiyike.

¹⁰ Ino Ijip lono nongu saipeghi, asayeqha lo ampe lhobidi nongu la piye eno now shipeniaye Amarimi yeghi pesu nongu tsuke.

¹¹ Ino nonuli khami pelo tungkupmi shipe nike kishelu eno now lhothemi khami pelo Nazariomi shi kisheluke. O Israil lo akemiqo! Tiye kuchou kumo kesha?

¹² Ikemu nonguno Nazariomi pelo atsayiji shope eno tungkupmi vilo itsape pikevilopi ahza tsuwuveke.

¹³ Jualo, itehiye ino nonguno ngo akeulo inadasuve nani eno nonguye akhokimishino qaqhikeshi igha su nani.

¹⁴ Shishe muthuthei polukemi namu poluni chemoe, akumtomino pano kumto kuhave nani eno ghushimiqoye pano kuxu xamla nani.

¹⁵ Asuzu kipemi ghi puthughope ngomlave nani, muthuthei polukemi pinamu wulumo nani eno khurshi shou ikuno chekemi pinamu pano kuxu puxulumo nanike.

¹⁶ Tipa tsalalo ghushimi amlo kumtou shiaghi namu pa ghunanu qhiveno pove nani.” AMPEU no piqhiveake.