AHOLE 27 - BAIBEL (BSI)

¹ Khilemu thoghiu ghili pesu qheza kevilo. Itehi ngo thoghiu kuma dolo kiu shive nani kela noye mthake.

² Kutami pelo osheqhe pelo, inami shi aghi pinamu, ikemu khilemu olikhi noye osheqhe kevilo.

³ Atu ngo atusayeno mishishei keuye mbomzumi ghakighideye tikuma nguno akimshiue.

⁴ Amlo kighideye ayikusa eno kutsakungo keuke ikemu tiye anhekushu qhemi kumoe.

⁵ Timi lakhi shikumzuni keulo pa mlo shimove kepushi aghi namu pekipheshi pa sakiyive keu pavie.

⁶ Shompami lakhiye pano oghuza aghi namu akivipu ghengunoke. Ikemu aghumi lakhino pau pesu obighilo vape aye ti jukutolo!

⁷ Kughono opo chhitoi ani keno akhingozu mu milive cheni ikemu kughou nono muzuthiveni keno khumtsayikeu ghi ngoniyi michelu cheni.

⁸ Timi lakhino pa kibo lono wuveaye paye aghauno pa pusu lono wuvekeu toike.

⁹ Tsungquikeu ngo teli-xo kivino olopivi cheni; ikemu akupunano omlo iqunei akeu kubove cheni.

¹⁰ Oshompami momu opu shounoqo kumsumave kevilo. Nono kupunave aye othikuzuu vilo akukuphu khukevilo; okusami punukhoi akemino othikuzuu putou akeu nguno alau okuphulu nani.

¹¹ Inu, alokutsu shilo eno niye alovilu nani; tipau no ipipusa kemi khochile kulupu shi nanike.

¹² Kumsukulumiye akupuna chekeu ithulu puzu tipau muxu wuve cheni, ikemu kumsukutoju mokemiye vejoi tipaulo cheilove cheni eno athiuno amloksa shi cheni.

¹³ Khunono mbomzu shipuzu inaghami pi-agha makho puluvetsuni keu piqhini keno pano akeu tinhemgha pesu lochileni keu mutsuqhei shive kuzupuke.

¹⁴ Khunono inaqhe itheno idaithu puzu asutsa vekipighi pa shou vilo petha shikeu tsa pini keno pa shouye paghusho akeu toi kumsuve nani.

¹⁵ Mutomushu chekeu nipuye tsutsughu tsalalo azuno tsa-tsa ijiakeu toike.

¹⁶ Noye kishi puzu li pelo inaqhoilupe nani kya? Noye mulhu akeu lakhaniye pukaputsaju akesha? Momu aulo teli chhitoi peakulupu kesha?

¹⁷ Ayino ayi chighiketoi timiye lakhino lakhi launo shikalu cheni.

¹⁸ Khughuthibo tsaqui jukutolo eno noye khughuthi chukepu ithulu nani. Aqemi khuuno pa mipeu hejukutoni keno pa gihu kepu shicheni.

¹⁹ Azu lono ogi yebidekeu ithulu cheni eno omlo lono noye kiu toikemi keno tipau ithulu cheni.

²⁰ Timino mine chekeuye kithimi yeghi toike, tilehiye pulhapuju a-a ililai ani.

²¹ Ami pesu shunayi ngo tsandiyi pitiju cheni; timi lakhi ju-aje ghi pitiju lunanike.

²² Kughuzumiye akithi kumlhoshi ghaqhi pinamu noye pa launo pa nikha ghaqhi phemla nanike.

²³ Owu bheri ngo amshiqo nono toluke thaqhu jukutolo,

²⁴ kughengu kinikuluye alholo achemo nanike. Ashiayeh ghi alhokupujulo auve chemoe.

²⁵ Aghatsuni thuwu ake ghuloki lono naghuto kighijelo atsuni eno atsaneghu ghape qhilo.

²⁶ Owu bheri mhi pesu aphimini gholu nani eno ane hami jekeu pisa pesu ayeghi qhulu nanike.

²⁷ Eno ane kutau akeqono no eno okibo ghenguno akichhizu avehupu shinani eno okibolo aqelimi ghengu ghi avehupu shilu nanike.