AKUMLO 1 - BAIBEL (BSI)

Jerusalem mlo Ghime

¹ Ghuthu lakhiye timi chhitoi achekeu phughi Jerusalem ye kughukughaleivae! Ghuthu lakhiye ayeghiqhano gihu cheke, itehi liye chimemi toivae; Aphughiqo gholo akiqheu huye aquaxelo ikiqi ilovae.

² Lino puthotsu qa acheni, anhezuno agimuchulo qoiqighi acheni. Puzuu li kusapami gholo milakhimu li lokughunotsupe nike ghupe puaghimove. Li kusapamino li pesu athe shive eno panongu kumtsu itehiye li ghumi shiva.

³ Juda lo achekeqoye shikighime keu quaxemi, pano ghakhu lono halepuwuve kemi. Panonguye kutami yeghilo xu acheni, pano yeghi kepi pilukepua kuhae, Aghumino veho pesu pokulupu lah kuhae.

⁴ Akimthe tsalalomu itehiye khunomu Achinekilo mlla nike ighi chemovae. Ilimi tilehi alephe chekeqoye ime auvae eno achinemino ighaphe mlano suaukhavae. Aphughi khagholo khumu kuhae eno Zion ye piti puzaqhiyi ani.

⁵ Li ghumino tokulu shiluvae; panoqo kuka pesu li tsuquluvae. Li xine kutomo shiveke ghenguno AMPEU no li pelo aghime shipeke; Li tianuliye kughalukhave eno sawuve.

⁶ Jerusalem qhivutsuniyi achekeuye kumtsu hauvae. Liwu sakiphemiye asheno akhuava launo miqemileive keu toivae; ashihami zulo poke launo akumto qhoyi cheve keu toivae.

⁷ Itehi Jerusalem ye ixapinyi yenguyelei ani, khaghi qhivutsunyi achekeu kumsu ani. Aghumi ulo liwu timiqono ikiqi ilove keulo khunomu li kuphunikemi kuhaveke. Li leluve keqono li no ikiqive keu junu qhike.

⁸ Jerusalem ye shishe axine shiveke ghenguno niqhunilayivae. Li gihu chekemi kumtsuno li thaigha ani, kughengu panonguno li phi kumsa akeu ithulue. Liye ihi su ani eno agi kusuluvae.

⁹ Li kimthekumoye li phiminilono ithuluve ani, ikemu liye ahasapu sholuniye akeu kumsujumoe. Lino vekiqhi akumsapuke, khunomu li lokughuno tsumlae. Aghumino toluvae eno liye AMPEU vilo kimiyetsu penike ighamukuke.

¹⁰ Aghumino liwu kinikulu kumtsu suxalu khavae. Tipaqono Achineki alou iloghikeu ithuluke, tipa aye Ashiayeh kutami pelo iloni keu AMPEU no lakha puake.

¹¹ Liwu timiqoye akusu launo ighaghi pano chuqupu phue. pano kuxu xalu niaye kinikulu pesu achuqupu qhuchue. Aphughino ishi igha, “AMPEU, ilau julo, ivekusalo ishou jupukulo.”

¹² Vechewu cheghi kemi kumtsu vilo lino pi, “Ikudau jupuwulo, khumu ino suakeu toi supuamoe, tiye AMPEU no pa loghu lono ishou sughi keu kusuke.”

¹³ “Pano kunguuno ami puwuke, tipau mino ilolo pitiqhi. Pano ighenguno alichhe piqepe qhi ke eno ayeghi kudau isunheqhive. Tishi puzu pano iqhiveno ipelo atsala kupujulo sukutu auvepe.

¹⁴ ‘Pano ixineqo jukuto kugho puzu tipaqo kumtsu pau no tsugha kumqo, Pano tipaqo pe ikuolo xipinivetsu, tipaqo kimshino iqaqhi. AMPEU no iha pesu ino mujochilemla kemi ulo suvetsu.

¹⁵ “AMPEU no iwu akumtomi ghushimi kumtsu junuqhi; Pano iwu lhothemiqo kutsa nike aghushimi kumzapu ishou kukumqo saghi, Atsayiji tsughuphe akeshi AMPEU no iwu timiqo qoda qhi.

¹⁶ ‘Hi ghenguno ino qa ani eno inhethi lono anhezu qole ani. Khunomu ilokughuno tsu mlake, khunomu ishikumto mlae. Aghumino itheqhiluvae, iwu timiqoye kughu kughaleivae.’

¹⁷ ‘Ino i-u sukhopesu ake, ikemu khunomu ilokughuno tsumlae, AMPEU no acheaxulo kuami kumtsu pesu ighumi shipe; Panonguno niqhunilai keu nhemgha toi ipeitha.

¹⁸ “Ikemu AMPEU ye achipike kughengu ino pa hebideve. Nongu timiqo, hi inilo, ino aghimeshi sukutu akeu julo. Iwu apumi eno ilimiqoye akughumi shi sasu wuvae.

¹⁹ ‘Ino kimiye chekemi kuke ikemu panonguno ipishiqhive; Achinemi ngo sakiphemiye panoqo kuxu puxulu niaye achuqupu phuche kelono apughi la lono thive.

²⁰ “O AMPEU, imlo ghujushi akeu jutsulo, imlo kusashi akeu jutsulo! Ino hebidekeu xine shike ghenguno imlo ipopinyive ake. Alaghilalo ghiqhile ani eno aki sholokuu ghi akithipu ani.

²¹ ‘Ino kishi sukutu igha ani keno inijulo: khunomu ikuphuni kemi kuhae. Nono kutsakungo keu ishou su ighi kepi ighumiqono chiluno alovi akhani. Nono tushoqhi puakeu tsala hu sughitsulo eno ighumi pelo itoi shilusa pelo.

²² “Panongu kumla lhoksa kumtsu nono kughatha kepu shilo; nono ixine ghenguno ighimeqhi ke toi panoqo ghimeqhilo. Niye sukutu kelauno igha ani eno imlo hauve ani.”