ALE KIMCHI 1 - BAIBEL (BSI)

¹ Solomon le, ale kumtsu nguno akungou.

Ale atughiu Atotiu

² Okichi pe imuma penishi ani; Okikimiyeye aji nguno akiviu.

³ Nono nupu akeu teli ye tsungquyi; Oje kukelo tipau kumsulu ani; tighenguno ilimino okimiye cheni.

⁴ Ogholo kumtsa wunike isawulo; ochebolo isawulo o akukau; Nikujo alovi kuqhani, okikimiye ye aji nguno alokiqipu ke. nono vape keuye ale nguno akiviuke!

⁵ Jerusalem lo totimiqo, niye tsubui ke ikemu jukivike; Kedar lo aphiki toike, Solomon ki lashelo nhaqhiphi toi jukivike.

⁶ Ino tsubuike ghenguno mututui iju kevilo kughengu tsukinheno iphuqhi kehuke. Imunoqono ishou amlo ideve puzu ipelo atsayilu kheu shipeke. Niye ilikhi ijukuto kepu do ithumlae.

⁷ Ivilo pilo, ilomi Noye otsu-aqu khilehino kumzaniye sawu cheni kya? Tipaqoye puchomghulo khilehi ngopeni kya? Kushiepi niye itsuchekemi toi okusami tsuaqu pape cheni kya?

Akipitiu

⁸ Totimi gholo jukiviu, noye a-a hu mtha kesha? Noye atsu-aqu papewulo; Bherikhemi phiki phivilo anetiqo achu kumzalo.

⁹ Ilomi, ino opesu Farao wu khurkulu sunhechekeu khurshi alli kimighilu ani.

¹⁰ Ogimuchuye amekusho chila jukivi toi eno okuolo shuna chila akeu toike.

¹¹ Ino shuna yila oghenguno mlatsuni, tiye tsandiyi pesu axamunu shi sukeuke.

Atotiu

¹² Kughou akukauno iqaghi zukeu lakhulo ihozu akeno, Oxokutsunguno tsungqui chhive.

¹³ Ilopu ye ighenguno musughuta ikichhi dolo dape akeu toike.

¹⁴ Ilopu ye Engedi qhalo atsayililo aghalo xamunu puake toi.

Akipitiu

¹⁵ Ilomi, noye kiutoi jukivi kela! onhethilo kimiyekeuno azukuvu ani!

Atotiu

¹⁶ Ino kimiyekicheu, noye shishe puyelei; nono izupuvutsu cheni! Atsaneghuno nizu-a shini;

¹⁷ Kedar suno niki khetsu shini, eno asahu suno nikilo axu shini,