AHOLE 20 - BAIBEL (BSI)

¹ Aji kushoye kuthakughapuke eno shokumzu ye mutomushu chekeuke.

² Abongushuu kumqhu msakeshi akukau mlo kighide msalo; pa mlo shikighide keuye akuxu puhavetsu nani.

³ Kughuzumi khukhumu kutsala keu huthuluvi; tipaqo launo putosupe ngoluve keuye agigihupuke.

⁴ Alukichimi khuuno ado achipi lono palu hokideni ke pichi auveni keno ghile hukepu kuha nani.

⁵ Timi lakhi kukumsuye azukikhe kutholo azu akeu toike ikemu jupili kulu akemino tipau shophelu nani.

⁶ Kumtsuno pututa muzulo paye aghokulu eno pukhukulu kepi piaghi luvi ikemu khuuno kuchouno tipau keno phujulo.

⁷ Atianuli khunono apuh amikucho eno achipiu shichekemi aghini keno tipano kumghae.

⁸ Akukauno kughakutha alo iqa cheni eno alhoksa ithulukelo ti shipuhave cheni.

⁹ Khualano pa loloye tsughukhui ani eno paye axine phekhave akepi kuchochono pilu nani kesha?

¹⁰ Khunono amikucho kumo lono ahhu eno ahhutu peitha cheni keno AMPEU no mithi cheni.

¹¹ Itimi thotsu pano ghili lono paye kuchou eno alokemo keno piye cheni.

¹² AMPEU no ithulupe niye anhethi ningu tsupuani eno chilupe niye akini tsupuani.

¹³ Nono zuakeu lono ado kumtsu puwove aye noye kumlhomi shive nani. Mighimghai alo eno noye chukepu kupukuno shi anani.

¹⁴ Akuqhumiye pulhapujulo ame chilokepi muchho nani ikemu paye cheve puzu pano kishi alhi kughaqhilu keno tipau zale nani.

¹⁵ Nono kiu piani keno ithi ghi pi aghi aye noye shuna momu achiku nguno amekushou anie.

¹⁶ Khukhumu anikha lono inaghami piagha makho puluve tsuni keu shi piqhi aye pa nhemgha pesu love nikeu shi qhive paghi masae.

¹⁷ Nono amikuchokumo lono kiu ithulukeno achuqupu kivi toi peitha aghiluvi ikemu itehi na kutou namu tiye abaxalo atu saye toi nani.

¹⁸ Akukutsu kivi lulo eno noye tokulu shiwo nani; akukughu kuhano aghumi hawu kevilo.

¹⁹ Xishikeu loye khilemu tuqhou tsa qhimlae. Atsa chilo pikemi launo putosuvelo.

²⁰ Opu-aza ghusho aye okuxuye zumoikelo akulu lakhi inhe ilovekeu toi hauve nani.

²¹ Nono kishi mlaleyi shipuzu okinikulu shiluni keno tiye oghengu akivipu kitila likhi shilu nani.

²² Akumou olau shikeu olikhi nono lochilenikeu shikevilo. AMPEU pichebevelo eno pano tipau shikumzu nani.

²³ Khunono amikucho kumo ahhu ngo ahhutu peitha cheni keno tipanoye AMPEU no mithi cheni.

²⁴ AMPEU no nilaghi kutovetsua; tishiaye khuuno pa kuxuye khikudau wucheni keno ithi kuthuluni kya?

²⁵ Alhou lau akumllagho tsunikeu piqhi mphi lono tsaqui kumsujulo. Athiuno noye kushiye tishiakela pi kumsulunosake.

²⁶ Alokutsumi kukauye khuno akumou shiani keno phukide kudaju cheni eno kimiye mono pa ghimeqhi cheni.

²⁷ AMPEU no kumsukulupu ngo kivikusa ithi keu ningu tsupuani; nilauno itshuwuve mlake.

²⁸ Akukauye pa yehkipeno kuchou achipi eno aghibiu lono shiake kutolo akuka kumto shia nani.

²⁹ Ninguno lhothemi shiaji kumto shecheni eno asakumpami sumsa cheni.

³⁰ Khaniloye aghimeshi puju shiju kethiuno nino xuchekeu laghi kilikitheve kepu shi cheni.