AHOLE 30 - BAIBEL (BSI)

Agur Tsaqo

¹ Hiye Jake nu Agur tsake; “Alhou ye igholo kuhae, Alhou ye igholo kuhae eno niye akukuphu kuhakemike.

² Niye timi toi mono tughashi toike, Niye timi toi kumsukulu kuhae.

³ Niye alokutsu shikalu chemoe; eno niye Alhou ghili kiumu ithi amoe.

⁴ Khuno atsutsulo kighithi ithikhaluve akya? khuno pa-u pesu amlhu tsuqulu akya? momu aphi tachu lono azu gholu akya? momu tsutsu yeghibo shope puani kya? paye khuu kela noye ithi ani kesha? eno panuye khuu kya?

⁵ “Alhou ye pano piqhivekeu kumtsu pelu cheni. Pa sukusho phuighikemi kumtsu ghenguno paye azuto lakhi toike.

⁶ Pano khilemu pipuamo amu kiuala piqhi puanikepi nono picheni aye pano olomi pinani eno noye kimkimi lakhi kepi pano ophuluve nani.”

Aholetsu Alau

⁷ Alhou, ipelo thime kini ithulupelo:

⁸ ipelo akimki tsa pipe kevilo eno ipelo kinimimu kumlhomi mu shipe kevilo eno ino avehupu shiakeu qhemi itsulo.

⁹ Ino kutomo auve aye, niye no-avehupu shiamo kepi pilunosake.Ikemu ino kumlhomi shiveaye niye pukauve nosake eno opipusakeu sughilu nosake.

¹⁰ Khilemu aqeu mipeu vilo aqeu lhoksa pitsu kevilo. Noye angsu shive nani eno tipau ghime sholuve nanike.

¹¹ Timi khamiye pututa papuh ghusho cheni eno pututa paza akishe tsu chemoe.

¹² Timi khamiye pano xineno kuchhube kutsula shi apulaghi mithemighei ani kepi kumsu cheni.

¹³ Timi khamiye panoye shishe akivi kepi kumsu acheni eno panoye tsutsungoju acheni!

¹⁴ Timi khamiye kumlhomi ngo aqu aghami shou ayikusashi akumou shino pano kuxu xulu cheni.

¹⁵ Ayiveye anga ilimi kini ani eno pama kinikujo jeye “Itsulo!” Thime bidi acheni ike tipaqoye khilemu aghaqivekeu kuhae:

¹⁶ Kithila yeghiqha, atianuli kuhakeu totimi, tsutsughu avehupushi akeu qhaikeu yeghi eno ghapinhemla keu ami.

¹⁷ Khunono papuh jununi keno momu pazano kitemi shivekeu jupichini keno paye aluqu pelo peuvepe eno agha pelo pa nhethi mighijo luve pekepue.

¹⁸ Thime bidi ino ithitoi luni keu shishe kumsa kimshipuke:

¹⁹ atsutsulo aluquno yechekeu, atuqu shou apighino itichekeu, azughi shou zukiluno ala phupe wukeu eno kiptimi ngo totimi lakhi pama kimiye kile akeu.

²⁰ Amlo pumokemi anipu lakhiye kishi shicheni keno hiani: lino salhave puzu azu kuchhuveno ishi picheni, “Ike niye kiumu akumou shipe puamoe!”

²¹ Thime bidi hipaqoye ayeghilo kutu-u mlakepu ani:

²² aqemi lakhino kukami lakhi shiuvekeu, kughuzumi lakhino pano lunishikeu kumtsu chukepu aghikeu,

²³ thokughapu totimi lakhino kulaulukeu, eno aqelimino li zakishiu a-lo ngoluvekeu.

²⁴ Ayeghiqhalo lhoxu kititi bidi ani ikemu tipaqoye ighono shitsake:

²⁵ Alhacheqo: tipaqoye miqemileyi ikemu panonguno mutsutsala lono achuqupu pekishepe qhi cheni.

²⁶ Achighiqo: tipaqoye mutotoimoe ikemu panonguno atuqu akeu lo aki iza cheni.

²⁷ Tulhaquqo: panongu shou akukau kuhae ikemu tipaqono cho kumtsa iqhoiqi cheni.

²⁸ Aniza akilo achekeqo: tipau oulono ikhipelu nani ikemu panonguye kukakilo aghikeu ithulu nani.

²⁹ Thime bidino jukighilepushi ala chechekeu ithulu nani:

³⁰ Abongushuu, lhoxu kumtsu nguno akuka kumtou eno panoqoye kiumu musa chemoe;

³¹ Aneqo, awuduno koghelei akeu, eno kukamino pawu timiqo zulo chewukeu.

³² Nono qhezalaki ghi anikha shicheghi eno alhoksa kughu cheni aye, okichi kujukha velo!

³³ Akichhizu tsughukeu lono atha ikhiphelu cheni. Nono kutami nigipelo ghatsu aye aji chiji cheni. Nono aloghu xukide aye noye akupunalo ilove cheni.