AHOLE 26 - BAIBEL (BSI)

¹ Mutsutsala lono murasu qikeu momu ghile ghulokilo ghu ighike toi kughuzumiye gihu kuzupu kuhae.

² Nono angsu ithulu kuzupu shiaghimo napiaye ghushokeuye oghuza mlae. Tiye tughashoqhi momu akhaluno khilemu ngomono yecheke toike.

³ Noye khurshi ghaqhi kepushive cheni eno gadaha hasumasae eno kughuzumiye akusu pesu ghaqhi kepue.

⁴ Kutamino ovilo zutuzugha tsa inijukeu nono khochile aye noye ti zutuzugha tsa no iniju akemi paphi shiveniake.

⁵ Zutuzugha tsa ovilo inijuaye noghi zutuzugha khokichile tsulo, tishiaye khuuno tipau iniju ani keno paye amuqu kinimi kepi kumsuakeu hu tishimo kena ipi ithive nani.

⁶ Kughuzumi lakhi pelo osutsa pesu aghini shiwupe aye noye opukhu michevekeu pavie; noye akupuna khuanike.

⁷ Apukhu kinitave kemino pa pukhu pepimhelu keu toi kughuzumi ghi aholetsa pipimhelu chenike.

⁸ Kughuzumi sheqhekeu ye hevulakighilo atu ghakide ighikeu toike.

⁹ Kughuzumino alokutsu tsa piqhilu nikeuye shokumzumino pau lono asahu kejo ake toike.

¹⁰ Aqe kipiqemi lakhino kughuzumi kusawo piqesu aye apiji kapuwukemi kutamiqo ghuza akeu hutoi shianike.

¹¹ Kughuzumi lakhino ghuthu akiniu pa ghuzu kumla shikide aghi aye atsuno pano mughulekeulo idewo chu akeu hutoike.

¹² Timi khuuno paye alokutsumi kumoamu paye alokutsumi kepi pukha aghini keno kughuzumiu no pa nguno akiviuke.

¹³ Kushiye akipichimiye aki lono khalau ipe chemo kya? Paye kiu musa cheni kya? Abongushuu keo?

¹⁴ Akipichimi lakhiye kabza supuakeu hukikhano tipa-a lono tsughukide akeshi pa zua lono ithawu chemoe.

¹⁵ Timi khamiye pano kichilo achuqupu esuni keu ghi shishe pichi cheni.

¹⁶ Akipichimi lakhiye tsukhuyi kemi mitsunino pututa kukumsu pikelo akiqi kivi pilukeu nguno pauno tsukhuyi keu alau ani kepi kumsu cheni.

¹⁷ Okumlapu saje kumoamu muto akeulo chhosukeuye wupuzu alaghilo cheghi keu atsu shomhilo tsuqutsu aketoike.

^18-19 Khunono kutami saphepimi cheni puzu paye ghava shiani kepi pini keno paye izupho kicheyive kemino akithipu zuta angu pesu ghava shiakeu toike.

²⁰ Asu kuha aye ami hailove cheni; tihutoi xishikeu kuha aye mutomushuyi keu tave cheni.

²¹ Amiyi pitike lono amibalu chuchighei cheni, asuno ami iqu chenipe; tihutoi akupuna shichekemiye kutsalakeu puxupe acheni.

²² Xishikeuye shishe jumghayike! Ninguno tipau munoqhi anishi cheni!

²³ Amlolo alhoksa xapu puzu akichiloye zhumghai keu tsa pi chekemiye ayeghililo ayi-zu medapua keu toike.

²⁴ Keghili shikemiye ghaghu tsa pikeulo pano mithivekeu kusupe puani.

²⁵ Tipaqo inivi aghiluvi ikemu timi tipau pulu kevilo kughengu pa mloye mithikile keuno yeliqole anike.

²⁶ Paye pano kutami mithichekeu kusupe aghiluvi ikemu timi kumtsu pano alhoksa kumla shichekeu ithuluve nanike.

²⁷ Khunono kutami ghenguno aqoh chhupe qhicheni keno pano likhi panono veqhi ilove cheni. Khunono atu tukuluqhi cheni keno atuquno pano shou iluqi ikughi cheni.

²⁸ Akimki mili xapukemiye kutami ghuzaniye mithi cheni. Ghaghutsa pikeuye shikupsapu sughi cheni.