AHOLE 31 - BAIBEL (BSI)

Kukami Kutsukeu

¹ Atsa hipaqoye Akukau Lemuel paza no panu vilo pikeu tsake:

² “Noye ino kimiyechekeu nuke, ikighini khochiletsu keu ke. Niye ovilo kiu pini kya?

³ Oshi aji kumto kumtsu totimi launo puwokhave kevilo momu owu pisa kumtsu totimi launo puwo kevilo; hipaqono kukami kutsave chenike.

⁴ Lemuel, inilo! Kukamiye aji shokepu kumoe momu akumka ji mineqhiyi kepu kumoe.

⁵ Panonguno ajishove aye, panonguye ayezah kumsumave cheni eno timiqono avehupushi akeu achipiuqo kughuchovetsu cheni.

⁶ Akumka jiye timi khunono akuxu kijikusalo ani keno tipaqo ghengunoke.

⁷ Panoqo pelo shopelo eno pano quagha ngo alokumtshu kumsumave pelo.

⁸ “Khunono pano likhi pano ghenguno pimlano acheni keno tipa zuqhushi pitsulo. Akukuphu kuhakemiqo chipiu sushotsulo.

⁹ Panoqo ghenguno pitsulo eno amikucho shi kughakuthau shitsulo. Kumlhomi eno kuhakemi chipiuqo susho tsulo.”

Phuyithayikeu Nipu

¹⁰ Phuithayikeu nipu phulunikeu kiutoi kushokutsu kela! Liye achiku nguno alau amekushoke.

¹¹ Li kimino li vilo amlo kumtsu lheqhi cheni eno paye khilemu kumlhomi shive chemoe.

¹² Lino xuake thaqhuloye liye pa lau akivipu shi acheni eno khilemu pa shipusa chemoe.

¹³ Lino mighimughai acheni eno ayephi ngo amhi phi ghoqhi cheni.

¹⁴ Alhikishi zukilu toi lino alapa chighi lono achuqupu phupesu akilo sughi cheni.

¹⁵ Tsutho mphi lono liye idathuveno akibolomi ghenguno achuqupu be-lhocheni eno li qelimi no shikepu kichetsu cheni.

¹⁶ Lino ayeghi jupuzu tipau qhuluve cheni, qelukeu pisa pesu atsayilu chi cheni.

¹⁷ Liye aka aghashi mlakemi, choshiyikemi eno azukinimike.

¹⁸ Lino mlaqhikeuye kiu qhemi keno thwokha ithi ani eno putholo ghi ado kihhi mla acheni

¹⁹ Lino aye zu pe aphimini gho cheni.

²⁰ Liye kumlhomi ngo aquaghami tsunikeu michhimighi chemoe.

²¹ Kughono avu qiuveni keno liye amloksa shichemoe kughengu li kibolomiye luvuyi keu phimini anikehu.

²² Lino azua kuqha ghocheni eno muduniyi keu phimini pepu cheni.

²³ Likimiye timi kumtsuno ithi akemi, acheaxulo sakiphemi lakhie.

²⁴ Lino aphimini ngo apokha gho puzu lhidi shichekemi vilo jesu cheni.

²⁵ Liye choshiyi eno kutamino qhoqhu cheni eno ighinikeu tsala ghenguno musa chemoe.

²⁶ Liye alokutsu shi ivunheyikeu lono timi putsa cheni.

²⁷ Liye pulhapujulo mighimghai puzu akibolomino avehupu shi akeu jukuto kugho cheni.

²⁸ Li tianuliqono liye alokepi piye cheni eno akimino li sheqhe cheni.

²⁹ Pano ishi picheni, “Totimi kutomono anipu kivike ikemu inipu no kumtsu nguno akiviue.”

³⁰ Puyeleyikeuye pishikiqhike eno ajukiviye hauve cheni ikemu totimi khuuno AMPEU gihu cheni keno tipau sheqhe kepue.

³¹ Lino kiu shikeno tipaqo kumtsu ghenguno li saxu tsulo. Liye timi kumtsuno sumsa kuzuke.