AHOLE 22 - BAIBEL (BSI)

¹ Ajuaje kivi ngo kinikulu kuma dolo ovilo lakhi kishelu lopiaye ajuaje kivi kishelulo.

² Kinimi ngo kumlhomi dolo aphiphishi akeuye hike; AMPEU no pama kini kujo lhoke.

³ Alokutsumiye akupuna chekeu ithuluno tsughuve cheni ikemu kuthathayi kemiye tipaulo iloveno athiuno amlo kusa shicheni.

⁴ AMPEU gholulo, aqhokighemi shilo eno noye akini, agigihu eno axu kushu ithulu nani.

⁵ Nono okuxu kupukimiye cheni aye alalo kixikilami meluchekeu lichhe lono putosu luvelo.

⁶ Itimi vilo paye kishi xumasa keno shikalo eno paye akuxu kupujulo tipau kumsupu che nani.

⁷ Kumlhomiye kinimi quaxemike. Pisa nalulo eno noye opuna keuno quaxeuke.

⁸ Nono achipikumo xakutha lothi yisu aye kutsakungo keu lothi lhoipeghi nani eno nono kutami nedaqoda chekeu kishekhave nani.

⁹ Tsukini jekinimi shilo eno ochuqupu kumlhomi sasu kusajelo. Tipau ghenguno okumghatsu nani.

¹⁰ Alikhi apulupivi chekemi qhivelo eno tishiaye kutsala keu, mutomushukeu momu timi jekukeu kuhave nani.

¹¹ Khunono amlo kimthe eno kimiyekini tsapi kimiye cheni keno akukauye tipano shompamike.

¹² AMPEU no akighithi shou jukuto acheni, ikemu kimkimi tsa hasuve tsu cheni.

¹³ Akipichimiye akilo ngoauve cheni; pano pichekeuno pano khalacheu ipe aye abongushuno pa tsuve nanike ipicheni.

¹⁴ Salhashupu keuye alichhe ke, AMPEU no khunoqo lau amlo ide cheni keno tipaqo ye tileno meluve cheni.

¹⁵ Ititunuye alhoaye lono azukutunupu eno jukuto kughoimo keu shicheni ikemu akivishi kitihevekeu lono panonguye kishi xupivi kepukeno shikalu nani.

¹⁶ Nono kinimi tughotili tsuaye momu kinimi shiniye kumlhomi nedaqoda aye noghi kumlhomi shive nani.

Alokutsu Tsa Shighi

¹⁷ Inijulo eno alokutsumino kiu pipuani keno ino oshikapiyeni. Panoqono shikapiyekeu phujulo,

¹⁸ eno nono tipaqo kumsulu puzu mlokite lono tipaqo piluaye noye amlokiqi shi nani.

¹⁹ Niye opelo AMPEU pukhu penishi cheni; itehi niye tipaqo pesu ovilo pini cheni.

²⁰ Ino oghenguno kugha chekeu tsa shighi yepeqhi puani. Hipaqoye akighithi eno akukutsu kivi pu anike

²¹ eno kuchouye kiu keno oshika nani. Kughou tipau phuwupeniye opuwuni keno noye khokichile achipiu sughilu nani.

-1-

²² Nono tolu aniepi kumlhomi wu lutsu kevilo; kughakutha-alo shilusa akeqo munudave kevilo.

²³ AMPEU no panoqo ghenguno ghechile nani eno tipaqo kichipuha kemi kuxu kichi puhave tsu nani.

-2-

²⁴ Timi khunono axuide eno aghaide chenikeno tipaqo sasu shompami shikevilo.

²⁵ Noghi panoqo lhoayeh shikaluvi eno kilimla kepu shive nani.

-3-

²⁶ Timi khunola mthamu tipano piagha makho pulutsu nikeu tsa piqhi kevilo.

²⁷ Nono lotsumlave aye timino ozua ghi pewuvetsu nani.

-4-

²⁸ Apu-asu lono shopuaghi keu lughi tusho khilemu pekiqeve kevilo.

-5-

²⁹ Akumla akivishi mlachekemi ipiyelo tishiaye kukami kusami akivimiqo nguno paye akiviu kepi ino opiyelu nani.