AHOLE 4 - BAIBEL (BSI)

Alokutsulo Amekua

¹ Inuliqo, nongu papuhno kiu shikani keno inilo. Amlo tsuqhiyi shilo eno nonguno vethakulu anani.

² Ino nongu shikapiye akeuye akivike, ike hi kumtsu kumsupululo.

³ Kughou ino itimi shiakeno, ipuaza nuye ilikhike hu

⁴ ipuhno ishika che. Pano ishi piche, “Ino kiu pikeno kumsupulo eno khilemu tipau kumsuma kevilo. Ino ovilo pikeu toi shilo eno noye xulu nani.

⁵ Alokutsu ngo jupilikulu helo! Ino pikeu kumsuma kevi momu kughucho kevilo.

⁶ Alokutsu qhive kevilo, lino osusholu nanike, li kimiyelo eno lino ojukuto nani.

⁷ Alokutsu shilukeuno thime kutau kumtsu nguno alau nono shilu nani. Nono kiukiu shilu aghinamu jupilikulu lulo.

⁸ Alokutsu kimiyelo eno lino opelo kijemi shipe nani. Li khalulo eno lino gihukepu olau sughi nani.

⁹ Lino akutsu kuqho kivi shitsu nani.

¹⁰ Inu, inijulo. Ino ovilo piakeu amlo tsuqhiyi lulo tishiaye noye axushulu nani.

¹¹ Ino alokutsu ngo akuxu achipiu lono xukepu ghola oshikavae.

¹² Nono alokutsu shi cheche aye ozulo kiumu lakukha ighimo nani eno nono pokelo kupxalumo nani.

¹³ Nono kiu shikaluve akeno pulhapuju kumsupulo. Okighithino okuxuke akivishi ti jukutolo.

¹⁴ Alhoksamino khile wuni keno tilau wukevilo. Kixikilamino shikeu pape kevilo.

¹⁵ Tipau shi kevilo! Alhoksa launo putosuvelo! Tipau milivelo eno oshelo chevelo.

¹⁶ Kixikilamiye panono kiuala akumou shilumoke loye zukeghi zuhulu chemoe. Kutami ghuzalu moke kutolo zuhumono tsukhutsuvae acheni.

¹⁷ Kixikila eno heqhi buqhikeu no panoqo chuqu-kusho shi acheni.”

¹⁸ Amikuchomino izuchekeu laghiye tsukinhe ipeche ke toike, atsala ipeghimoke kutolo vuqai kithe eno vuqai kithe acheni.

¹⁹ Kixikilami laghiye putholo toi zumoyike. Panonguno veqhikelo kiu kupxalu keno ithi chemoe.

²⁰ Inu, ino kiu piani keno tipaulo amlo tsuqhiyilo; itsa tsaqui inijulo.

²¹ Tipaqo pelo khilemu olauno povepe kevilo. Tipaqo kumsupu eno omlolo qhilulo.

²² Tipaqo ithiaye akuxu eno ashi aji kivi tsu nani.

²³ Nono kishi kumsu cheni keno jukutokughoilo; okuxuye akukumsuno ghophe cheni.

²⁴ Kuchou kumo aye khilemu pikevilo. Akimki eno chighichighai keu tsapi pevelo.

²⁵ Amikucho launo amlo mutotoilu keu pusu azu-u jupuwolo; akukujo shi akutsu pishiqholuve kevilo.

²⁶ Nono kiu shini keno kutokupui kughuwolo, tishiaye nono kiu kiu shinamu achipi shiaghi nani.

²⁷ Alhoksa muxu velo eno azuu muzuchoi chechelo, Kupkah lakhimu ala kumolo wukevilo.